Փաստ ինֆո

Ենթադրյալ կիբերհարձակման պատճառով Թբիլիսիում հասարակական տրանսպորտի վճարային համակարգը ժամանակավորապես անջատվել է։ Ինչպես գրում է «Эхо Кавказа»-ն՝ քաղաքապետարանին հղումով, Վրաստանի մայրաքաղաքի ավտոբուսներում և միկրոավտոբուսներում տեղադրված վճարային սարքերում անսարքություն է հայտնաբերվել։ Այս սարքերը սկսել են նվագարկել աուդիո ձայնագրություններ, այդ թվում՝ Զուրաբ Ժվանիայի ելույթը ԵԽԽՎ նիստում 1999 թվականին՝ «Ես վրացի եմ, նշանակում է՝ ես եվրոպացի եմ» արտահայտությամբ, վրացական օրհներգը, եվրոպամետ հանրահավաքների ցուցարարների կարգախոսները, «Փառք Վրաստանին, Փա՛ռք Ուկրաինային»։ Օգտատերերը հրապարակել են հասարակական տրանսպորտում նկարահանված տեսանյութեր։

«Սարքերի սպասարկումն իրականացնում են Վրաստանի Բանկի կապալառուները՝ MS+ LLC և Azri LLC ընկերությունները։ Նրանց ներկայացուցիչները քայլեր են ձեռնարկում խնդիրները վերացնելու ուղղությամբ։ Սարքերը կմիանան անսարքությունը վերացնելուն պես»,- նշել են քաղաքապետարանից։

Ավելի ուշ վարչությունից հայտնեցին, որ խնդիրը լուծվել է։ Մի քանի ժամ հասարակական տրանսպորտն անվճար սպասարկում էր ուղեւորներին։ Վրաստանի ՆԳՆ-ն հայտնել է, որ հետաքննություն է սկսվել Վրաստանի Քրեական օրենսգրքի 284-րդ հոդվածով։

Աղբյուր` Փաստինֆո