Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, ընթանում է Ազատի զինվորական կացարանում 15 զինծառայողի կյանք խլած հրդեհի գործով դատական նիստը՝ լարված մթոնոլորտում։

Նիստի ընթացքում մեղադրյալ Եղիշե Հակոբյանը միջնորդություն է ներկայացրել դատարան՝ խնդրելով դատարանին թույլատրել՝ հանդիպում ունենալ տուժողների ներկայացուցիչ Նորայր Նորիկյանի հետ՝ գործի հանգամանքների հետ կապված։ Եղիշե Հակոբյանը, որը նախորդ նիստին խնդրել էր թույլ չտալ նկարահանում իրականացնել՝ իր պնդմամբ՝ տուժող զինծառայողներին հարգելով, որովհետև խոսելու էր նրանց ալկոհոլ և թմրանյութ օգտագործելու մասին, բայց հարցազրույցներում բոլորովին այլ տեսանկյունից են ներկայացրել, տուժողներից մեկը հարցազրույցում հայտարարել էր, թե «Եղոն նարկոշ» է, իր թմրանյութ օգտագործելու մասին էին խոսում, դրա համար էլ խնդրել էր նկարահանում չիրականացնել, ուստի, այժմ ինքը ուղիղ հեռարձակումով է հայտարարություններ անելու։ Հակոբյանն անդրադարձավ նաև դասակի նախկին հրամանատար Տիգրան Մանասերյանի ցուցմունքին։

«Պարզ էր և հասկանալի էր բոլորին, որ միջնորդավորված եկել կանգնել է այստեղ, ինչ-որ ապուշություն է դուրս տալիս։ Այդ անձի պարզ նկարագիրը տաս՝ զինծառայողները բռնում ծեծում են, խզակոթին տալիս են, մի քանի անգամ նման դեպք է եղել, մարդուն խղճում, տանում ենք մեր տունը պահում ենք, ուզում ենք մի քիչ բացատրել, հասկացնել, թե ինչպես պետք է վարվի ծառայության մեջ, ինչպես ծառայություն իրականացնել, բայց մարդը գալիս այստեղ կանգնում է, վարկաբեկում է։ Հասկանում եմ, որ միջնորդել են մարդուն կամ հանդիպել, ինչ-որ բան են ասել։ Կամ էլ ծնողներին գնացել տեսել է։ Իր խոսելուց շատ լավ հասկացա, որ ինքը գնացել առաջին հերթին տեսել է ծնողին, ասել ինչ-որ բան ու էլ հետ չի կարող կանգնել»,- հայտարարեց Հակոբյանը։
Միևնույն ժամանակ, Եղիշե Հակոբյանը միջնորդություն ներկայացրեց՝ խնդրելով դատարանին՝ թույլատրել առանձին հանդիպում ունենալ տուժողների իրավահաջորդների ներկայացուցիչ Նորայր Նորիկյանի հետ՝ գործի հանգամանքների հետ կապված տեղեկություններ հայտնելու, որը չի ցանկանում հիմա հայտնել։ Եղիշե Հակոբյանն ահազանգեց, որ իր իրավունքները պաշտպանված չեն, ոչ մի իրավունք չի պաշտպանվում, դրա համար էլ՝ չի հասկանում ինչ է կատարվում։

Նա նշեց, որ մինչև Նորիկյանի հետ չխոսի՝ ինքը համաձայն չէ, որ լրատվամիջոցներն ընդհանրապես լուսաբանեն։ Նորայր Նորիկյանի հետ առանձնազրույց ունենալու հարցը Եղիշե Հակոբյանը քննարկել է իր փաստաբանի՝ Հովսեփ Սարգսյանի հետ, հանրային պաշտպանը տեղեկացված չի եղել։ Հանրային մեղադրողները և տուժող կողմը չառարկեցին։ Մեղադրողը նշեց՝ տուժող կողմի և մեղադրյալի դիալոգը քրեական դատավարությամբ արգելված չէ, բայց հարց է առաջանում, որ եթե խոսելու են դեպքի հետ կապված, ապա ինքը հորդորում է, որ դա բարձրաձայնել դատաքննության ընթացքում։ Փաստաբան Նորայր Նորիկյանն էլ պատրաստակամություն հայտնեց հանդիպելու, միևնույն ժամանակ ինքն իր անունից խոստացավ, երաշխավորեց՝ Եղիշե Հակոբյանի որևէ իրավունք իր կողմից չի կարող խախտվել։ Դատարանը թույլատրեց տուժողի ներկայացուցչին և Հակոբյանին հանդիպել և առանձնազրույց ունենալ, հանդիպումը կլինի ՔԿՀ-ում՝ փաստաբան Հովսեփ Սարգսյանի ներկայությամբ, որն առողջական խնդիրների պատճառով չի կարող ներկա լինել դատական նիստերին։ Հրդեհի հետևանքով մահացած զինծառայողներից մեկի հայրը՝ Կիրակոսյանը, որն էլ նախորդ նիստից հետո ԶԼՄ-ների հետ որոշակի հայտարարություններ է արել, ըստ Հակոբյանի՝ խեղաթյուրելով, անդրադարձավ Եղիշե Հակոբյանի հայտարարությանը՝ նշելով․ «Ձենդ կտրի։ Բանը անելուց առաջ, բոլորի մասին էլ հետաքրքրվել եմ, թող քո մասին ուրիշ բան ասեին։ Մյուսներն աչքիս լույսը չեն։ Կանգնել ասում ես՝ երեխուս սպանողը ես եմ, ե՞ս եմ այ տղա, ե՞ս եմ արա, որ երեխա եմ տվել բանակին»։ Իրավիճակը լարվեց, Եղիշե Հակոբյանի և Կիրակոսյանի միջև վիճաբանություն սկսեց, կարգադրիչները դժվարությամբ հեռացրին Կիրակոսյանին՝ նիստերի դահլիճից։

Հիշեցնենք, որ ողբերգական դեպքը տեղի է ունեցել հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո