Փաստ ինֆո

ԿԳՄՍ նախարար Արայիկ Հարությունյանն ասել էր, որ «Մել» ֆիլմը ֆինանսավորելու որոշումն ընդունվել է ՀՀԿ-ի օրոք։ Շատ վատ է եղել, որ ընդունվել է ՀՀԿ-ի օրոք։ Հիմա դուք ունեք բոլոր լեգիտիմ իրավունքներն այդ որոշումը չեղյալ համարելու։ Այս մասին ֆեյսբուքյան ուղիղ եթերի ժամանակ ասաց «Արմենիա» հեռուստաընկերության նախկին գլխավոր պրոդյուսեր Ռուբեն Մխիթարյանը՝ անդրադառնալով Մելինե Դալուզյանի մասին պատմող ֆիլմի ֆինանսավորմանը։

«Այդ որոշումը բացարձակապես կապ չունի ՀՀ սահմանադրությանը հղում անելու հետ, բացարձակապես կապ չունի Ազգային ժողովի հերթական նիստ հրավիրելու հետ։ Այդ որոշումը դուք կարող եք բեկանել, միայն ցանկություն է պետք։ Կամ այդ 20 մլն դրամն ուղղել, տալ այլ պրոդյուսերական թիմի»,-ասաց Ռուբեն Մխիթարյանը՝ վստահեցնելով, որ 20 մլն դրամով կարելի է ՀՀ 20 չեմպիոնի մասին փաստավավերագրական ֆիլմ նկարել։

Ռուբեն Մխիթարյանը հորդորեց ՀՀ վարչապետ Նիկոլ Փաշինյանին վերանայել այդ որոշումը։ Ինչ վերաբերում է Արայիկ Հարությունյանին, պրոդյուսերը նկատեց. «Անկախ նրանից, որ նա ձեր ամենահավատարիմ կուսակցական ընկերներից է, ամենահավատարիմ գաղափարային ընկերներից է, այդ նախարարը խորապես տապալվել է։ Արայիկ Հարությունյանն ինքն իրեն չի արդարացնում»,-նշեց Ռուբեն Մխիթարյանը։

Մանրամասները՝ տեսանյութում