Փաստ ինֆո

ՀՀ դատական դեպարտամենտի նախկին ղեկավար Միսակ Մարտիրոսյանի և մյուսների գործով այսօրվա դատական նիստը տեղի չունեցավ՝ դատավարության մի շարք մասնակից պաշտպանների բացակայության պատճառով:

Հանրային պաշտպան Սիրանուշ Հարությունյանը խնդրել էր հետաձգել դատական նիստը, քանի որ մեկ այլ քրեական գործի շրջանակում մասնակցում է անհետաձգելի քննչական գործողության: Աշխատանքային այլ ծանրաբեռնվածություն ուներ նաև պաշտպան Տիգրան Աթանեսյանը: Դատական նիստին չէր ներկայացել նաև պաշտպան Գիվի Հովհաննիսյանը:

Ի դեպ, «աշխատանքային ծանրաբեռնվածության» պատճառով դատական նիստին չէր  ներկայացել նաև «Դատական դեպարտամենտ» պետական կառավարչական  հիմնարկի ներկայացուցիչ Մանվել Շահվերդյանը, ով, սակայն, խնդրել էր դատական նիստն անցկացնել իր բացակայությամբ:

Սույն գործով առաջին դատական նիստում փոփոխություններ տեղի ունեցան պաշտպանական կողմի կազմում. Միսակ Մարտիրոսյանը հրաժարվեց իր երեք պաշտպաններից երկուսի՝ Վարդան Զուռնաչյանի ու Սեդա Սաֆարյանի ծառայություններից: Ամբաստանյալի շահերը կպաշտպանի բացառապես փաստաբան Արթուր Գրիգորյանը:

Գործում ներգրավվեցին  երկու նոր պաշտպաններ. ամբաստանյալ Արմեն Ավագյանը հրաժարվել է իր պաշտպան Արտավազդ Փարսադանյանի ծառայություններից և խնդրել իրեն հանրային պաշտպան տրամադրել, եւ դատական նիստին ներկայացել էր հանրային պաշտպան Գարիկ Մալխասյանը:

Որպես ամբաստանյալ Մերուժան Կյուրեղյանի պաշտպան՝ գործում ներգրավվեց փաստաբան Արայիկ Պապիկյանը: Երկու պաշտպանները 20 աշխատանքային  օր խնդրեցին 45 հատոր կազմող գործի նյութերին ծանոթանալու համար: Դատարանը դատական նիստը հետաձգեց մինչև սեպտեմբերի 11-ը:  

Ըստ մեղադրական եզրակացության՝ դատական կարգադրիչների ծառայության պետ Արմեն  Մովսիսյանը պաշտոնեական դիրքն օգտագործելով, յուրացման եղանակով  ՀՀ պետական բյուջեից որպես դատական կարգադրիչների աշխատավարձ և դրամական այլ բավարարումներ փոխանցված առանձնապես խոշոր չափերի գումարները հափշտակելու նպատակով «ՀՀ Դատական դեպարտամենտ» ՊԿ հիմնարկի ղեկավար Միսակ Մարտիրոսյանի համաձայնությամբ և թողտվությամբ, նույն ծառայության պետի տեղակալ Գեղամ Գրիգորյանի հետ ստեղծել են կազմակերպված խումբ, որում  ընդգրկել են  դատական կարգադրիչների ծառայության պետի մյուս տեղակալ Գագիկ Խաչատրյանին, վերահսկողության բաժնի պետ Եղիազար Սարգսյանին, ֆինանսաբյուջետային բաժնի պետ - գլխավոր հաշվապահ Սաթենիկ Հովհաննիսյանին, անձնակազմի կառավարման բաժնի պետ Նարեկ Գասպարյանին, Լոռու մարզի ընդհանուր իրավասության առաջին ատյանի դատարանի դատական կարգադրիչների ծառայության ստորաբաժանման պետ Մերուժան Կյուրեղյանին, Երևանի Ավան և Նոր-Նորք վարչական շրջանների ընդհանուր իրավասության առաջին ատյանի դատարանի դատական կարգադրիչների ծառայության ստորաբաժանման պետ Բագրատ Արիկյանցին, ՀՀ վերաքննիչ քրեական դատարանի դատական կարգադրիչների ծառայության ստորաբաժանման պետ Արման Փալիկյանին, Կենտրոնական մարմնի ստորաբաժանման պետ Արմեն Ավագյանին և պահեստապետ Յուրա Մուշկիդյանովին, կատարել խմբի անդամների դերաբաշխում:

Արդյունքում՝  տևական ժամանակ՝ 2009 թվականի օգոստոսից մինչև 2013 թվականի օգոստոսն ընկած ժամանակահատվածում, հավաքագրել ու դատական կարգադրիչի պաշտոնում նշանակելու համար անձնակազմի կառավարման բաժին են ներկայացրել թվով 84 անձանց վերաբերյալ փաստաթղթեր, դրանց  հիման վրա նախապատրաստվել և Արմեն Մովսիսյանի ստորագրմանն է ներկայացվել այդ  անձանց ծառայության անցնելու վերաբերյալ հրամանները, ապա հրամանագրումից հետո նշված անձանց անվամբ ստացվել են բանկային քարտեր:

Մտահղացման համաձայն՝ ՀՀ պետական բյուջեից որպես աշխատավարձ և դրամական այլ բավարարումներ փոխանցված գումարներից 2009 թվականի հուլիսից մինչև 2013 թվականի օգոստոսն ընկած ժամանակահատվածում հաշվարկվել և ծառայությունից ազատված անձանց բանկային քարտերին է փոխանցվել իրենց վստահությանը` դատական կարգադրիչների ծառայությանը հանձնված առանձնապես խոշոր չափերի` ընդհանուր 115.782.033 ՀՀ դրամ գումար, որը նույն ժամանակահատվածում բանկային քարտերի միջոցով, հիմնականում Գեղամ Գրիգորյանի կողմից կանխիկացվել և շարունակաբար յուրացման եղանակով հափշտակվել է կազմակերպված խմբի անդամների կողմից:

«Արդյունքում՝ Արմեն Մովսիսյանը յուրաքանչյուր ամիս Գեղամ Գրիգորյանի կողմից բանկային քարտերի միջոցով կանխիկացված գումարներից վերջինիս և Միսակ Մարտիրոսյանին է փոխանցել հափշտակված գումարներից նրանց մասնաբաժինները»: