Փաստ ինֆո

Ազգային ժողովի մշտական հանձնաժողովների համատեղ նիստում քիչ առաջ մեկնարկեց «Հայաստանի Հանրապետության 2013թ. պետական բյուջեի մասին» օրենքի նախագծով սոցիալական ապահովության, նպաստների, թոշակների ֆինանսավորման հարցի քննարկումը:

Ըստ նախագծի, գալիք տարի սոցիալական ոլորտի ծախսերը կկազմեն 303, 2 մլրդ դրամ, ինչը 2012 թ.-ի պետական բյուջեով հաստատվածից պակաս է 4,1 մլրդ դրամով:

Մասնավորապես, «Աշխատանքային կենսաթոշակներ» ծրագրով նախատեսվում է 167,5 մլրդ դրամի չափով ծախս` 2012 թ.-ի 169,1 մլրդ դրամի դիմաց: Ծախսերի նվազումը պայմանավորված է կենսաթոշակառուների թվաքանակի 4 117-ով նվազմամբ: 2012 թ.-ին կենսաթոշակառուների թվաքանակն եղել է 449 355:

Աշխատանքային հիմնական կենսաթոշակի չափը կպահպանվի 13 000 դրամ և աշխատանքային ստաժի մեկ տարվա արժեքը` 450 դրամ: Արդյունքում` աշխատանքային կենսաթոշակի միջին ամսական չափը կկազմի 31 345,8 դրամ` 2012 թ.-ի 31 254,5 դրամի դիմաց:

Շարքային զինծառայողների և նրանց ընտանիքների անդամների միջին ամսական կենսաթոշակի չափը 2013թ.-ին կկազմի 16 357,4 դրամ` 2012 թ.-ի 16 513,1 դրամի դիմաց, սոցիալական կենսաթոշակի միջին ամսական չափը` 16 221 դրամ` 2012 թ.-ի 16 226,1 դրամի դիմաց:

Դատավորի կենսաթոշակի միջին ամսական չափը կկազմի 431 998,6 դրամ` 2012 թ-ի 434 363,3 դրամի դիմաց:

2013 թ.-ին կառավարությունը գործազրկության նպաստի ծրագրի ծախսերը հաշվարկելիս հիմնվել է գործազուրկների թվաքանակի նվազման կանխատեսումների վրա: Այսպես` 2013թ.-ին գործազուրկների թվաքանակը նախատեսվել է 16 617` 2012 թ.-ի 20 850-ի փոխարեն: Գործազրկության նպաստի ամսական չափը կպահպանվի 18 հազար դրամի, թաղման նպաստի չափը` 200 հազար դրամի, մինչև 2 տարեկան երեխայի խնամքի նպաստի ամսական չափը՝ 18 հազար դրամի մակարդակում: Ընտանեկան նպաստի միջին ամսական չափը կկազմի 29 537,8 դրամ:

Պետական հիմնարկների և կազմակերպությունների աշխատողների սոցիալական փաթեթով ապահովման ծրագրի ծախսը 2013թ.-ին կազմում է 19,5 մլրդ` 2012 թ.-ի 18 մլրդ դրամի դիմաց: Ծախսերի շուրջ 1,5 մլրդ դրամի չափով աճը պայմանավորված է շահառուների թվաքանակի ընդլայնմամբ. 2013 թ.-ին կանխատեսվում է շուրջ 148 000 մարդ` 2012 թ.-ի 117 200 մարդու դիմաց:

«Հայաստանի զոհված Ազգային հերոսի կամ Մարտական խաչ շքանշանով հետմահու պարգևատրված անձի ընտանիքներին նպաստ» ծրագրի շրջանակներում նախատեսվում է նպաստ տրամադրել 98 մարդու: Հայաստանի ազգային հերոսի ընտանիքին տրվող նպաստի չափը 250 հազար դրամ է, Առաջին աստիճանի Մարտական խաչ շքանշանով հետմահու պարգևատրված անձի ընտանիքինը` 150 հազար դրամ, Երկրորդ աստիճանի Մարտական խաչ շքանշանով հետմահու պարգևատրված անձի ընտանիքինը` 100 հազար դրամ:

«ՎՏԲ-Հայաստան» ՓԲԸ-ում ավանդատու հանդիսացող քաղաքացիների, որպես նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թ.-ի հունիսի 10-ը ներդրված դրամական ավանդների դիմաց փոխհատուցում» ծրագրով կծախսվի 2012 թ.-ի համար նախատեսված չափով` 1,7 մլրդ դրամ: