Փաստ ինֆո

ՀՀ քրեական օրենսգրքի 5 հոդվածներով, այդ թվում՝ ավազակության ու բռնաբարության մեջ մեղադրվող ոստիկան Էդգար Վարագյանի փաստաբաններ Աննա Թամազյանն ու Երվանդ Վարոսյանը բողոք են ներկայացրել դատարան: Նրանք պահանջում են վերացնել  ՀՀ հատուկ քննչական ծառայությունում  Է.Վարագյանին ծեծի ենթարկելու վերաբերյալ գործը կարճելու քննիչի որոշումը և դրա դեմ Է.Վարագյանի բողոքը մերժելու դատախազի որոշումը, պարտավորեցնել քրեական գործ հարուցել:

Գործը հարուցվել էր ՀՀ ոստիկանության Կենտրոնական բաժնի և ՔԳՎ  Կենտրոնականի քննչական  բաժնի  առանձին պաշտոնատար անձանց  կողմից  բռնությամբ զուգորդված  պաշտոնեական  լիազորությունների  անցում կատարելու  հատկանիշներով՝   Էդգար Վարագյանին ծեծի ենթարկելու և  մարմնական վնասվածքներ պատճառելու առթիվ: Ըստ ՀՔԾ որոշման,  ոստիկանության աշխատակիցներ Արթուր Մկրտչյանի, Ամրամ Մակինյանի, Արգիշտի Տոնոյանի, Արման Մացակյանի, Գարիկ Մակարյանի և Կարեն Ավետիսյանի արարքում հանցակազմը բացակայում է:  Նույն հիմքով ՀՔԾ-ն քրեական հետապնդում չի իրականացրել  ամբաստանյալի ու նրա ծնողների  նկատմամբ՝ «ակնհայտ սուտ  մատնություն կատարելու և սուտ ցուցմունք տալու կապակցությամբ»:

Էդգար Վարագյանը նախաքննության ընթացքում ցուցմունք էր  տվել, որ «Նուբարաշեն» քրեակատարողական  հիմնարկ ընդունվելու ժամանակ մարմնի վրա հայտնաբերված մարմնական վնասվածքներն ստացել է 2013թ.  սեպտեմբերի 24-26-ն ընկած ժամանակահատվածում՝ ՀՀ ոստիկանության  Կենտրոնական բաժնի  աշխատակիցների կողմից ծեծի և բռնության ենթարկվելու հետևանքով: Ըստ  Է.Վարագյանի,  ձախ ձեռքի և ոտքի  վնասվածքներն ստացել է 2013 սեպտեմբերի 24-ին ոստիկանության Երևանի  վարչության Կենտրոնական բաժնի Մարաշի բաժանմունքի պետ Արթուր Մկրտչյանի և ՔԳՎ Կենտրոնականի քննչական բաժնի պետ Ամրամ Մակինյանի կողմից ծեծի ենթարկվելու հետևանքով,  իսկ 2013թ. սեպտեմբերի  26-ին ի հայտ եկած վնասվածքները  իրեն դատարան ուղեկցած  ոստիկանների կողմից ծեծի ենթարկվելու, իսկ դաստակների կարմրավուն հետքերը ձեռքերին ձեռնաշղթաներ գցելու հետևանք են:

Քննչական մարմինը, սակայն, գտել էր, որ  բացի Էդգար Վարագյանի ու նրա ծնողների ցուցմունքներից հիմնավորող այլ ապացույց ձեռք չի բերվել  և սպառվել են այդպիսիք ձեռք բերելու հնարավորությունները:

Է.Վարագյանի փաստաբանները դատարանում նշեցին, որ գործը հարուցվել է դեպքից երկու ամիս անց, իսկ  Է.Վարագյանի դատաբժշկական  փորձաքննությունը կատարվել է դեպքից երեք ամիս անց:  Ե.Վարոսյանը նշեց, որ ՀՔԾ-ի կողմից քննությունն անցկացվել է Մարդու իրավունքների եվրոպական դատարանի սահմանած մի շարք չափորոշիչների՝ մասնավորապես անհապաղ քննություն կատարելու պահանջի խախտմամբ: Ւսկ քննության անկախությունը խախտվել է, քանի որ նախապատրաստված նյութերը գտնվել են ոստիկանությունում այն դեպքում, որ ոստիկանները գործով  կողմ են: Խախտվել է նաև քննության ամբողջականությունը՝ դիմող կողմի կարծիքով, նախաքննական մարմնի կողմից չեն կատարվել բոլոր հնարավոր քննչական ու դատավարական գործողությունները: Մասնավորապես,  չեն զննվել Վարագյանի հայտարարությամբ իրեն ծեծի ենթարկելու վայրերը, մասնավորապես, չեն կատարվել մատնահետքերի,  միկրոմասնիկային փորձաքննություններ: Ավելորդ է խոսել քննության օբյեկտիվության մասին, գտնում են փաստաբանները, երբ արժանահավատ են համարվել  միայն  ոստիկանների՝ ենթադրաբար խոշտանգումներ կատարած  անձանց ու նրանց ենթակաների,  ժխտողական ցուցմունքները, իսկ հակառակ կողմի փաստարկները համարվել  են  ոչ արժանահավատ:

ՀՔԾ քննիչը, հակառակը, գտնում է, որ բողոքն անհիմն է ու ենթակա է մերժման, ըստ քննիչի,  իրենք կատարել են բոլոր քննչական գործողությունները, որոնք հնարավոր էր կատարել,  որոշումն էլ կայացվել է գործով ձեռք բերված բոլոր ապացույցների գնահատման արդյունքում:  Ըստ նրա,   Վարագյանին բերման ենթարկելու հաջորդ իսկ օրը նշանակվել է դատաբժշկական փորձաքննություն, իսկ  ոստիկանների կողմից Վարագյանի համազգեստը պատռելու, ուսադիրները պոկելու մասին վերջինիս հայտարարությունը հերքվում է ոստիկանության լրատվության ու հասարակայնության հետ կապերի վարչության կողմից  կատարված նկարահանումներով՝  այն կատարվել է  «4 կողմից»՝  Վարագյանի մատնանշած դեպքից հետո, և որևէ պատռվածք կամ նորոգման հետքեր  հագուստի վրա չկան, տեղում են նաև ուսադիրները: Քննիչը Վարագյանի ձեռքի վնասվածքի վերաբերյալ նշեց, որ  բուն ավազակության գործով, որով մեղադրվում է Վարագյանը,  տուժողը հայտնել է, որ    «ավազակի ձեռքի վրա եղել է արյունահոսող վերք»:  Քննիչը հայտնեց նաև, որ քրեական գործ հարուցելու ուշացման պատճառը, մասնավորապես, այն էր, որ Վարագյանը սկզբնապես ասում էր, որ վնասվածքները ընկնելու հետևանք են:

Ըստ փաստաբանների, հակափաստարկներն առ այն, որ Էդգար Վարագյանը վնասվածքներ ստացել է կալանավորելու վերաբերյալ դատական նիստի ընթացքում գլուխն ու ձեռքերը սեղանին հարվածելու, այսինքն՝ ինքնավնասելու հետևանքով, հակասում է նիստի ձայնագրությանը՝   հարվածների որևէ ձայնային արձագանք չկա: Փոխարենը հստակ լսվում է, թե ինչպես է Վարագյանը հեծկլտալով ջուր ու գլխացավի դեղ խնդրում և հայտարարում ՝ «4 օր ինձ սոված են պահում», իսկ դատարանն էլ, ըստ դիմող կողմի, հումանիստական վերաբերմունք չի դրսևորում՝ խոստանալով կատարել Վարագյանի խնդրանքները նիստից հետո:

Դիմող կողմի միջնորդությամբ, այսօրվա դատական նիստը հետաձգվեց՝  մինչ հաջորդ դատական նիստը կողմը հնարավորություն կունենա  ծանոթանալ գործի նյութերին, որոնք ժամանակին չեն տրամադրվել:  Քննիչի պատճառաբանությամբ, Ա.Թամազյանը գործի շրջանակում ոչ թե պաշտպան է, այլ փաստաբան, ուստի չկա նրան գործի նյութեր տրամադրելու օրենքով նախատեսված ընթացակարգ: Նախագահող դատավոր Գագիկ Պողոսյանը նկատեց, որ անիմաստ է դառնում այս իրավունքը սահմանափակելը, միևնույն է, փաստաբանը կարող է դիմել դատարան, պահանջել ու ստանալ դրանք: