Փաստ ինֆո

Ես չունեմ Հայաստանի՝ Բաքվին արած առաջարկների մասին տեղեկատվություն, բանակցություններն ԱԳՆ-ն է վարում։ Այս մասին լրագրողների հետ զրույցում ասաց Միջազգային իրավական հարցերով ՀՀ ներկայացուցիչ Եղիշե Կիրակոսյանը՝ նշելով, որ  չի կարծում, որ խաղաղության գործընթացին կարող են խանգարել երկու երկրների միջև առկա իրավական վեճերը։

«Իմ կարծիքով, իրավական վեճերի իմաստն ինչ-որ տեղ խաղաղության հաստատումն է։ Երբ պետությունները նախաձեռնում են իրավական վեճեր, տարաձայնությունները լուծում են քաղաքակիրթ եղանակով, միջազգային հիմքով նախատեսված ճանապարհով, դա նաև ուժի կիրառումը բացառել, պատերազմը կանխարգելել է նշանակում»,- նշեց Կիրակոսյանը։

Հարցին՝ ինչպես կբացատրի քաղաքականությունը, որ Հայաստանի համար ընդունելի է իրավական վեճերը բացառելը՝ Կիրակոսյանը պատասխանեց՝ չի կարող բացատրել, ճիշտ չի լինի, բայց կարող է ասել, որ ՀՀ-ի կողմից նախաձեռնված նախաձեռնված, օրինակ, Արդարադատության միջազգային դատարանում քննվող Ռասսայական խտրականության բոլոր ձևերի վերացման մասին կոնվենցիայի հիման վրա ընթացող վեճը միտված է պատերազմը կանխարգելելուն, որովհետև, ի սկզբանե, կոնվենցիան միտված է՝ խաղաղությանը և պատերազմը կանխարգելելուն, ինչը ողջամիտ ու տրամաբանական է։

Դիտարկմանը, որ ստացվում է՝ իրավական վեճերն ավելի շատ կամրապնդեն խաղաղությունը՝ Կիրակոսյանը նշեց՝ իմաստը դա է, հակառակ դեպքում, ինչ իմաստ ունի խոսելու միջազգային իրավունքի և իրավական վեճերի մասին։

Հարցին, հնարավո՞ր է Հայաստանն միջազգային ատյաններից հետ կանչի իրավական վեճերը, Եղիշե Կիրակոսյանը պատասխանեց. «Դրա մասին պետք է չշտապել մեկնաբանություն տալ։ Ադրբեջանն էլ Հայաստանի դեմ գործեր ունի, միայն Հայաստանը չի, որ Ադրբեջանի դեմ գործեր ունի։ Հարց է առաջանում, եթե Ադրբեջանը վստահ է իր իրավական դիրքորոշումների վրա, ինչո՞ւ են դատական գործընթացները դադարեցնելու մասին գաղափար առաջ քաշում։ Թողնեմ առանց պատասխան կամ պատասխանն, ինձ թվում է, արդեն պարզ է»։ Նա ընդգծեց՝ միջազգային դատարաններում վեճ տանելը՝ ինքնիշխանության դրսևորման կարևորագույն եղանակ է, այսինքն, այն ակտը, որ դնում են դատական ակտի առջև և պահանջ են ներկայացնում՝ ընդդեմ այլ պետության, ապա դա ոչ միայն վերաբերում է նրան, որ մի մեծ խումբ անձանց իրավունքների՝ հարյուր հազարավոր հայրենակիցների, նույնիսկ՝ միլիոնավոր, որովհետև Ռասսայական խտրականության վերացման մասին կոնվենցիայի առարկան ռասսայական խտրականության արգելքն է և դրա շահառուն բոլոր էթնիկ հայերն են։

Աղբյուր` Փաստինֆո