Փաստ ինֆո

Արտգործնախարարների հանդիպումից մենք տեսանք, որ այս անգամ նորմալ շփում է եղել ու էդ մարդիկ մեզ նորմալ պետություն համարեցին։ Առաջներում ուրիշ ձև է մոտեցումը, հիմա ուրիշ ձև էր։ Այս մասին ԱԺ-ում լրագրողների հետ զրույցում ասաց ՔՊ-ական պատգամավոր Գագիկ Մելքոնյանն՝ անդրադառնալով ՀՀ և ՌԴ ԱԳ նախարարների վերջին հանդիպմանը։

Հարցին՝ հնարավո՞ր է, ՀԱՊԿ-ի նկատմամբ Հայաստանի վերաբերմունքը վերանայվի, Մելքոնյանը պատասխանեց. «Չեմ կարծում, որովհետեւ ՀԱՊԿ-ի հետ հարաբերությունները սառեցված են, և մենք արդեն կորցրել ենք Արցախը: Այլ հարց, եթե ասենք, այնպիսի մթնոլորտ ստեղծվի, որ իրենք նորից Արցախը հետ կվերադարձնեն, դա ուրիշ խնդիր է: Ով տվել է՝ նա էլ կվերադարձնի»:

Դիտարկմանը, թե Պրահայում Նիկոլ Փաշինյանն է ճանաչել Արցախն Ադրբեջանի կազում՝ նա ընդգծեց. «Արցախը հանձնել են ռուսները՝ ադրբեջանցիների հետ համագործակցված»:
Հիշեցմանը, որ Նիկոլ Փաշինյանը ԱԺ-ում հայտարարել է, որ իր սխալն այն է, որ ինքն ավելի շուտ չի ասել, որ Արցախը ճանաչում է Ադրբեջանի կազմում, ՔՊ-ական պատգամավորն ասաց. «Էդ մեր ո՞ր նախագահն է, որ չի ճանաչել Արցախն Ադրբեջանի կազմում, բոլորն էլ ճանաչել են:

44-օրյա պատերազմից հետո, երբ մենք տեսանք, թե ինչ կատարվեց Արցախի գլխին: Անվտանգության խնդիրները Ռուսաստանը վերցրեց իր վրա նոյեմբերի 9-ի պայմանագրով և դա չիրագործեց:
Իրենք մինչև 2025 թվականը պետք է մնային Արցախում, բայց իրենք դուրս եկան Արցախից և Արցախը արդեն գրավվեց ադրբեջանցիների կողմից: Էլ մնալու բան չունեին, Արցախը հանձնեցին ու իրենք էլ գնացին»:
Հարցին՝ ինչո՞ւ ռուսները չփրկեցին Արցախի ռազմաքաղաքական ղեկավարությանը, ինչպես, օրինակ, Բաշար Ասադին, նա արձագանքեց. «Իրենց հարցրեք: Ինչո՞ւ չարեցին: Եթե իրենք կարողացան Ասադին հանել, ինչու նույնը Արցախի ղեկավարությանը չարեցին, չփրկեցին: Ես դրա պատասխանը չունեմ»:

Դիտարկմանը, թե ԱԺ նախագահ Ալեն Սիմոնյանն ասում է, որ «Արցախ» բառը չի օգտագործում, որ լարվածություն չհրահրի, Գագիկ Մելքոնյանն ասց. «Ես միշտ էլ օգտագործել եմ Արցախ բառը: Ումի՞ց վախենամ, Ալիևից ով վախենում է, թող վախենա»:

Աղբյուր` Փաստինֆո