Փաստ ինֆո

Շատ լավ է, որ Մեդվեդևը հիշում է, որ մենք ՀԱՊԿ-ի անդամ ենք, գուցե տարիներ առաջ հիշեին, որ Հայաստանը ՀԱՊԿ անդամ է, միայն հիմա՞ են այդ մասին հիշել։ Այս մասին լրագրողների հետ զրույցում ասաց ՔՊ-ական պատգամավոր Ալխաս Ղազարյանն՝ անդրադառնալով ՌԴ Անվտանգության խորհրդի փոխնախագահ Դմիտրի Մեդվեդևի հայտարարությանը, թե չի զարմանա, եթե մորուքը սափրած Փաշինյանը հիշի, որ Հայաստանը ՀԱՊԿ անդամ է:

Մեդվեդևը նաև հայտարարել էր. «Հայաստանի ղեկավարների՝ Եվրամիության հետ ամուսնանալու մտադրության լույսի ներքո կարելի է ուղղակիորեն դիմել ԵՄ-ին, նրանք սիրում են փողով և զենքով օգնել դրախտի թեկնածուներին: Եվրամիությունն իր հետևում ուկրաինական հիանալի փորձն ունի»։

Հարցին՝ հաշվարկված է, թե ինչ խնդիրներ կարող են առաջանալ ԵԱՏՄ-ի հետ՝ Ալխաս Ղազարյանը պատասխանեց, որ ամեն ինչ էլ շատ կարգին հաշվարկվում է։

Ինչ վերաբերում է դեպի ԵՄ գնալուն՝ նա նշեց, որ ԵՄ գնալը չի նշանակում, որ մենք ինչ- որ մի տեղից դուրս ենք գալիս ու գնում ենք այլ տեղ։ «Դեպի ԵՄ գնալը երկար ժամանակ է պահանջում ու ինչպես տեսնում եք՝ բավական գործընթացներ են տեղի ունեցել։ Անդամակցությունը ոչ վաղն է լինելու, ոչ էլ մյուս օրը, դա որոշակի գործընթաց է նախատեսում»,-ասաց նա՝ նշելով, որ չի կարող ասել, որ ԵՄ-ում մեզ սպասում են։

Դիտարկմանը, թե ինչու ենք հարաբերությունները փչացնում, եթե վստահ չենք, որ մեկ այլ վայրում մեզ չեն սպասում՝ Ղազարյանն ասաց, որ մեր հարաբերությունները ՌԴ-ի հետ չենք փչացնում, այդ իրենք են կոշտ հայտարարություններ անում։ «Մենք պետք է նայենք մեր երկրի շահին, մենք ցանկանում ենք բարիդրացիական հարաբերություններ ունենալ բոլոր երկրների հետ, այդ թվում՝ ՌԴ-ի»,-ասաց նա։

Աղբյուր` Փաստինֆո