Փաստ ինֆո

ՄԻԵԴ-ն արձանագրել է՝ Վճռաբեկ դատարանի դատավոր Սուրեն Անտոնյանին կարգապահական պատասխանատվության ենթարկելու մասին ԱՆ միջնորդության քննությանը Կարեն Անդրեասյանը չէր կարող մասնակցել՝ կանխակալ լինելու պատճառով, ուստի, նրա մասնակցությունը գործի քննությանը ՄԻԵԴ-ը գնահատել է որպես արդար դատաքննության իրավունքի խախտում, արդյունքում՝ Սուրեն Անտոնյանի գործը ենթակա է լինելու վերանայման։

Հիշեցնենք, որ դատավոր Սուրեն Անտոնյանի լիազորությունները ԲԴԽ-ն դադարեցրել է 2023թ հունվարի 26-ին՝ 2015թ․ կայացված ՄԻԵԴ վճռի հիման վրա՝ 15 տարի առաջ իբրև թույլ տրված ենթադրյալ խախտման համար։ Հատկանշական է, որ ԲԴԽ-ում հենց գործի քննության ընթացքում դատավորի ներկայացուցիչը բարձրաձայնել էր ՄԻԵԴ վճիռների հիման վրա դատավորների նկատմամբ վարույթների հարուցման, 15 տարվա վաղեմությամբ և անձի կարգավիճակը վատթարացնող կարգավորմանը հետադարձ ուժ տալու սահմանադրականության հարցը, այդուհանդերձ, ԲԴԽ-ն խնդիր չի տեսել և չի կասեցրել վարույթը։ Դատավորն իր խախտված իրավունքները վերականգնելու համար դիմել է ՄԻԵԴ, դիմումը քննվել է առաջնահերթության կարգով։

«Փաստինֆո»-ի հաղորդմամբ՝ այսօր ՄԻԵԴ-ը հրապարակել է Սուրեն Անտոնյանն ընդդեմ ՀՀ-ի գործով վճիռը՝ արձանագրելով դատավորի արդար դատաքննության իրավունքի խախտումը։ Դատավորն իր գանգատում ուշադրություն էր հրավիրել մի շարք հանգամանքների վրա, ի թիվս օրենսդրական կարգավորումների՝ դատավորը շեշտադրել է նաև իր վերաբերյալ գործի քննությանը ԲԴԽ գիտնական անդամների մասնակցության հարցը, որոնք ընտրվել էին խորհրդարանական մեծամասնության իշխող ուժի կողմից և նրանցից ոմանք նաև եղել են կառավարության անդամ՝ արդարադատութայն նախարար և փոխնախարար, ինչպես նաև՝ ուշադրություն էր հրավիրել այն հանգամանքին, որ գործի քննությանը մասնակցած ԲԴԽ նախագահ Կարեն Անդրեասյանը և իր՝ Անտոնյանի նկատմամբ կարգապահական վարույթ հարուցող ԱՆ նախարար Գրիգոր Մինասյանի հետ համատեղ տնտեսական շահ և մոտ ընկերական հարաբերություններ ունեն, հետևաբար, Կարեն Անդրեասյանն այս գործով կանխակալ վերաբերմունք ունի, ինքնաբացարկի միջնորդությունը, սակայն, մերժել է։

ՄԻԵԴ-ն արձանագրել է, որ Կարեն Անդրեասյանի մասնակցությամբ պայմանավորված՝ ԲԴԽ-ն բավարար չափով անկողմնակալ համարվել չի կարող։ Մասնավորապես, ՄԻԵԴ-ն արձանագրել է, որ Կարեն Անդրեասյանի և Գրիգոր Մինասյանի սերտ ընկերական հարաբերությունները և նրանց տնտեսական շահը՝ Անդրեասյանի կնոջ և Գրիգոր Մինասյանի համատեղ տնտեսական կապը ողջամտորեն կարող էին կասկածներ առաջացնել՝ Անդրեասյանի անկողմնակալության վերաբերյալ, որոնք չեն փարատվել, հետևաբար, ԲԴԽ-ն պետք է պատշաճ կարգով քննության առներ բացարկի միջնորդությունը։ Բացի այդ, ՄԻԵԴ-ը նկատել է, որ ԲԴԽ-ն ուշադրություն է դարձրել միայն տնտեսական շահի համատեքստում՝ անտեսելով Մինասյանի և Անդրեասյանի մոտ անձնական հարաբերությունները, որը կարող էր ազդեցություն ունենալ որոշումների կայացմանը։

Անդրեասյանի մասնակցությունը ԵԴ-ն գնահատել է որպես արդար դատաքննության իրավունքի խախտում։ Գույքային վնասի առնչությամբ Դատարանը գտել է, որ լավագույն փոխհատուցումը կլինի գործի վարույթի վերաբացումը՝ համաձայն Կոնվենցիայի 6-րդ հոդվածի 1-ին մասի պահանջների, եթե պրն Անտոնյանը այդպես պահանջի։ Դատարանը որոշել է, որ Հայաստանը պարոն Անտոնյանին պետք է վճարի 3,600 եվրո՝ ոչ գույքային վնասի համար, և 1,420 եվրո՝ ծախսերի և ծախսումների համար։
Հեղինակ՝ Իզաբել Սահակյան

Աղբյուր` Փաստինֆո