Փաստ ինֆո

«Մինչ նիստին ներկայանալը ինձ է զանգահարել Գեւորգ Մանուկյան անունով անձնավորություն, ով նաեւ ինձ ուղարկել է որոշ փաստաթղթեր, ինչից պարզվել է, որ Դուք եք ժամանակին իրականացրել նրա ներկայացրած վերաքննիչ բողոքի քննությունը»,-այս մասին դատարանի դահլիճում հայտարարեց Մարտի 1-ի գործով տուժողի ներկայացուցիչ Սեդա Սաֆարյանը՝ նախագահող դատավոր Արմեն Դանիելյանին ինքնաբացարկի միջնորդություն ներկայացնելիս։

Նրա խոսքով՝ «Մարտի 1»-ի գործով Մանուկյանը մեղադրվել է ՀՀ քրեական օրենսգքրի 225-րդ հոդվածով նախատեսված արարքի կատարման մեջ, որը ՀՔԾ կողմից նախատեսված հաջորդ հոդվածն էր, որ մասսայաբար վերագրվեց շատերին՝ առանց փաստական եւ իրավական հիմքեր ունենալու. «Եվ դատարանը չկարողացավ մեկուսանալ բոլոր այն մարմիններից, որոնք արհեստականորեն սարքեցին մարտի 1-ը եւ դատարանի օժանդակությամբ ազատվեցին անցանկալի, ըմբոստ, ընդդիմադիր անձանցից՝ կայացնելով քաղաքական որոշումներ եւ հեռանալով դատական իշխանություն իրականացնելուց»։

Սեդա Սաֆարյանը հայտարարեց, որ Գեւորգ Մանուկյանն այժմ հացադուլ է հայտարարել. «Մանուկյանը մարտի 1-ին գլխի շրջանում վնասվածք է ստացել, վնասվել է աչքը, ներկայումս ունի ծանր առողջական վիճակ, քաղաքական հետապնդումների պատճառով գտնվում է Ստրասբուրգում եւ իմանալով, որ ձեր կողմից պետք է իրականացվի վերաքննիչ բողոքի լսումները, հացադուլ է հայտարարել Եվրոպական դատարանի մոտ»։

Սաֆարյանը նշեց, որ Գեւորգ Մանուկյանը իրեն խնդրել է դատավորին ներկայացնել իր գործով կայացված դատական ակտը.  «Մանուկյանն ինձ խնդրել է, որ ներկայացնեմ ձեր կողմից կայացված անարդար դատական ակտի օրինակը՝ հիմնավոր կասկածի տակ դնելով ձեր՝ որպես դատավորի անաչառությունը»։

Հիշեցնենք, որ դատավոր Արմեն Դանիելյանին ինքնաբացարկի միջնորդություն են ներկայացրել թե տուժող, թե պաշտպանական կողմը, ընդ որում, Արամ Օրբելյանի ներկայացրած միջնորդություն հետո ինքնաբացարկի միջնորդությամբ հանդես եկավ նաեւ Ռոբերտ Քոչարյանի ֆրանսիացի փաստաբան Սեւակ Թորոսյանը։

Սեդա Սաֆարյանի ելույթը՝ տեսանյութում