Փաստ ինֆո

Նիկոլ Փաշինյանը կարող էր առավել կոշտ պատասխանել Ալիևին, առավել ևս, որ հատկապես վերջին տարիների Ադրբեջանի գործողությունները ցույց են տալիս, որ հենց Ադրբեջանն է ֆաշիստական պետություն։ Ընդ որում՝ սա միայն մեր գնահատականը չէ, այլ բազմաթիվ միջազգային կառույցներից են նման գնահատականներ հնչել, որ Ադրբեջանը էթնիկ զտումներ է իրականացրել Արցախում և այլն։ Այս մասին «Փաստինֆոյի» հետ զրույցում ասաց քաղաքական մեկնաբան Արմեն Բաղդասարյանն՝ անդրադառնալով Նիկոլ Փաշինյանի արձագանքին Իլհամ Ալիևի այն պնդմանը, թե Հայաստանը ֆաշիստական պետություն է, որ Հայաստանը 30 տարի ղեկավարել են ֆաշիստները։

Նիկոլ Փաշինյանն այսօր իր արձագանքում նշել էր. «արձանագրենք, որ Ադրբեջանում Հայաստանի մասին այսպիսի ընկալում կա և փորձենք հասկանալ, թե ի՞նչն է դրա պատճառը»:

Բաղդասարյանի դիտարկմամբ՝ Նիկոլ Փաշինյանն իր այդ պատասխանով ոչ միայն լեգիտիմացնում է Ալիևի հայտարարությունը, այլ, համենայն դեպս, հնարավորություն է ստեղծում, որ նման քննարկում ծավալվի։

«Մեծ հաշվով, համաձայն եմ այն դիտարկման հետ, որ Ալիևի այս հայտարարության հաշվարկն այն է, որ արձագանքը կլինի՝ ֆաշիստը դու ես, որին կհաջորդի լարվածությունը 2 երկրների միջև, սակայն այլ հարց է, որ եթե Հայաստանը չի պատասխանում այդ հայտարարություններին համապատասխան բառապաշարով, ապա դա բոլորովին չի նշանակում, որ սահմանային լարվածությունը կամ հարձակումը Հայաստանի վրա լեգիտիմացնելու այլ հնարավորություն Ալիևը չունի։

Պարզ ասած, եթե Ադրբեջանը համարի, որ կարող է Հայաստանի նկատմամբ ագրեսիա գործադրել և դա մարսել, ապա դա կանի՝ անկախ նրանից, թե Հայաստանը ինչ պատասխան կտա։ Եթե Ադրբեջանը համարի, որ չի կարող դա անել՝ հաշվի առնելով ուժերի հարաբերակցությունը տարածաշրջանում, հաշվի առնելով միջազգային խաղացողներին, ապա Հայաստանի իշխանությունները որքան էլ կոշտ պատասխանեն՝ Ադրբեջանն այդ քայլին չի գնա։ Այսինքն, եթե Ադրբեջանին պետք լինի ագրեսիա անել, նրանց պատրվակ պետք չի, նրանք կհորինեն այդ պատրվակը։ Հետևաբար, ամենևին էլ այդպես չէ, որ եթե ՀՀ իշխանություններն իրենց խելոք պահեն ու մեղմ հայտարարություններով հանդես գան, ապա դրանով Ադրբեջանի ձեռքերը կկապեն, ոչ, չկա նման բան»,- ասաց գործիչը։

Նրա դիտարկմամբ՝ Ալիևը նման հայտարարություններ հնչեցնում է ոչ թե այն պատճառով, որ վատ մարդ է կամ նման տրամադրություն ունի, այլ որովհետև համարում է, որ աշխարհում և տարածաշրջանում տեղի ունեցած փոփոխություններն իրեն իրավունք են տալիս նման հայտարարություններ անել ու կոշտացնել իր հռետորաբանությունը։ Այսինքն, մի կողմ շպրտել խաղաղության բանակցությունները և փաստացի Հայաստանին ներկայացնել վերջնագրեր՝ ամենանվաստացուցիչ բառապաշարով։ Հետևաբար, այս հայտարարությունների պատճառն այն է, որ Հայաստանի իշխանությունները իրենց հաշվարկներում սխալվել են ու պետք է պահեստային տարբերակ ունենային, որ եթե Ադրբեջանը մի կողմ է շպրտում խաղաղության օրակարգը, ապա որոնք են լինելու Հայաստանի քայլերը։ Քայլերը, ոչ թե հայտարարությունները։

Այսինքն, եթե Հայաստանը նման «Պլան Բ» ունենար այսպիսի իրավիճակների համար, , ինչպես նշեց Արմեն Բաղդասարյանը, ապա կարող էր կոշտ պատասխան տալ կամ ընդհանրապես պատասխան չտալ։ Խնդիրը բանավոր հայտարարությունները չեն, այլ այն, թե ինչ կա դրա հետևում, դու կարող ես նման բան ասել, թե ոչ։

«Ադրբեջանը մտածում է, որ կարող է իրեն այդկերպ պահել ոչ միայն Հայաստանի, այլև միջուկային գերտերության՝ Ֆրանսիայի նկատմամբ, տեսեք, թե ինչ տոնով է խոսում։ Խոսում է, որովհետև համարում է, որ կարող է իրեն դա թույլ տալ, որովհետև տարածաշրջանային փոփոխված իրավիճակում ինքնին իր դերը ամրապնդել է։ Եթե Հայաստանն էլ նախապատրաստված լիներ էսպիսի շրջադարձի, ապա այդ ժամանակ իմաստ կունենար խոսել այն մասին, թե Հայաստանն ինչ պատասխան կարող էր տալ Ալիևին։

Ես կարծում եմ, որ մենք այդ «Պլան Բ»-ին չունենք, եթե ունենայինք, ապա այսօր Նիկոլ Փաշինյանը համարժեք պատասխան կտար։ Մինչդեռ, այսօր նա, իբր, հակադարձեց Ալիևին, սակայն ընդհանրապես նոր միտք չասեց, այն դեպքում, երբ տարածաշրջանային իրողությունները փոխվել են, պիտի փոխված լիներ նաև Նիկոլ Փաշինյանի ասելիքը։ Ալիևի ասելիքը փոխված է, Ալիևի հռետորաբանությունը, պահանջները փոխվել են, միջազգային իրավիճակը փոխվել է, չի փոխվել միայն Հայաստանի իշխանությունների հռետորաբանությունը։ Նրանք շարունակում են պնդել ինչ -որ խաղաղության օրակարգ մի երկրի հետ, որը հայտարարում է, որ դու ֆաշիստական երկիր ես ու քեզ պետք է ոչնչացնել»,- նկատեց Ա. Բաղդասարյանը։

Նա ընդգծեց, որ ստեղծված նոր իրողություններում ոչ միայն Հայաստանը, այլև մեր ողջ քաղաքական դաշտը անելիք ունի։ «Նախ պետք է հասկանալ, որ նոր պատերազմի հավանականությունը բավականին մեծացել է, ոչ թե նրա համար, որ Ադրբեջանը նման բաներ է ասում, այլ պատճառահետևանքային կապն այստեղ ուրիշ է իրողոըւթյունները ձոխվել են ու դրա համար էլ Ադրբեջանի նախագահը նման կերպ է իրեն պահում։ ԱՅս իրավիճակում Հայաստանը պետք է փորձի հասկանալ, թե ինչ ճանապարհով է հնարավոր երկիրը նվազագույն կորուստներով դուրս բերել այլ իրավիճակից։ Օրինակ, հիմնական քաղաքական լիդերները, կամ իշխանությունները պետք ասենք փակ խորհրդակցություն անցկացնեն, փորձեն հասկանալ, որ, եթե լուծումը Նոյեմբերի 9-ի չարաբաստիկ 9-րդ կետի կատարումն է, ապա դա է պետք անել, եթե ճիշժտը արևմուտքին, օրինակ Ֆրանսիային դիմելն է, ապա պետք է դիմել Ֆրանսիային, որովետև Ֆրանսիան գուցե ինչ-որ բան է մեզ խոստացել, ապա գուցե պետք է նրան դիմել, պետք է բանակցել Իրանի հետ և հասկանալ թե որչոնք են նրանց կարմիր գծերը և արդյոք նրանք կարող են որևէ բան երաշխավորել, թե ոչ։ Այսինքն, պետք է հասկանալ, թե ինչ ճանապարհով է պետք գնալ ու ինչ գին պետք է վճարել դրա համար։ Մեն քհիմա այն վիճակում չենք, որ պառակտված մնանք և ավելին Ալիևի հոխորտանքները փորձենք օգտագործել միմյանց նկատմամբ քաղաքական դիվիդենտներ շահելով»։

Աղբյուր` Փաստինֆո