Փաստ ինֆո

ՍԴ դատավոր Վահե Գրիգորյանը, որը ՄԻԵԴ դատավորի թեկնածու է, չխորշեց խոսել «Մարտի 1»-ի գործից, որով ներկայացուցիչ է եղել։

«Փաստինֆո»-ի հաղորդմամբ՝ շարունակվում է թեկնածուների հարցազրույցը։

Թեկնածու Վահե Գրիգորյանից հետաքրքրվել են, թե որ գործն էր առավելագույն բարդը։ Գրիգորյանն էլ արձագանքեց, թե «ավելորդ համեստություն» է ցուցաբերել՝ չնշելով բոլոր գործերը, որում մասնակցություն է եղել, գործերի մի մասը համատեղ է ներկայացրել գործընկերների հետ, եղել են գործեր, որոնցով ներկայացուցչի խորհրդական է եղել, գործեր են եղել, որոնցով ինքը, թեև ներկայացուցիչ է եղել դատարանում, բայց պայմանավորված՝ ՍԴ դատավոր դառալու հանգամանքով՝ իր անուններն այլևս գործերով կայացված վճիռներում նշված չեն։

Վահե Գրիգորյանը, սակայն, «չմոռացավ» խոսել «Մարտի 1»-ի գործից և գնահատականներ, այդ թվում՝ քաղաքական գնահատական հնչեցնել, թեև ինքն արդեն դատավորի կարգավիճակ ունի։

«Ամենաբարդ գործն ինձ համար եղել է «Մարտի 1»-ի 9 զոհերի գործը։ Դիմողների կողմից ներկայացված փաստարկներն իրենց մեջ ներառել են նաև ընդհանրապես ԵԴ իրավունքի զարգացման առաջարկություն՝ երկրորդ հոդվածի ներքո, որ տեխնոլոգիական զարգացումը մեր դարում հասել է մի աստիճանի, որ մարտական միջոցներն ամենևին անհրաժեշտ չեն առհասարակ։ Այն ժամանալ, երբ ես այդ գործը ներկայացնում էի, բավականին հիմնավորումներով դատարանին խնդրել էինք, որ դատարանը հաշվի առնի և արգելք դնի մարտական միջոցների գործադրման նկատմամբ՝ ոստիկանության գործողությունների ընթացքում և խոսքը չի վերաբերում հատուկ իրավիճակում, օրինակ, ահաբեկչության իրավիճակներում անտրամաբանական կարող է լինել այդ արգելքը, բայց մարտական միջոցների կիրառումը որևէ պատճառաբանություն և արդարացում չի ունեցել, համաչափության սկզբունքի հետ որևէ համատեղելիություն չուներ»,- ասաց Գրիգորյանը։
Հիշեցնենք, որ ավարտվում է ՄԻԵԴ-ում ՀՀ դատավոր Արմեն Հարությունյանի պաշտոնավարման ժամկետը։ Այժմ թեկնածուները յոթն են՝ փաստաբան Հայկ Ալումյանը, դատավոր Լիզա Գրիգորյանը, ՍԴ դատավոր Վահե Գրիգորյանը, դատավոր Նորա Կարապետյանը, սահմանադրագետ Արմեն Մազմանյանը, ի.գ.թ. Աննա Մարգարյանը, ԲԴԽ անդամ Վիգեն Քոչարյանը։

Հեղինակ՝ Իզաբել Սահակյան

Աղբյուր` Փաստինֆո