Փաստ ինֆո

Երևանի ընդհանուր իրավասության քրեական դատարանում՝ դատավոր Կարեն Ֆարխոյանի նախագահությամբ, շարունակվել է Լևոն Քոչարյանի և Սերգեյ Ասատուրովի գործով տուժող ժանաչված ոստիկան Հրաչիկ Խաչատրյանի հարցաքննությունը։

«Փաստինֆո»-ի հաղորդմամբ՝ հարցաքննության ընթացքում պարզվեց, որ Հրաչիկ Խաչատրյանը նախկինում «տուժող» լինելու փորձ ունեցել է։ Ավելին, Խաչատրյանը եղել է այն ոստիկանը, որը բռնություն էր գործադրել Լևոն Քոչարյանի նկատմամբ, վերջինս էլ՝ հաղորդում է տվել ոստիկանի դեմ, ինչից հետո, պարզվել է, որ հենց այդ ոստիկանն էլ իր հերթին է հաղորդում ներկայացրել Լևոն Քոչարյանի դեմ՝ իբրև իրեն հարվածելու համար։ Լևոն Քոչարյանը զուգահեռներ անցկացրեց՝ նշելով, որ մի դեպքում ինքն է տուժող, հարցաքննվել է մի քանի օր անց, մի դեպքում՝ ոստիկանը, որը հարցաքննվել է երկու ժամ անց, այս տարբերակված մոտեցումը, սակայն, «տուժող» ոստիկանը նորմալ է համարում։ Լևոն Քոչարյանին առաջին անգամ Հրաչիկ Խաչատրյանը տեսել է ցույցերի ժամանակ, սակայն երբևէ չի տեսել և չի լսել, որ Լ․ Քոչարյանը ցույցերի ժամանակ որևէ մեկին հայհոյի, բռնություն գործադրի։ Հարցուպատասխանի ընթացքում փաստաբան Ալեքսանդր Կոչուբաևը հետաքրքրվեց՝ ինչու էր Լևոն Քոչարյանին բերման ենթարկելուց հետո մտել ոստիկանապետի մոտ՝ տուժողը նշեց, թե չի մտել, թեև փաստաբանն ասել էր, որ տեսել է նրան։ Փաստաբանն ուղիղ հարց հղեց՝ «Խնդրում եմ նայել Լևոն Քոչարյանի աչքերի մեջ, ասել՝ ինչու եք ծեծել նրան ավտոմեքենայում», ինչի դեմ առարկեցին հանրային մեղադրողները՝ նշելով, թե «բացարձակ էմոցիոնալ ֆոնի ներքո աչոկներ են հավաքում»։ Դատախազը հայտարարեց, թե որևէ կերպ հաստատված չէ, որ տուժողը ծեծի է ենթարկել Լ․ Քոչարյանին։ Արամ Վարդևանյանն էլ իր հերթին առարկեց՝ դատախազի հայտարարությունների առնչությամբ՝ նշելով․ «այս ինչ արտահայտություն էր, եթե ես էլ շատ արտահայտությունների ինձ տուրք տամ ու հասանելի ինձ դարձնեմ, ապա շատ ավելի հետաքրքիր կանցնի նիստը, բայց դա չեմ անում՝ դատարանի նկատմամբ հարգանից ելնելով։ Հիմա մենք էլ խոսենք՝ «աչոկներով», «բոչկեքով», «մուտիտներով»․․․ պատվարժան դատարան․ խնդրում եմ՝ մի հատ․․․»։ Լևոն Քոչարյանն ընդգծեց՝ այն մարդն է եկել այստեղ ցուցմունք տալիս, որ հենց ինքն է նման բան արել իր նկատմամբ, գետնին ընկած մարդուն (Ասատուրովին) խփում էր։ Տուժողը պնդեց՝ չի հարվածել Լևոն Քոչարյանին, ինչին արձագանքելով Կոչուբաևը նշեց՝ «բա տեսանյութերում, որ երևում էր, դա ինչ է, լռության իրավու՞նքն էիք պարզաբանում, իրավունքներն էիք պարզաբանում, այդ շարժումներն ինչի՞ նման են»։ Հարցին՝ արդյո՞ք վնասվածք ստացել է Լևոն Քոչարյանի հարվածներից՝ ոստիկանը նշեց, որ ոտքի հատվածում ցավ է զգացել, որն անցել է։

Հիշեցնենք, որ 2023թ․ սեպտեմբերի 22-ի ոստիկանության ծառայողները դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։ Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։

Հեղինակ՝ Իզաբել Սահակյան

Աղբյուր` Փաստինֆո