Փաստ ինֆո

ՀՀ նախկին գլխավոր դատախազ Աղվան Հովսեփյանը պնդում է՝ Երևանում ոչ մի թիզ հող չի վերցրել։

«Գլխավոր դատախազ էի։ Եթե ցանկանայի, ապա Երևանի կեսը կվերցնեի, ոչ թե՝ կասեի քո հողն իմ անունով գրանցի»,- դատական նիստում հայտարարեց Աղվան Հովսեփյանը։

Ինչպես արդեն տեղեկացրել ենք՝ Աղվան Հովսեփյանի գործով դատական նիստին այսօր շարունակվեց գործով որպես տուժող անցնող Վարշամ Ղարիբյանի՝ «Շանթի Յուրայի» եղբոր՝ Մանվել Ղարիբյանի, հարցաքննությունը։

Մանվել Ղադիբյանը գործով հարցաքննվում է երրորդ անգամ, ըստ մեղադրող Կորյուն Սերոբյանի՝ պայմանավորված է դատարանում տրված ցուցմունքների էական հակասություններով։ Վերջինս հետաքրքրվեց՝ արդյոք հիշողության խնդիր ունի, ինչին արձագանքելով Ղարիբյանը նշեց՝ այո, 17 անգամ վիրահատվել է։ Ղարիբյանը պնդեց իր դիրքորոշումն առ այն, որ հողատարածքն իրենն է եղել, իրավիճակը փոխվել է և իր եղբայրը դադարել է լինել եղբայր։ Վարշամի հետ հարաբերությունները վատ են.«Ինքը հանցագործ է, բոլորին հանցագործ է սարքել»։ Հարցուպատասխանի ընթացքում Մանվել Ղարիբյանը ծիծաղով արձագանքեց դիտարկմանը, թե Վարշամ Ղարիբյանն Աղվան Հովսեփյանին կաշառք է տվել հեռուստաընկերությունը։

«Վարշամին փետով ծեծես, 100 դոլար փող չի տա ոչ մեկին։ Վարշամը չի կարող կաշառք տալ Հովսեփյանին, իմ նման ընկերը չի կարողացել տա, Վարշամը ոնց կարող է տալ»,- նշեց վկան՝ արձանագրելով, որ Վարշամը որևէ կապ չունի ՀԸ հետ, ավելին, այդ ՀԸ-ն շահութաբեր չի եղել։ Հովսեփյանը հետաքրքրվեց՝ ինչն է իրեն իբրև կաշառք տրվել, եկամուտ չունեցող ընկերությու՞ն, ինչին արձագանքելով վկան նշեց՝ դեռ Վարշամն է կաշառք ստացել, նա ինչ իրավունք ուներ փող ստանալ այդտեղից։ Ինչ վերաբերում է մեղադրանքին, թե Հովսեփյանը գնացել է Շանթ՝ միայնակ՝ առանց թիկնապահների, պահանջել, որ հողատարածքը գրանցվի իր որդու անունով՝ վկան նշեց՝ 2007թ -ից հետո ինքը մուտ չի գործել Շանթ՝ եղբոր հետ հարաբերությունների պատճառով, բայց չի հավատում, որ Հովսեփյանը նման բան աներ։ Ըստ վկայի՝ Հովսեփյանն ընկերական հարաբերություններում, նույնիսկ լարված իրավիճակում երբեք չի շեշտադրել իր՝ պաշտոնյա լինելու հանգամանքը։ Վկան իր խոսքում նաև հիշատակեց Սերժ Սարգսյանի անունը՝ ՀԸ-ն վերցնելիս խոսակցություն ունենալու համատեքստում, բացի այդ, հողատարածքի ձեռքերման հարցում շոշափվեց նաև թաղապետի անունը, որն, իբրև ասել էր, թե հող կա ձեռքբերելու, ուժերից վեր է, հետո ասել են՝ հարցը լուծված է։ Մանվել Ղարիբյանի ընկերությունն ավտոմեքենա էր տրամադրել գլխավոր դատախազության համար, իսկ Հովսեփյանի՝ գլխավոր դատախազի պաշտոնից ազատվելուց հետո՝ ավտոմեքենան վերադարձվել է ընկերությանը։ Դատախազի միջնորդության հիման վրա հրապարակվեց վկայի նախաքննակապ ցուցմունքը, որն էականորեն տարբերվել է դատարանում տրված ցուցմունքներին։ Ղարիբյանը դա պայմանավորեց նախկինում՝ Հովսեփյանի հետ լարված հարաբերություններով։

Հիշեցնենք, որ Աղվան Հովսեփյանը ձերբակալվել է 2021թ սեպտեմբերի 7-ին՝ առավոտյան։ Նախաքննական մարմինը մինչ այդ շուրջ 1.5 տարի քննություն էր իրականացրել՝ առանց Հովսեփյանին հարցաքննության հրավիրելու։ Նրան միանգամից մեղադրանք են առաջադրել և որպես խափանման միջոց ընտրել կալանավորումը։ Ընդ որում՝ դատարանները բավարարել են քննիչի միջնորդությունները՝ կալանավորումը որպես խափանման միջոց ընտրելու կամ այն երկարացնելու մասին՝ ընդունելով հանդերձ, որ հիմքեր չկան կարծելու , որ նա կարող է թաքնվել քննությունից։ Քրեական գործը չի վերաբերում ի պաշտոնե կատարված առերեւույթ չարաշահումներին, նախաքննական մարմինը պնդում է, թե նախկին գզխավոր դատախազն օգտագործելով իր դիրքը, բիզնես գործունեություն է ծավալել, իբր, արտոնյալ պայմաններ ստեղծել իր մերձավորների համար։

Գործն ի սկզբանե գտնվել է Երևանի ընդհանուր իրավասության քրեական դատարանի դատավոր Մնացական Մարտիրոսյանի վարույթում, ապա, օրենսդրական փոփոխություններով պայմանավորված՝ տեղափոխվել Հակակոռուպցիոն դատարան, այժմ գտնվում է դատավոր Տիգրան Դավթյանի վարույթում։ Գործով ի սկզբանե մեղադրանք էր առաջադրվել նաև Վրեժ Մարկոսյանին՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով, որպես խափանման միջոց էր ընտրվել ստորագրություն՝ չհեռանալու մասին, սակայն Մարկոսյանի դրվագը հետագայում առանձնացվել է: Վերջինս մահացել է։

Հեղինակ՝ Իզաբել Սահակյան

Աղբյուր` Փաստինֆո