Փաստ ինֆո

Կարծում եմ՝ բոլորի համար են սպասելի նման տեսակ որոշումները։ Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի պաշտպանական թիմի անդամ, փաստաբան Արամ Վարդեւանյանը՝ անդրադառնալով դատախազ Կարեն Բիշարյանին բացարկ ներկայացնելու իրենց միջնորդությանը։

Ավելի վաղ հայտնել ենք, որ դատարանն այսօր մերժել է դատախազ Կարեն Բիշարյանին բացարկ հայտնելու միջնորդությունը։ Իսկ բացարկի պատճառը դատախազի ավելի վաղ հայտնած դիրքորոշումն էր «Մարտի 1»-ի քրեական գործի վերաբերյալ։ ՀՀ երկրորդ նախագահ Ռոբերտ Քոչարյանի փաստաբան Հովհաննես Խուդոյանը խոսքով՝ դեռեւս 2018 թվականի փետրվարի 23-ին խորհրդարանում 2008 թվականի մարտի 1-ի իրադարձությունների վերաբերյալ քննարկումների ժամանակ Բիշարյանը հիմքեր չի տեսել Քոչարյանին անգամ որպես վկա հարցաքննելու համար։ «Հետագայում դատախազը հանկարծ ձերբակալության հիմքեր տեսավ։ Թեեւ հանգամանքները, որոնք հիմք են հանդիսացել մեղադրանքի համար, հայտնի էին նաեւ նախկինում՝ դա 0038 հրամանն է, ԱԴ մտցնելը։ Եվ անգամ բարձրացվել է ԶՈւ ներգրավման հարցը։ Սա վկայում է դատախազի սուբյեկտիվ վերաբերմունքի մասին՝ քաղաքական իրավիճակի փոխվելու հետեւանքով»,- ասել է փաստաբանը։

Արամ Վարդեւանյանը նկատեց, որ դատավոր աննա Դանիբեկյանը բոլոր միջնորդությունները մերժում է։ «Այս փուլը կոչվում է միջնորդությունների փուլ. դատավարության իմաստներից մեկը նաեւ այն է, որ այս փուլում հնարավոր բոլոր տեսակ միջնորդությունները քննարկվում են, ընթացք եւ լուծումներ են ստանում, տվյալ պարագայում Դանիբեկյանի նախագահությամբ առավելապես մերժվում են, բայց ամեն դեպքում գործընթացն ինքնին պահանջում է որոշակի հարցերի պարզում։ Եթե կա դատախազ, որը բացարկի ենթակա է, դրա չբարձաձայնումը ինքնին օրենքով ստեղծված դատարան կոնցեպտի խախտում է լինելու, այսինքն դա անել հնարավոր չէ, իսկ պաշտպանական կողմն առհասարակ ունի պարտականություն նման հարցեր բարձրաձայնելու»,– ասաց Վարդեւանյանը։

Մանրամասները՝ տեսանյութում