Փաստ ինֆո

Ես ժպիտով չէի վերաբերվի մի բանի, որն այսքան տարի աշխատում է։ «Փաստինֆոյի» հետ զրույցում ասաց հոգեբան Միհրդատ Մադաթյանն՝ անդրադառնալով Արարատի մարզի ՔՊ-ականների հետ հանդիպման ընթացքում Հիսուս Քրիստոսի հետ համեմատվելու Նիկոլ Փաշինյանի հայտարարությանը։

Հիշեցնենք, որ նա, մասնավորապես ասել էր, թե Հիսուս Քրիստոսն իր ընկալմամբ երբևէ երկրագնդի վրա քայլած ամենամեծ հեղափոխականն է։ Հոգեբանի դիտարկմամբ՝ այս հայտարարությունը բավական թիրախային է հնչեցվել։ «Մենք թիրախային խումբ ունենք, որը տարբեր սրբապատկերները ամբողջ օրը դնում է իր էկրանին, թիրախային խումբ ունենք, ովքեր մինչև հիմա հրահանգով նամակներ են 7 տեղ ուղարկում, որ դժբախտության մեջ չընկնեն։ Այսինքն՝ այս մարդիկ մեր մեջ կան ու, կարծես թե, նրանք քիչ չեն։ Փաշինյանի խոսքը հենց նրանց համար էր»,- նկատեց մասնագետը։

Նրա դիտարկմամբ՝ նման նպատակային համամեմատությունները Փաշինյանի համար նոր չեն։ «Առաջին նման հայտարարությունն արվել է իր կառավարման դեռ առաջին տարիներին, կհիշեք՝ Իտալիայում իրեն կրկին համեմատել էր Քրիստոսի հետ։ Որոշ մարդիկ էլ դրանից հետո գրքեր գրեցին՝ «Իջևանից եկած միսսիայի» մասին։ Այս ամենը եղել է, սա իր ընկալումն էր ունիկումի, ինչպես ինքն էր ասում, աննխադեպ իրավիճակի, որովհետև Քրիստոսն իր ընկալմամբ աննախադեպ անձնավորություն էր, Փաշինյանն իրեն «քրիստոսիֆիկացնում» էր։ Այսինքն, ես կարծում եմ, որ այս երևույթին պետք է նայենք, ոչ թե որպես առողջ կամ հիվանդ մարդու խոսք, այլ պետք է նայենք, թե որքանով է այդ խոսքն արդյունավետ։ Իր թիրախային խումբը մնացել է հենց այդ՝ դժբախտությունից խուսափելու համար 7 հոգու նամակն ուղարկողների դաշտում, իսկ այդ խմբի համար սա բավական արդյունավետ մեթոդ է՝ ՔՊ-ի ու իր դերն ու նշանակությունը մեծացնելու համար՝ մինչև միսսիայի, Քրիստոսի մակարդակ»։

Մադաթյանը կարծում է, որ կրթական ցենզ ունեցողների տեսանկյունից, բնականաբար, այս խոսույթը չի հաջողելու, բայց արդյո՞ք տոկոսային հարաբերակցությամբ բնակչության շրջանում կրթական ցենզ ունեցողներն են մեծամասնությունը։ «Իհարկե ոչ, մեծամասնությունը հենց ընդունում է այն գաղափարը, որ Նիկոլն առաջ է մղում։ Պատերազմից հետո մեծամասնությունն ընդունեց, որ որդեկորույս ծնողները կարող են գնալ ու Աննա Հոկոբյանի հետ գինի խմել։ Այս աբսուրդն ընդունեց, չէ՞ մեծամասնությունը, հայ ժողովրդի սպանդն իրականացրած կուսակցությունը 2021-ի ընտրություններում մեծամասնություն ստացավ, չէ՞։ Հիմա մենք որքան էլ ծիծաղենք այս ամենի ադեկվատության վրա՝ ասելով, որ սա ադեկվատության մեջ չէ, այո, ադեկվատության մեջ չէ, բայց պետք է հասկանալ, թե արդյունավետության չափը որքան է, իսկ արդյունավետությունն ավելի ուշ կերևա։ Այո՛, խելահեղ է, այո՛, ադեկվատ չէ, մեծամոլական զառանցանք է, բայց արդյունավետության տեսանկյունից դա աշխատելու է։ Ավելին, նա հիմա պիտի համեմատվեր կա՛մ նեռի, կա՛մ Քրիստոսի հետ, այս փուլում գերադասում է Քրիտոսի հետ համեմատությունը։ Մարդիկ կան, որ համեմատում են Նեռի հետ, ամեն դեպքում՝ այդ մեծամոլական զառանցանքն աշխատում է»,- արձանագրել է հոգեբանը։

Աղբյուր` Փաստինֆո