Փաստ ինֆո

Հայաստանի արհմիությունների կոնֆեդերացիան կողմ է երկրում աշխատանքային օրվա տևողության կրճատմանը և աշխատողների իրավունքների պաշտպանությանն ուղղված քայլերին: 

«Արմենպրես»-ի փոխանցմամբ՝ կառույցի նախագահ Էլեն Մանասերյանն այս մասին հայտարարեց  Մեդիա կենտրոնում կազմակերպված՝ «7-ժամյա աշխատանքային օրը կբարձրացնի՞ կյանքի որակը՝ չվնասելով տնտեսությանը» թեմայով քննարկման ընթացքում:

Անդրադառնալով աշխատանքային օրվա տևողությունը 1 ժամով կրճատելու և շաբաթական 40-ից 35 ժամի հասցնելու (աշխատավարձի չափի պահպանմամբ) ՀՀ աշխատանքի և սոցիալական հարցերի նախարարության մշակած օրենքի նախագծին՝ Էլեն Մանասերյանը նշեց, որ Հայաստանի արհմիությունների կոնֆեդերացիան ողջունել է այն, որովհետև Հայաստանի Հանրապետությունը, լինելով սահմանադրորեն հռչակված սոցիալական պետություն, շրջանառության մեջ դրել է սոցիալականացմանը միտված մարդակենտրոն նախագիծ:

Նա գտնում է, որ 7-ժամյա աշխատանքային գրաֆիկի անցնելու հետ կապված քննադատություններն անհիմն են, քանի որ հնչեցվող ռիսկերը կարող են լինել նաև  8 ժամ աշխատելու դեպքում:    

«Ռիսկեր այսօր էլ կան, բայց մեր տեսանկյունից դրանք այլ են: Այսօր ունենք աշխատանքային օրենսգրքում և պայմանագրերում ֆիքսված 8-ժամյա աշխատանքային գրաֆիկ, բայց գործատուները չեն պահպանում այն: Բայց դա չի արձանագրվում, բնականաբար, չի պահպանվում նաև արտաժամյա աշխատանքի համար վճարելու մասին աշխատանքային օրենսդրությամբ սահմանված իրավանորմը: Չեմ ասում, որ 7-ժամյա գրաֆիկի անցնելու դեպքում այդ խնդիրը լուծելու ենք: Այդ խնդիրը լուծելու միակ տարբերակը վերահսկողական և հսկողական աշխատանքների ինտենսիվացումն է: Գիտենք, որ պետական հսկողությունն իրականացնում է Առողջապահության և աշխատանքի տեսչական մարմինը, ոչ պետականը՝ արհմիությունը»,- նշեց Էլեն Մանասերյանը: 

Նա ընդգծեց, որ իրականում 7-ժամյա աշխատանքի անցնելը մարդկանց թույլ կտա ոչ միայն հավասարակշռել աշխատանքին, ընտանիքին և անձնական կյանքին հատկացվելիք ժամանակը, այլև դա շահավետ կլինի նույն գործատուի համար՝ մարդիկ կխուսափեն հոգնածությունից և ավելի տրամադրված կաշխատեն: 

Էլեն Մանասերյանի դիտարկմամբ՝ ներկայում աշխատանքային գործիքներն այնքան են զարգացել, որ ամենևին էլ պարտադիր չէ, որպեսզի մարդը 8 ժամ շարունակ աշխատավայրում գամված աշխատի, քանզի նույն արդյունքը կարելի է ստանալ նաև 7-ժամյա աշխատանքի դեպքում: 

Արհմիությունների կոնֆեդերացիայի նախագահի գնահատմամբ՝ Հայաստանում աշխատանքային պայմաններն ոչ միայն արժանապատիվ չեն, այլև լիարժեք չեն ապահովվում: 

«Դա վերաբերում է աշխատաժամանակի պահպանմանը, աշխատանքային անվտանգ պայմանների ստեղծմանը, նաև աշխատավարձին: Շատ դեպքերում մարդիկ ստիպված են մի քանի տեղ աշխատել՝ դրանով իսկ խաթարելով ընտանիքի հետ կապերը: Այս ամենը լուրջ խնդիր է, որը միավորվելով առօրյա և կենցաղային տարբեր դժվարություններին՝ անդրադառնում է երկրում ընդհանուր մթնոլորտի ձևավորմանը: Միջին աշխատավարձի վերաբերյալ վիճակագրական տվյալներն ամենևին չեն արտացոլում Հայաստանում առկա իրականությունը: 700 հազար աշխատողներից քանի՞սն են 200 հազար դրամից բարձր վարձատրվում կամ նույնիսկ նվազագույն աշխատավարձ ստանում: Շատ դեպքերում մարդը վարձատրվում է ոչ թե ըստ արժանիքների, այլ որովհետև տվյալ հաստիքի համար այդքան է սահմանված: Աշխատող մարդը գործիք չէ՝ նա արժանի է հարգանքի և գնահատականի: Գործատուն պարտավոր է ապահովել արժանապատիվ աշխատանքային պայմաններ: Ոչինչ չենք անում աշխատողի համար, բայց ուզում ենք, որ 8-ի փոխարեն 12 ժամ աշխատի և դեռ շնորհակալ լինի գործատուին, որ աշխատանք ունի: Դա նորմալ չէ, այդպես չի լինում»,- հայտարարեց Էլեն Մանասերյանը:   

Աղբյուր` Փաստինֆո