Փաստ ինֆո

ՀՀ Մաքսային ծառայության գնդապետ Բաբկեն Ղազարյան  հայցն ընդդեմ  Դանիել Իոաննիսյանի մայիսի 31-ին նեկայացվել է դատարան։ Այս մասին «Փաստինֆո»-ն տեղեկացավ Ղազարյանի ներկայացուցիչ, փաստաբան Լուսինե Սահակյանից։

Բանն այն է, որ մայիսի 22-ին՝ հրապարակային քննարկման ժամանակ, Դանիել Իոաննիսյանը տեղեկություններ էր տարածել Բաբկեն Ղազարյանի մասին, որոնք, ըստ Ղազարյանի, կեղծ են եւ արատավորում են իր պատիվն ու արժանապատվությունը։ Իոաննիսյանը մասնավորապես ասել էր. «Նախկինում մենք չենք տեսել դեպքեր որ ազգային անվտանգության ծառայությունը կամ ծառայության տնօրենը այդքան սերտ համագործակցության մեջ լինի քրեական հեղինակությունների հետ: Քրեական հեղինակությունների անուններն էլ շատերը գիտեն, այսինքն անուն-ազգանուները ես չգիտեմ, մականուններով են ասում՝Վստրեչի Ապեր, Թոխմախի Բաբո, Վովայի Արշակ, այսինքն էդ մարդիկ հիմա իրանց ավելի ազատ են զգում քան նախկինում...»

Բաբկեն Ղազարյանի փաստաբան Լուսինե Սահակյանի խոսքով՝ իրենք հայցադիմումով պահանջել են  նույն միջոցով, այսինքն՝ մամուլի ասուլիսով, հերքվի Իոաննիսյանի կողմից տարածված տեղեկությունները. «Հերքման տեքստը բնականաբար կցվել է հայցադիմումին, եւ միաժամանակ պահանջել ենք 2 միլիոն ՀՀ դրամ՝ որպես բարոյական վնասի փոխհատուցում»։

Մինչ դատարան դիմելը  Իոանիսյանից հերքում չի պահանջվել, որովհետեւ գտել են, որ միակ արդյունավետ միջոցն այս պարագայում դատարանն է. «Ակնհայտ է, որ Իոաննիսյանը շարունակում է իր այդ վարքագիծը՝ ակնհայտ կեղծ տեղեկություններ տարածելով, եւ այս պարագայում արդյունավետ միջոցը միայն դատարանն է»։

«Փաստինֆո»-ի այն հարցին, թե որն է Իոաննիսյանի շահագրգռվածությունը՝  փաստաբանը տեղյակ չէ, սակայն պնդում է՝ այն պահից, երբ նա պարզեց, որ իր կողմից հայտնած տեեկությունները չեն համապատասխանում իրականությանը, պետք է դադարեցներ իր այդ վարքագիծը. «Եթե նույնիսկ սկզբնական փուլում չէր իմացել՝ դրանք ճշմարտացի են թե ոչ, թեեւ մարդը մինչ չճշտի տեղեկության ճշմարտացիությունը, իրավունք չունի դրանք տարածելու, այդուահանդերձ, առնվազն իմանալուց հետո պետք է դադարեցներ, իսկ հիմա նա շատ տարօրինակ վարքագիծ է դրսեւորում, եւ այդ պարզաբանումներից հետո էլ շարունակում է նույն տեղեկությունները տարածել»։

Հիշեցնենք, որ  մայիսի 24-ին թեմայի վերաբերյալ պարզաբանում ներկայացրեց նաեւ ԱԱԾ տնօրեն Արթուր Վանեցյանը, ով, անդրադառնալով Բաբկեն Ղազարյանի քրեական հեղինակություն հանդիսանալու և ԱԱԾ-ի հետ համագործակցության մասին Իոաննիսյանի պնդումներին, նշեց, որ Բաբկեն Ղազարյանը ՊԵԿ-ի մաքսային ծառայության գնդապետ է, աշխատել է նաև Էրեբունի վարչական շրջանի ղեկավարի տեղակալ, և իրենց միջեւ շփումը եղել է ի պաշտոնե: Վանեցյանի հայտարարությունից հետո՝ մայիսի 25-ին, Իոաննիսյանը կրկին նույնաբովանդակ տեսակետներ հնչեցրեց։

Մայիսի 30-ին Իոաննիսյանին արձագանքեց Բաբկեն Ղազարյանը։ «Հաշվի առնելով իմ անցած աշխատանքային ուղին և ձեռքբերումները, մտավախություն ունենալով, որ չփաստարկված տեղեկությունների, պարզապես հերյուրանքների տարածումը ԶԼՄ-ներով և դրանք անարձագանք թողնելը կարող են հանիրավի ստվեր նետել իմ պատվի և արժանապատվության վրա, հարկ եմ համարում հիշեցնել հասարակության լայն զանգվածներին, որ Իոաննիսյանը հստակ նպատակադրումով պախարակելու գործընթաց է սկսել՝ ինչպես իմ, այնպես էլ ԱԱԾ տնօրենի անձի և գործունեության նկատմամբ: Այսինքն՝ փորձ է արվում, անտեսելով պետական կառավարման համակարգում իմ աշխատանքային երկարամյա գործունեությունը, ստվեր նետել իմ անձի վրա: Հետևաբար անհրաժեշտ եմ համարում հասարակությանը ևս մեկ անգամ հիշեցնել, որ ես ոչ թե քրեական հեղինակություն եմ, ինչպես հայտարարում է Իոաննիսյանը, այլ  Բաբկեն Ղազարյանը, ով ՀՀ պետական եկամուտների կոմիտեում երկարամյա արդյունավետ գործունեություն է իրականացրել՝ նպաստելով մաքսային բարեփոխումներին նպատակաուղղված բազմաթիվ հաջողված միջոցառումների իրականացմանը, որոնց արդյունքում էապես բարելավվել են մաքսային ընթացակարգերը՝ դառնալով արագ, արդյունավետ ու որակյալ: Ավարտել եմ ԵՊՀ իրավաբանական ֆակուլտետը՝ ստանալով իրավաբանի որակավորում, գերազանցությամբ ավարտել եմ նաև Ռուսաստանի մաքսային ակադեմիան՝ կատարելագործելով մաքսային ոլորտում գիտելիքներս ու փորձառությունս: Գերազանց և բարեխիղճ ծառայության համար ինձ շնորհվել է մաքսային ծառայության գնդապետի հատուկ կոչում, պարգևատրվել եմ նաև հուշամեդալներով: Իմ գործունեությամբ հասարակության կողմից մշտապես ընկալվել եմ որպես պատշաճ վարքագիծ ունեցող, օրինապահ քաղաքացի:

Եվս մեկ անգամ փաստում եմ, որ Դանիել Իոաննիսյանի կողմից իմ անձի վերաբերյալ արված հայտարարությունները զրպարտություն են, չեն համապատասխանում իրականությանը և ակնհայտորեն միտված են ինձ վարկաբեկելուն, ուստի դիմել եմ դատարան՝ զրպարտություն համարվող տեղեկությունները հերքելու նպատակով»,- նշված է հայտարարության մեջ:

Հեղինակ` Միլենա Խաչիկյան