Փաստ ինֆո

Սյունիքի մարզի ընդհանուր իրավասության դատարանը՝  դատավոր Վարսենիկ Մելքոնյանի նախագահությամբ, հեռացել է առանձին սենյակ՝ Գորիսի քաղաքապետ Առուշ Առուշանյանի պատիժն ազատազրկմամբ փոխելու մասին Պրոբացիայի ծառայության միջնորդության վերաբերյալ որոշում կայացնելու։

«Փաստինֆո»-ի հաղորդմամբ՝ այսօրվա նիստում կողմերը պնդեցին իրենց դիրքորոշումը։ Դատախազության ներկայացուցիչը, անդրադառնալով պաշտպանության կողմի պնդումների, նշել էր, թե դատարանը գտել է, որ Առուշանյանին՝ 5 տարի ժամկետով որոշակի պաշտոններ զբաղեցնելու իրավունքից զրկելու ձևով պատժով հնարավոր է ապահովել պատժի նպատակները, այդ թվում՝ կանխելով Առուշանյանի՝ զբաղեցրած պաշտոնից բխող համանման հանցագործությունների հետագայում կատարման հավանականությունը։

«Պնդումը, որ համայնքի ղեկավարին ընտրել է ժողովուրդը, հետևաբար, ժողովրդի քվեն չի կարող առ ոչինչ դառնալ, քանի որ ժողովրդի կամքն առաջնահերթություն ունի, քան՝ դատական ակտի կատարումը, հիմնավոր չէ, քանի որ դատավճռով քվեի անվավեր կամ առոչինչ համարելու հարց չի քննարկվում, այլ՝ անձի մեղավորությունը՝ կատարված հանցագործության մեջ»,- նշեց դատախազը։
Առուշանյանի փաստաբան

Սերգեյ Մարաբյանն էլ դատախազի գնահատականները գնահատեց որպես «թեզիսի նենգափոխում» , նշեց՝ վերցրել են նյութական օրենքը, բայց Վճռաբեկի նախադեպերը՝ ընթացակարգային նորմերի վրա վկայակոչելով՝ ցանկանում են կիրառել նյութական նորմերի վրա, մինչդեռ, արդեն 300 տարի տարանջատվում է՝ նյութական և ընթացակարգային նորմերը։

«Երբ ՍԴ որոշումները վկայակոչում եք՝ հստակեցրեք, ստացվում է՝ վերցնում ենք այլ ակտերի վերաբերյալ ՍԴ որոշումների հետադարձ ուժ տալու դիրքորոշումները և փորձում ենք կիրառել քրեական օրենքի վրա՞, այդպես չի լինում, Քրեական օրենսիրքը գործում է բոլորովին այլ խաղի կանոններով․ եթե պաշտոն զբաղեցնելու իրավունքից զրկելը փոխվում է ազատազրկմամբ, ապա դա անձի վիճակի վատթարացում է։

Դուք ցույց տվեք ինձ որևէ օրենքի նորմ, որտեղ գրված է, որ որոշակի պաշտոններից զրկելը կատարվում է դատապարտյալի կողմից կամովի, նման բան չկա։ Այս պատժի մասով նման բան չկա, որտեղի՞ց եք նման բան ասում»,- ասաց Մարաբյանը՝ նշելով, որ եթե պետությունը չի ստեղծել իրավական նորմեր, առաջացրել իրավական վակում, ապա պետք չէ անալոգիա անել, հորինել քրեական օրենք, որ այս դատական ակտը կատարվի, գործ ունենք օրենսդրական բացի հետ։ Փաստաբան Դավիթ Կարապետյանն էլ, ներկայացնելով դիրքորոշումը, պնդեց՝ ՊԾ միջնորդությունը ենթակա է մերժման։ Առուշ Առուշանյանը միացավ պաշտպանների դիրքորոշմանը։

Հիշեցնենք, որ Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, 2022թ․ մարտի 28-ին հրապարակել է Առուշ Առուշանյանի և մյուսների գործով վճիռը, որով Առուշանյանն արդարացվել է իրեն մեղսագրվող ընտրական հանցավոր ենթադրյալ արարքների դրվագով, իսկ մյուս դրվագով՝ մեղավոր ճանաչվել և դատապարտվել ազատազրկման՝ 1 տարի 6 ամիս ժամկետով, որին հաշվակցելով Առուշանյանի՝ ութ ամիս արգելանքի տակ գտնվելու ժամկետը, դատարանը որպես վերջնական պատիժ սահմանել է ազատազրկումը՝ 6 ամիս ժամկետով, որը պայմանականորեն չի կիրառվել. Դատարանն Առուշանյանի նկատմամբ փորձաշրջան է սահմանել 1.5 տարի ժամկետով, միևնույն ժամանակ, Առուշանյանի նկատմամբ որպես պատիժ է կիրառվել տուգանքը և 5 տարի ժամկետով ՏԻՄ ղեկավար պաշտոն զբաղեցնելու սահմանափակումը։ Արդարացվել են նաև Քարահունջ բնակավայրի ղեկավար Լուսինե Ավետյանը և ամբաստանյալներից ևս երկուսը՝ Սամվել Դինունցը և Հրայր Բաղդասարյանը, իսկ Էրիկ Աղաջանյանը և Հարութ Լալազարյանը՝ մեղավոր են ճանաչվել։ Դատական ակտի դեմ բողոքներ են ներկայացվել։ Վերաքննիչ հակակոռուպցիոն դատարանն անփոփոխ է թողել դատական ակտը, Վճռաբեկ դատարանը մերժել է վարույթ ընդունել բողոքը։ Ըստ այդմ, դատական ակտը մտել է օրինական ուժի մեջ։ Պրոբացիայի ծառայությունը դիմել է Գորիսի ավագանուն՝ Առուշանյանի լիազորությունները դադարեցնելու հարցով, սակայն ավագանին մերժել է միջնորդությունը՝ արձանագրելով, որ դա իրենց լիազորություններից չի բխում։

Արդյունքում՝ ԱՆ Պրոբացիայի ծառայության Սյունիքի մարզային մարմնում կազմվել է արձանագրություն Առուշանյանի կողմից պատժից խուսափելու մասին, և միջնորդություն է ներկայացվել ՀՀ Սյունիքի մարզի առաջին ատյանի ընդհանուր իրավասության դատարան՝ Առուշ Առուշանյանի նկատմամբ դատավճռով նշանակված պատիժը՝ 5 տարի պետական պաշտոն զբաղեցնելու իրավունքից զրկելը ազատազրկմամբ փոխարինելու, ինչպես նաև ազատազրկման ձևով պատիժը պայմանականորեն չկիրառելու վերաբերյալ որոշումը վերացնելու և պատիժը կրելու վերաբերյալ։ Միևնույն ժամանակ՝ բողոք էր ներկայացրել նաև Առուշ Առուշանյանը՝ Պրոբացիայի ծառայության գործողությունների դեմ, որը Սյունիքի մարզի ընդհանուր իրավասության դատարանի դատավոր Գոռ Գասպարյանի կողմից մերժվել է։

Հեղինակ՝ Իզաբել Սահակյան

Աղբյուր` Փաստինֆո