Փաստ ինֆո

ԱԺ ամբիոնից Նիկոլ Փաշինյանի հնչեցրած կեղծիքը քողարկող հիմքեր դատախազաքննչական մարմինները գտնել չեն կարողանում. Երկու կողմն էլ թույլ է տվել պաշտոնեական հանցանք ու մեկը մյուսին պարտակելով հանցանքների շղթան ձնագնդի նման մեծանում է:

Այս պարագայում խոսքը գնում է Հովիկ Աղազարյանի մասին, երբ քպական իշխանությունը չխնայեց անգամ յուրայինին` միայն այն բանի համար, որ նա Փաշինյանի հրապարակավ հնչեցրած հրաժարականի պահանջը չկատարեց:

Դեկտեմբերի 2-ին Աղազարյանը հայտարարեց Նիկոլ Փաշինյանի խնդրանք-պահանջագիրը մերժելու եւ պատգամավորական մանդատը վայր չդնելու մասին, ինչից հետո՝ դեկտեմբերի 3-ին, ՔՊ վարչության որոշեց Հովիկ Աղազարյանին հեռացնել կուսակցությունից։ Որպես Աղազարյանի հեռացման պատճառ նշվեցին պետական և կուսակցական նշանակության կոնֆիդենցիալ տեղեկատվության արտահոսքերը, ինչպես նաև հանրության բարոյական նորմերի կոպիտ խախտումները։ Ավելին` հայտնի դարձավ, որ նախկին քպական պատգամավորի առաջ դրվել էր նաեւ նեղ անձնական բնույթի տեղեկություններ` դրանք հրապարակելու նախազգուշացմամբ: Ընդ որում, այդ տեղեկությունները քպականների մոտ հայտնվել էին Աղազարյանի հեռախոսից, որը քննիչն էր առգրավել:

ԱԺ ամբիոնից Նիկոլ Փաշինյանը հայտարարել էր, թե այդ տեղեկություններն իրեն տրամադրել է օպերատիվ մարմինը, թերեւս փորձելով իր պաշտպանության տակ վերցնել քննիչին, որի մոտից տեղի էր ունեցել արտահոսքը ու հասել իրեն։ Բայց հընթացս հնչեցված պատճառաբանությունը հարցերի մի ամբողջ շարանի հիմք տվեց ու բացահայտեց Փաշինյանի սուտը, եթե չասենք, որ հանցագործ դարձրեց օպերատիվ մարմիններին, քանի որ, ինչպես «Փաստինֆո»-ին դեկտեմբերի 9-ին հայտնել էին դատախազությունից՝ Հովիկ Աղազարյանի կողմից պետական գաղտնիք պարունակող արտահոսքեր կազմակերպելը քննության առարկա է դարձվել ոչ թե օպերատիվ մարմնի, այլ հրապարակումների հիման վրա, իսկ հրապարակումների առիթն էլ Փաշինյանն ու նրա թիմակիցներին էին:

ՀԿԿ-ից էլ ավելի ուշ հայտնել էին, որ դատախազությունից ստացված հաղորդման հիման վրա քրեական վարույթ է նախաձեռնվել՝ պետական գաղտնիքի հրապարակման հատկանիշներով։

«Փաստինֆո»-ն գրավոր հարցում էր ուղարկել ՀԿԿ-ին` պարզելու, թե արդյոք ԱԺ պատգամավոր Հովիկ Աղազարյանի հեռախոսն առգրավելու որոշում կայացվել է, եթե այո, ապա ինչ վարույթի շրջանակներում, եթե ոչ, ապա ինչ հիմքով է վերցվել հեռախոսը, արդյոք օպերատիվ մարմնից վարույթն իրականացնող մարմինը ստացել է տեղեկություններ` Աղազարյանի կողմից ենթադրյալ պետական գաղտնիքի արտահոսքի վերաբերյալ, եթե այո, ապա ինչու քրեական վարույթ չի նախաձեռնվել` օպերատիվ տվյալների հիման վրա, արդյոք քննության առարկա դարձվել է օպերատիվ մարմնի կողմից նման տեղեկությունները նախաքննական մարմնից թաքցնելու փաստի հիման վրա: ՀԿԿ-ից հոդաբաշխ պարզաբանում չի ներկայացվել: Թվարկված հարցերին ի պատասխան Հակակոռուպցիոն կոմիտեից նշել են, թե ԱԺ պատգամավոր Հովիկ Աղազարյանից բջջային հեռախոսն առգրավվել և դրանում առկա տեղեկություններն օգտագործվել է բացառապես ՀՀ քրեական դատավարության օրենսգրքով նախատեսված հիմքերով և ընթացակարգերով:
Մյուս հարցադրումներին ՔԿ-ից չեն պատասխանել` հղում կատարելով Տեղեկատվության ազատության մասին օրենքի 8-րդ հոդվածի 1-ին մասի 3-րդ կետին` նախաքննական գաղտնիքին:

Հեղինակ՝ Իզաբել Սահակյան

Աղբյուր` Փաստինֆո