Փաստ ինֆո

Ա. Միրզոյանի այցը Մոսկվա արդեն իսկ տոնայնության փոփոխության վկայություն էր և արտացոլում էր այն նոր իրավիճակը, որը ձևավորվում է միջազգային հարաբերություններում ԱՄՆ նախագահի ընտրություններից հետո։ Կարևոր է նաև ռուս-իրանական համաձայնագիրը, որը ընդհանուր աշխարհակարգային իմաստով կարող է լինել նոր աշխարհակարգում դետալներից մեկը և նշանակություն ունի մեր տարածաշրջանում առկա իրավիճակի համար։ Սրանք նաև հայ-ռուսական հարաբերությունների համատեքստում եղանակային փոփոխությունների են բերում։ «ՓաստԻնֆոյի» եթերում ասել է քաղաքական վերլուծաբան Հակոբ Բադալյանը։

Բանախոսի դիտարկմամբ, տպավորությունն այնպիսին է, որ հայ-ադրբեջանական գործընթացը հիմա տարերանյության տարր է ստացել, այսինքն կա գիծ, որտեղ զարգացումներ կան, բայց առկա է նաև միջազգային միջավայրի ներգործությունը։ Ռուս-իրանական պայմանագիրը Ադրբեջանի համար ցանկալի չէ, որովհետև այն Կովկասը դիտարկում է որպես համատեղ աշխատանքի առանցքային ռեժիմներից մեկը և Կովկասի կայունությունը Ռուսաստանի և Իրանի համար կարևորագույն բաղադրիչ է։ Այս համաձայնագիրը Ադրբեջանի համար կարող է կաշկանդող գործոնի վերածվել, քանի որ իր հավակնոտ քաղաքականությամբ Ադրբեջանը մոտեցել է Իրանի կարմիր գծերին և որոշակիորեն նաև, Ռուսաստանի կարմիր գծերին։

Փորձագետը կարծում է, որ Ռուսաստանի և Իրանի աշխարհաքաղաքական մրցակիցները Ադրբեջանը դիտարկելու են որպես ռուս-իրանական գործակցությունը խափանելու միջոցներից մեկը։ Բրիտանացիներին անհանգստացնում է Դ. Թրամփի՝ Ռուսաստանի հետ գործարքի գնալու մոտեցումը, ուստի բացառված չէ, որ այս շրջափուլում Բրիտանիան փորձի Ադրբեջանին համոզել կամ ճնշում գործադրել՝ Կովկասում հնարավորինս դիստրուկիվ վարքագիծ դրսևորելու համար։

Բրիտանիան մեծ ազդեցություն ունի Ադրբեջանում, քանի որ Ալիևների իշխանությունը հիմնված է ֆինանսատնտեսական կոռուպցիոն սխեմաների վրա, ալիևների փողերը պահվում են բրիտանական օֆշորներում։ Հետևաբար, ալիևների ֆինանսատնտեսական «պոչը» Բրիտանիայի ոտքերի տակ է։ Բրիտանիայի խնդիրն է՝ մնալ բարձրագույն խմբում և աշխարհում որոշումներ կայացնողների առաջին դիրքերում, սակայն ներուժի խնդիր ունի՝ մասնավորեցնում է վերլուծաբանը։

Անդրադառնալով փետրվարին սպասվող սահմանազատմանը, բանախոսը նշեց, որ Տավուշի մարզում է Ադրբեջանի, այսպես կոչված անկլավներից երկուսը և միջպետական ճանապարհը, որի նկատմամբ Ադրբեջանը հավակնություններ ունի։ Ադրբեջանը դա դիտարկում է որպես Հայաստանի դեմ ճնշման միջոց։ Սրանք միջոցներ են, որոնք թույլ են տալիս Ադրբեջանին մխրճվելու Հայաստանի ռազմավարական բնագծեր և դրանից հրաժարվելու համար Ադրբեջանը կարող է շատ ավելի մեծ գին պահանջել։

Մանրամասները՝ տեսանյութում։

Աղբյուր` Փաստինֆո