Փաստ ինֆո

Ես առաջարկում եմ, որ Փաշինյանի մտագալարումները «Արևմտյան Հայաստան» հասկացության մասին իր թիմի 2 իրավաբանները մեկնաբանեն, խոսքը Եղիշե Կիրակոսյանի ու Վլադիմիր Վարդանյանի մասին է, ովքեր շատ լավ հասկանում են Սահմանադրությունը։ Կարծում եմ, այս բարբաջանքները և «ինտելեկտուալ բխկոցները» պետք է հետաքրքրեն նախ հոգեբույժներին, ապա նաև իրավապահներին։ Այս մասին «Փաստինֆոյի» հետ զրույցում ասաց պատմական գիտությունների դոկտոր Հայկ Դեմոյանը։

«Այդ անձինք, Փաշինյանի որոշմամբ, նշանակվել են Հայց Ցեղասպանության ինստիտուտի հոգաբարձուների խորհրդի անդամներ, նաև լավ հասկանում են Սահմանադրությունն ու սահմանադրականությունը՝ թող իրենց շեֆի մտքի առկայծումները վերլուծեն և ասեն, թե արդյոք այդ բարբաջանքները չե՞ն հակասում ՀՀ գործող սահմանադրությանը, 1990 թ. Անկախության հռչակագրին և արդյո՞ք այդ հայտարարությունները պետական պաշտոնյայի կողմից չի ենթադրում քրեական պատասխանատվություն»,- նշեց գիտնականը։

Դիտարկմանը, թե ինչո՞ւ է կարծում, որ այդ անձինք խիզախություն կունենան հակադարձելու, ինչպես ինքն է ասում, իրենց «շեֆին»՝ Դեմոյանը պատասխանեց, որ եթե իրավաբան են, ապա պետք է բարոյականություն ունենան, որը հիմնված կլինի այդ օրենքների վրա։

«Ես այդ երկուսին էլ մեղադրում եմ որպես Հոգաբարձուների խորհրդի անդամներ տարբեր քերական գործեր կոծկելու մեջ։ Այդ երկուսը թող մեկնաբանեն, թե ի՞նչ է Փաշինյանի ասածը՝ պետական պաշտոնյայի կողմից ցեղասպանության, պատմական փաստերի ժխտո՞ւմ, հայրենազրկո՞ւմ, հիմա սփյուռքահայերի առկայության գործոնն ինքն ինչպե՞ս կարող է բացատրել, ինչպես են սփյուռքահայերը հայտնվել Հայաստանի սահմաններից դուրս, գուցե, այնուամենայնիվ, եղե՞լ է ուրիշ Հայաստան։ «Հայրենազրկում» հասկացությունը Փաշինյանի համար կա՞։ Այս երկու իրավաբաններն էլ իրենց խոսքում օգտագործում են «հայրենազրկում» բառը տարբեր հոդվածներում, հիմա թող մեկնաբանեն այդ հակասությունը»,- նշեց Հայկ Դեմոյանը՝ ավելացնելով, որ դեռ անցած տարի 20 կետանոց մեղադրանք է գրել Նիկոլ Փաշինյանին։ Ներկայումս, ինչպես նշեց մեր զրուցակիցը, կարող է ավելացնել այդ հոդվածների քանակը։

«Դրանց հիմքով թեև քրեական գործ է հարուցվել, բայց չեն հասնում դատաքննության փուլ։ Գիտեք, անգամ ինքս եմ իմ նախաձեռնությամբ 3 անգամ գնացել ու ցուցմունք տվել, չի հասնում դատաքննության, որովհետև մտավախություն ունեն, որ դրանք կարող են առնչվել դեռ 2007 թ-ին իմ կողմից Արարատ Միրզոյանի, Վլադիմիր Վարդանյանի դեմ տված ցուցմունքով հարուցված քրեական գործերին»։

Հարցին, թե այդ ամենն հաշվի առնելով, ո՞րն է «իրական Հայաստանը», այն, որի մասին Նիկոլ Փաշինյա՞նն է խոսում, թե՞ այն, որի մասին ինքն է խոսում՝ նա նշեց, որ մի տեսություն էլ ունի, այն է՝ «Զուգահեռ իրականության» ։

«ՔՊ-ն մի վտանգավոր բան է արել՝ ստեղծել է զուգահեռ իրականություն՝ Արևմտյան Հայաստանը մարգինալացնելով, հայտարարություններ անելով, թե Արարատը մերը չէ, այլ Արագածն է մերը, ու նման բազմաթիվ այլ հայտարարություններով, որը իրենց գլխին է ջարդվելու։ Այդ զուգահեռ իրականությունը, որն իրենք անվանում են «իրական Հայաստան»՝ շատ ծանր է նստելու իրենց ու իրենց ընտանիքների վրա։ Նկատի ունեմ, որ պատմությունը շատ դաժան ուսուցիչ է»,- արձանագրեց Հայկ Դեմոյանը։

Աղբյուր` Փաստինֆո