Փաստ ինֆո

Երևանի ընդհանուր իրավասության քրեական դատարանում՝ դատավոր Կարեն Ֆարխոյանի նախագահությամբ, այսօր կայացել է Լևոն Քոչարյանի և Սերգեյ Ասատուրովի գործով դատավարությունը, որի ընթացքում շարունակվել է տուժող ոստիկան Հրաչիկ Խաչատրյանի հարցաքննությունը։

Նրա ցուցմունքում կրկին հակասություններ են առկա, նախ՝ նախորդ նիստերին և այսօր վկան պնդում էր, որ զեկուցագիրն ինքը չի գրել, համակարգչով այլ անձ է գրել, ապա՝ ցուցմունքից պարզ դարձավ, թե ինքն է գրել։ Զեկուցագրում նշված է, որ ակնկալում է պետի կարգադրություն, բայց կարգադրություն, ըստ տուժողի, ինքն իբրև չի ստացել, նշում է՝ զեկուցագրի ձևն է այդպիսին, ապա, պաշտպանության կողմին ասաց՝ «Ձեզ հետաքրքրու՞մ է, բացեք նայեք»։ Հարցին՝ ցանկանում է, որ Լևոն Քոչարյանը պատասխանատվության ենթարկվի՝ տուժող ոստիկանը նշեց՝ ոչ մեկին չի ուզում։

Փաստաբան Ալեքսանդր Կոչուբաևը հայտնեց, որ իր փաստաբանական գրասենյակը գտնվում է Սայաթ-Նովա X հասցեում, որտեղ Հրաչիկ Խաչատրյանը պարբերաբար ծառայություն է իրականացնում, մասնավորապես, այնտեղ է գտնվում նաև ՔՊ կուսակցության գրասենյակը, արդյոք այդ կուսակցությունից ցուցում տրվե՞լ է Լևոն Քոչարյանի դեմ բողոք գրել՝ իրեն հարվածելու մասով, Խաչատրյանը նշեց՝ իրեն ոչ ոք ոչինչ չի ասել։ Արամ Վարդևանյանն էլ հետաքրքրվեց՝ տուժողը հետազոտվող տեսանյութի դիտարկվող պահին կամ ավտոմեքենայում գտնվելիս գիտե՞ր, որ իր դիմաց Լևոն Քոչարյանն է, թե՝ իմացել է ոստիկանության բաժանմունքում, ինչին Խաչատրյանը պատասխանեց՝ տեղյակ էր։ Հարցին՝ քրեական վարույթն արդյո՞ք քննարկվել է ՔՊ ներկայացուցիչների հետ, Խաչատրյանը նշեց՝ ոչ, բոլորովին այլ բանի համար է մուտք գործել և դուրս եկել։ Հարցադրումներ հնչեցին նաև Ասատուրովի նկատմամբ բռնության մասին, հարցին՝ արդյոք հիշում է, թե ինչպես է ոտքով հարվածում Ասատուրովին, տուժողը նշեց՝ չի հիշում։ Ասատուրովը ևս արձանագրեց՝ Խաչատրյանը իրարամերժ ցուցմունք է տալիս, կա տեսանյութ, մարդն ասում է՝ չի եղել, արդյո՞ք խնդիրներ կան առողջական, գուցե անհրաժեշտ է նիստերը դռնփակ անցկացնել։ Աստուրովը նույնիսկ ուղիղ հարց տվեց՝ արդյո՞ք հոգեբանական պրոբլեմ ունի, ինչին ի պատախան տուժողն ասաց՝ չունի, հարցին՝ վստա՞հ է, որ չունի՝ տուժողը դրական պատասխանեց։ Աատուրովը նաև հետաքրքրվեց՝ փորձաքննության կգնա՞, սակայն հարցը հանվեց։

Բացի այդ, դատական նիստում բերետավորն ընդունեց, որ ինքը ֆիզիկական ուժ գործադրող է, բանակցություններ վարելու հմտություն չունի, դասընթացի չի մասնակցել։

Հիշեցնենք, որ 2023թ․ սեպտեմբերի 22-ի ոստիկանության ծառայողները դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։ Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։

Հեղինակ՝ Իզաբել Սահակյան

Աղբյուր` Փաստինֆո