Փաստ ինֆո

Շվեյցարիան պատրաստ է հյուրընկալել Թրամփի և Պուտինի միջև Ուկրաինայի հարցով հանդիպում, եթե նրանք խնդրեն։ Այս մասին գրում է Le Temps-ը՝ վկայակոչելով Շվեյցարիայի ԱԳՆ-ին։

«Շվեյցարիան պատրաստ է ընդունել ՌԴ նախագահ Վլադիմիր Պուտինի և ԱՄՆ նորընտիր նախագահ Դոնալդ Թրամփի հանդիպումը՝ ուկրաինական հակամարտության կարգավորման հարցով, եթե նրանք դա խնդրեն։

Բուրգենստոկի գագաթնաժողովից ի վեր, Ուկրաինան, Ռուսաստանը և Միացյալ Նահանգները պարբերաբար տեղեկացվում են մեր պատրաստակամության մասին՝ աջակցելու խաղաղություն հաստատելու ցանկացած դիվանագիտական ջանքերին», - ասել է Շվեյցարիայի ԱԳՆ ներկայացուցիչը։

Շվեյցարիայի իշխանություններն իրենք մտադիր չեն այս հարցում նախաձեռնող լինել, գրում է թերթը։ Պարբերականը նաև հայտնել է, որ Շվեյցարիան մեկն է այն երկրների ցանկում, որոնք պատրաստ են ընդունել քաղաքական գործիչների հանդիպումը։

Հիշեցնենք, որ Թրամփը նախկինում բազմիցս հայտարարել է Պուտինի հետ բանակցություններ վարելու պատրաստակամության մասին, այդ թվում՝ քննարկելու Ուկրաինայի հակամարտության կարգավորման հարցը։ Թե՛ նախագահական ընտրություններում հաղթանակից առաջ, թե՛ դրանից հետո հանրապետականը հայտարարել է Մոսկվայի և Կիևի միջև բանակցություններ կազմակերպելու իր նպատակի մասին։

Հունվարի 10-ին Թրամփը հայտնել էր, որ Պուտինը ցանկություն է հայտնել հանդիպել իր հետ, և նախապատրաստական աշխատանքներ են ընթանում։ Նա չի հստակեցրել, թե երբ և որտեղ կարող է տեղի ունենալ միջոցառումը։

Կրեմլը հունվարի 9-ին, նշել էր, որ Պուտինի հետ զրույցի վերաբերյալ Թրամփից ոչ մի հարցում չի ստացել։ Ի պատասխան ԱՄՆ նորընտիր նախագահի նոր հայտարարության՝ ՌԴ-ից հայտնել են, որ Պուտինը բազմիցս խոսել է օտարերկրյա առաջնորդների, այդ թվում՝ Թրամփի հետ շփումների բաց լինելու մասին։ Նման երկխոսության համար ոչ մի պայման չի պահանջվում, այլ միայն քաղաքական կամք և փոխադարձ ցանկություն,

«Դեռևս հստակություն չկա, մենք ելնում ենք հանդիպման փոխադարձ պատրաստակամությունից. Կարծես թե պարոն Թրամփի Օվալաձև աշխատասենյակ մտնելուց հետո արդեն որոշակի տեղաշարժ կլինի»,- ասել է ՌԴ նախագահի մամուլի քարտուղար Դմիտրի Պեսկովը։

Թրամփի երդմնակալության արարողությունը տեղի կունենա հունվարի 20-ին։

Աղբյուր` Փաստինֆո