Փաստ ինֆո

«Շիրակի մարզի Աշոցք համայնքի Կոճոռ թաղամասը կառուցվել է 1988-1991 թվականների ընթացքում:

Փայտյա շենքերը համայնքի բնակիչների համար որպես ժամանակավոր կացարան էին ծառայելու, բայց ցավոք սրտի, տարիներ ընթացքում շատերի համար արդեն մշտական բնակության վայր է», - ֆեյսբուքյան էջում գրել է ՀՀ ԱԺ « Հայաստան» խմբակցության պատգամավոր Մհեր Մելքոնյանը։

«Փայտե կացարանների մեծ մասը բնակության համար վաղուց արդեն ոչ պիտանի են և հաճախակի նաև փլուզումներ են լինում։ Թաղամասի շենքերի հիմքերը հիմնականում քայքայված են: Հինական պատճառը կոյուղատարներն են: Դրանք գտնվում են անմխիթար և վթարային վիճակում, որի պատճառով կոյուղաջրերը լցվում են նկուղները:

Վերջերս այցելել էի Աշոցք համայնքի Կոճոռ թաղամաս՝ տեղում ծանոթանալու խնդիրներին։ Թաղամասի բնակիչները շատ դժվարին վիճակում են. փայտե կացարանները հերթով քանդվում են. պատերն անջատվում են,իսկ շատ շենքերում քայլելիս հատակը փլուզվում է:

Պետք է նշեմ, որ փայտյա կացարաններում ապրելն իրոք հերոսություն է։

Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին զեկույցում նշված է, որ մեկնարկել են Աշոցք համայնքի Կոճոռ թաղամասի (20 վթարային փայտյա շենքեր) փոխարեն նոր թաղամասի նախագծման աշխատանքները:
Սրանով ամեն ինչ վերջանում է․․․

Օրերս դիմել եմ ՀՀ-ի Տարածքային կառավարման և ենթակառուցվածքների նախարարին՝ թաղամասի հետագա ճակատագրի վերաբերյալ տեղեկություն ստանալու համար։

Հետևողական եմ լինելու և տվյալ հարցը մշտապես լինելու է իմ ուշադրության կենտրոնում»։

Աղբյուր` Փաստինֆո