Փաստ ինֆո

Հայաստանի օրհներգի փոփոխության նախագծում սահմանվում է, որ օրգներգը կարող է օգտագործվել կրճատ տարբերակով։ Միջազգային մարզական խաղերի կամ պարգևատրման արարողությունների դեպքում հասկանալի է, բայց ո՞րն է երաշխիքը, որ կառավարությունը գրեթե բոլոր արարողակարգերի համար չի հաստատի մեկ քառատողով օրհներգի կատարումը։ Այս մասին այսօր ՀՀ ԱԺ պետաիրավական հարցերով մշտական հանձնաժողովի ընթացքում «ՀՀ պետական օրհներգի մասին» ՀՀ օրենքի փոփոխության նախագծի քննարկման ընթացքում ասաց «Հայաստան» խմբակցության պատգամավոր Գեղամ Մանուկյանը։ «Այսինքն, կառավարությանը լայն հնարավորություն եք տալիս աչքաչափով առաջնորդվել ու չկատարել օրհներգը ամբողջական տարբերակով։ Երկրորդ հարցն այն է, թե եթե այս օրենքը ընդունվի ու ես որոշեմ քառատողերի հերթականությունը խախտել՝ դրա համար կա պատասխանատվությո՞ւն»։

Նախագծի հիմնական զեկուցող Սիսակ Գաբրիելյանն ասաց, որ պատիճ իհարկե օրենքով նախատեսվում է, սակայն իրենց դիտարկումն այն է, որ գրեթե ամենուր օրհներգի թե քառատողերը, թե նոտաները խախտվել են, սակայն որևէ մեկը դրա համար չի պատճվել։ «Ենթադրում եմ վարչական պատասխանատվություն պետք է նախատեսված լինի։ Ինչ մնում է կարճ կամ երկար տարբերակների օգտագործման հնարավորություններին՝ Գաբրիելյանի դիտարկմամբ՝ օրենքը նախատեսում է հստակ դեպքերը, թե որ դեպքում՝ որ տարբերակը կարող է կիրառելի լինել»։

Մանուկյանն էլ նշեց, որ նախագծի հիմնավորումներում նշել են, որ վերջին շրջանում օրհներգը որոշ միջոցառումների ժամանակ կատարվել է հենց փոփոխված տարբերակով ու հավանության է արժանացել հանրության լայն շրջանակների կողմից։ «Ես հասկանում եմ, որ քանի որ պաշտոնական ձայնագրություն չկա՝ ճաշակի համապատասխան Նիկոլ Փաշինյանը որոշել է, որ օրհներգի տողերի տեղերը փոխվի, մի փոքր երգչախումբ են գտել ու էս մարդկանց Քննչական կոմիտե, ԱԱԾ, ԱԺ կամ այլ միջոցառումների տարել են հենց այդ ձայնագրությունը ու խախտելով Օրհներգի մասին օրենքը ՝ արդեն փոխված հերթականությամբ են վերջին ամիսների հնչեցնում, դեռ մի բան էլ հպարտանում են, որ իրենք, այո, վարչական իրավախախտում են արել , բայց դե՝ Հայաստանում դա արդեն սովորական է»։

Աղբյուր` Փաստինֆո