Փաստ ինֆո

Արցախյան 44-օրյա պատերազմում նահատակված Մխիթար Գալեյանի հայրը՝ Գարիկ Գալեյանը դատապարտվեց ազատազրկման։ «Փաստինֆո»-ի հաղորդմամբ՝ Երևանի ընդհանուր իրավասության քրեական դատարանը՝ դատավոր Մասիս Մելքոնյանի նախագահությամբ, այսօր նախ հրապարակեց մեղադրական վերդիկտ, ինչից հետո Գալեյանի կնոջ՝ Աստղիկ Գալեյանի, ինքնազգացողությունը վատացել է։ Աստղիկ Գալեյանը հայտարարել է, որ հենց այս օրն է իր որդին զորակոչվել բանակ։ Մասիս Մելքոնյանն այսօր հրապարակեց նաև դատավճիռը՝ դատապարտելով Գալեյանին ազատազրկման՝ 2 տարի ժամկետով, ապա, հաշվակցելով Գալեյանի՝ նախաքննության ընթացքում անազատության մեջ գտնվելու 6 ամիս 27 օր ժամկետը, վերջնական պատիժ նշանակեց 1 տարի վեց ամիս ժամկետը։ Դատարանը միևնույն ժամանակ  Գալեյանի նկատմամբ որպես խափանման միջոց կիրառեց տնային կալանքը՝ մինչև վճռի՝ օրինական ուժի մեջ մտնելը։ Նշենք, որ դատաքննության ընթացքում Գալեյանի խափանման միջոց կալանքը փոխվել էր տնային կալանքով՝ համակցված գրավով, ապա՝ վարչական հսկողությամբ, ապա նաև՝ բացակայելու արգելքով։ Գալեյանի նկատմամբ բացակայելու արգելքը որպես խափանման միջոց կիրառելու մասին որոշման դեմ դատախազությունը վճռաբեկ դատարան բողոք է ներկայացրել, իսկ այսօր՝ դատական նիստից առաջ Վճռաբեկ դատարանը մերժել է դատախազի բողոքը՝ իրավաչափ համարելով Գալեյանի նկատմամբ կիրառված խափանման միջոց բացակայելու արգելքը։

Փաստաբան Վահան Հովհաննիսյանը դատավճռի հրապարակումից հետո լրագրողների հետ զրույցում «հեգնանքով» նշեց՝ դատարանը «մեծահոգաբար» փաստացի արգելանքի տակ գտնվելու վեց ամիս ժամկետը հանեց 2 տարվա ազատազրկման ժամկետից։

«Ինչու եմ ասում մեծահոգաբար, որովհետև դա օրենքի խստիվ պահանջն է, բայց նախագահող դատավորի դեպքում չէինք զարմանա, որ դա էլ չհանվեր։ Այնպիսի բաներ տեսանք դատալսումների ընթացքում, որ ոչինչ էլ զարմանալի չէր»,- ասաց Հովհաննիսյանը՝ հավելելով, որ դատավճիռը բողոքարկվելու է, ավելին, սա ՄԻԵԴ գնացող գործ է և հերթական վճիռն է լինելու՝ ընդդեմ ՀՀ-ի։ Ըստ փաստաբանի՝ սա մեսիջ էր՝ ուղղված զոհված զինծառայողների ծնողներին՝ լռեցնելու։
«Ծնողներին կարելի է Եռաբլուրում ծեծել և չենթարկվել պատասխանատվության, կարելի է վիրավորել, նվաստացնել և չենթարկվել պատասխան, իսկ կես լիտր ջրի մի հատվածը անձի մեջքին լցնելու համար մարդը դատապարտվում է ազատազրկման, եթե մեկ լիտր ջուր լիներ, գուցե վեց տարի դատապարտվեր»,- նշեց նա։

Հիշեցնենք, որ Գարիկ Գալեյանը ձերբակալվել էր 2023թ․ սեպտեմբերի 8-ին՝ ՔԿ-ում քննվող քրեական վարույթի շրջանակներում։ Հատկանշական է, որ Գալեյանի ձերբակալությանը նախորդել էր «Որդիների կանչ» ՀԿ հայտարարությունը, համաձայն որի՝ Երևանի ավագանու ընտրություններին սատարելու են «Մայր Հայաստան» դաշինքին։

Գարիկ Գալեյանին մեղադրանք է ներկայացվել ՝ խմբի կազմում խուլիգանության և իրացնելու նպատակով թմրամիջոց պահելու հատկանիշներով։ Ընդ որում, խուլիգանության հատկանիշներով մեղադրանքը ներկայացվել է հենց Գալեյանի հաղորդման հիման վրա հարուցված գործով։ Մասնավորապես, անցած տարվա ընթացքում ՀՀ գլխավոր դատախազության շենքի մոտ իրականացվող ակցիայի ընթացքում իշխանական սադրիչներից մեկը փորձել էր միջամտել ակցիային, Գալեյանը իր ձեռքի շշով ջուրը լցրել էր նրա գլխին, արարքը որակվել է որպես խմբի կազմում խուլիգանություն։ Միջադեպի ընթացքում վասվածքներ են ստացել հենց ծնողները՝ Վահիդ Սահակյանը, Գարիկ Գալեյանը, ինչով պայմանավորված էլ հաղորդում են ներկայացրել։

Հեղինակ՝ Իզաբել Սահակյան

Աղբյուր` Փաստինֆո