Փաստ ինֆո

«ՍիվիլՆեթը» հայցադիմում է ներկայացրել Երևանի ընդհանուր իրավասության քաղաքացիական դատարան՝ ընդդեմ Երևանի քաղաքապետ Տիգրան Ավինյանի։ «Դատալեքս» դատական-տեղեկատվական համակարգի համաձայն՝ լրատվամիջոցը պահանջում է դատարանից՝ պարտավորեցնել Տիգրան Ավինյանին՝ հրապարակային ներողություն խնդրել ԶԼՄ-ից՝ «Ֆակտոր» լրատվականի եթերում արված ՝ «մեդիան մեզ մոտ դառելա մի հատ մեծ աղբանոց» արտահայտության համար։ Հայցը դատարան մուտքագրվել է հունվարի 21-ին և մակագրվել դատավոր Տիգրան Գրիգորյանին։

Նշենք, որ ավելի վաղ Տիգրան Ավինյանն էր ԶԼՄ-ի դեմ հայց ներկայացրել՝ ՝ պահանջելով հրապարակային ներողություն խնդրել, հրապարակայնորեն հերքել զրպարտություն համարվող փաստացի տվյալները, ինչպես նաև՝ փոխհատուցում վճարել՝ 3 մլն ՀՀ դրամի չափով։ Ավինյանը հայցը ներկայացրել է լրատվամիջոցի՝ նոյեմբերի 13-ին հետաքննության առնչությամբ, համաձայն որի՝ 2018-ի հեղափոխությունը «Քաղաքացիական պայմանագիր» կուսակցության անդամներից Տիգրան Ավինյանին հասցրել է քաղաքական իշխանության բարձունքի։ Ավինյանը, որն այդ ժամանակ Երևանի ավագանու ընդդիմադիր խմբակցության անդամ էր, դարձել է ՀՀ փոխվարչապետ։ Նրա քաղաքական կարիերայի աճն ուղեկցվել է ընտանիքի հետ կապված բիզնեսի բարգավաճմամբ, այդ թվում՝ պետական ծրագրերից անուղղակի օգուտներ ստանալու միջոցով։ ՍիվիլՆեթը և OCCRP-ն (Կազմակերպված կոռուպցիայի և հանցավորության լուսաբանման նախագիծ) համատեղ հետաքննությամբ պարզել են, որ այդ ծրագրերը Ավինյանի համակարգման տիրույթում են եղել և դրանց վերաբերյալ քննարկումները համակարգել է հենց փոխվարչապետ Ավինյանը:

Ներկայացված հայցադիմումը Երևանի ընդհանուր իրավասության քաղաքացիական դատարանի դատավոր Արմենուհի Բադիրյանը վերադարձրել էր, քանի որ Ավինյանը հայցադիմումին կից չի վճարել 150,000 ՀՀ դրամ պետական տուրքը՝ պատճառաբանելով, թե մեծ գումար է և հայցին կից ներկայացրել է նաև պետական տուրքի գծով արտոնություն տրամադրելու վերաբերյալ միջնորդությունը, ինչը մերժվել էր։ Ավինյանը հաջորդիվ նոր հայց է ներկայացրել՝ նույն պահանջով, այս անգամ՝ վճարելով պետական տուրքը։

Հեղինակ՝ Իզաբել Սահակյան

Աղբյուր` Փաստինֆո