Փաստ ինֆո

Տեղ գյուղում մայիսի 1-ից հետո կյանքը շատ է բարդացել։ Բնակիչները լուրջ խնդիրների առաջ են կանգնել․ շուրջ 70 գլուխ անասուն արդեն երկու շաբաթ է՝ գարնանային այս օրերին, երբ պետք է առավոտից իրիկուն արոտավայրում լինեն, գոմում կապած են։

«Ներքին երկու թաղամասի բնակիչները՝ ես էլ իրենց հետ, չենք կարողանում անասուններին արոտի տանենք։ Էն տարածքները, որտեղ պիտի տանենք արածացնենք, թշնամու ուղիղ դիտարկման տակ է։ Երկու նախիր էրէդտեղ արածում՝ 70-75 գլուխ խոշոր եղջերավոր անասուն։ Հիմա ստիպված գոմում ենք պահում։ Չենք էլ կարող վերացնել։ Որ վերացնենք անասուններին, ինչո՞վ ապրենք։ Շատ անկանխատեսելի բաներ կարող են լինել։ Ենթադրենք անասնապահը տարավ նախիրը, բա որ էսկալացիա լինի կամ սկսեն կրակել, ի՞նչ անի էդ մարդը․ պաշտպանվի՞, թե՞ նախիրի հոգսը քաշի։ Անասուններն էլ որ անցնեն թշնամու կողմը, որտեղի՞ց էդքանի գումարը տա։ Ոչ մեկը երաշխավորված չի, որ ցանկացած պահի չի թիրախավորվելու թշնամու կողմից»,-«Փաստինֆո»-ի հետ զրույցում իրավիճակը ներկայացնում է Տեղ համայնքի ավագանու անդամ Մասիս Զեյնալյանը։

Գյուղացիների մտահոգությունները շատ են․ շատ են նաև անպատասխան հարցերը։ Ավագանու անդամը նշում է՝ մարզպետը օրերս իրենց համայնքում հանդիպում է ունեցել ավագանու անդամների հետ, բայց իրեն չեն հրավիրել՝ չնայած նախապես խնդրել էր։
«Մարզպետարանի էջում տեսել էի, որ մարզպետն այցելելու է համայնք։ Զանգել էի հարցրել, թե երբ է նախատեսված այցը, չէին ասել, ես էլ խնդրեցի՝ որ գա, ինձ էլ տեղյակ պահեն, բայց էլի չեն ասել։ Հետո իմացա, որ եկել է, հանդիպում անցկացրել։ Հիմնականում ավագանու ՔՊ-ական անդամներն են ներկա եղել։ Բայց կարելի էր, չէ՞, ասել, որ բնակիչներին հուզող հարցերը բարձրաձայնենք։ Ցավոտ հարցեր եմ բարձրացնում, գուցե դրա համար չեն ինձ կանչել»,-ասում է Զեյնալյանը։

Եվ այսպես, գյուղացիները խնդիրներն ու մտահոգությունները շարունակաբար աճում են, ապրուստի միջոցները՝ կրճատվում, անվտանգային հարցերն էլ՝ ավելի սրվում։ Զեյնալյանը նկատում է՝ հասարակ գյուղացին չի կարողանում բան փոխել, քանի որ վերևից են հրահանգներն իջեցնում։

Աղբյուր` Փաստինֆո