Փաստ ինֆո

«Խաղաղ գործընթացի որևէ փուլում չի եղել Շուշի քաղաքից հրաժարվելու հարց»։ ԱԳՆ խոսնակ Աննա Նաղդալյանի այս խոսքերն ի պատասխան են ՀՀ վարչապետի աթոռն զբաղեցնող Փաշինյանի՝ 2020 թվականի նոյեմբերի 16-ին ԱԺ ամբիոնից հնչեցրած աբսուրդային մի հայտարարության, որն, ըստ էության, փաստական չէ, այլ մանիպուլյացիոն, այսինքն, ճիշտ այնպիսին, ինչպիսին բոլոր ժամանակներում եղել են փաշինյանական տեքստերը։

Վերհիշենք, 4 տարի առաջ նոյեմբերյան այն օրը՝ վախից բունկեր մտած-դուրս եկած և մեկ շաբաթ անց վերջապես ԱԺ-ում հայտնված՝ սեփական վախիմեջ փաթաթված Փաշինյանն՝ ի պատասխան պատգամավոր Վիկտոր Ենգիբարյանի հարցի՝ ինչպիսի մտագարություն արտաբերեց, ըստ ամենայնի՝ բունկերում հղացած․․․

«Ո՞վ է ծախել Շուշին։ Շուշին եթե ծախել են, ծախել են 30 տարվա ընթացքում, որովհետև Շուշին դժբախտ, դժգույն քաղաք էր, մեզ պե՞տք էր Շուշին։ Եթե պետք էր, ուրեմն ինչո՞ւ էր այդ վիճակում, մեզ ազատագրված տարածքները եթե պետք էին, ինչո՞ւ էին այդ վիճակում։ Կամ ասում են՝ Արցախի նախագահի երդմնակալությունը ինչու՞ արեցին Շուշիում։ Այսինքն 30 տարի էլիտան համարել է, որ Շուշին հայկական քաղաք է ու պարզվում է՝ Արցախի նախագահը իրավունք չունի միջոցառում անի։ Ա՛յ էդտեղ է հանձնվել Շուշին»։

Բնականաբար, խնդրո առարկա կեղտոտ ու մանիպուլյատիվ տեքստում չկա որևէ փաստ, այն ուղղակի փաշինյանական անհեթեթ մանիպուլյացիա է, որին երեկ, 2025 թվականի հունվարի 22-ին ԱԺ-ում դերասանական մաներաներով փորձ արեց փաստի արժեք հաղորդել քպական մի տիկին։ Հավանաբար, իրեն հեռախոսով ուղարկված տեքստը կարդալով նա առավել քան հստակ ասում էր ՝ այո, Նիկոլը հանձնեց Շուշին, հենց դրա համար էլ այն դժգույն ու դժբախտ է համարում։

Իրականությունն այն է, որ ազգովի դժբախտ ու դժգույն ոչնչությունների ժամանակ ենք ապրում, ընդ որում, մենք բոլորս ենք 2018-ից հետո դժբախտ ու դժգույն, քանի որ պատերազմից 5 տարի անց էլ թույլ ենք տալիս, որ Շուշին ու ողջ Արցախը գիտակցաբար թուրքադրբեջանական տանդեմին հանձնողը շարունակի մանիպուլյացիա, սուտ ու կեղծիք տիրաժավորել ՀՀ ԱԺ-ում։ Ճիշտ այնպես ինչպես տանդեմն է անում՝ իր ստերը 1, 2, 12, 52, 102 անգամ շրջանառելով՝ այն բազմակի լսելի դարձնելով ներքին և արտաքին լսարանին․․․

Փաստորեն, նիկոլաքպական ողջ թիմը ՀՀ պետբյուջեից աշխատավարձ և պարգևատրում է ստանում՝ սուտ և մանիպուլյացիա տարածելով՝ ի նպաստ թուրքադրբեջանական տանդեմի՝ գործունեության համար։

Ըստ այդմ, ԵԱՀԿ Մինսկի խմբի լուծարման ջատագով և այդ գործին լծված փաշինյանական պատասխանը տրված է Տեր-Պետրոսյանին, ով ԼՂՀ բանակցային ողջ գործընթացը գաղտնազերծելու, փաթեթները հրապարակայնացնելու հարց էր բարձրացրել Փաշինյանի առջև։

Այնպես որ՝ վերը նշված հարցին անդրադարձող ընդդիմադիր պատգամավոր Հայկ Մամիջանյանի /Պատիվ ունեմ խմբակցություն/ ՝ Կհանդգնի՞ հրապարակել փաթեթները․․․ հրապարակային հարցի՝ փաշինյանական պատասխանն արդեն իսկ տրված է․․․

Բնականաբար, տաբու դնելով բոլոր փաստաթղթային ապացույցներին, որով հստակ կդառնար, որ հենց ի՛նքն է հանձնել Արցախը․․․ Փոխարենը՝ ինչպես միշտ տարածելով՝ «ֆեյքնյուզ, սուտ, կեղծիք, մանիպուլյացիա»։

Աղբյուր` Փաստինֆո