Փաստ ինֆո

Ջրային կոմիտեի նախկին ղեկավար, Աբովյանի նախկին քաղաքապետ Վահագն Գևորգյանը երեկ ձերբակալվել է՝ կոռուպցիոն գործով։ Հակակոռուպցիոն կոմիտեից «Փաստինֆո»-ի հետ զրույցում հայտնեցին, որ ՀԿԿ-ում քննվող քրեական վարույթի շրջանակներում Գևորգյանին մեղադրանք է ներկայացվել։ Թե ինչ է մեղսագրվում նրան՝ պաշտոնապես դեռևս հայտնի չէ։ Քննիչը միջնորդել է Վահագն Գևորգյանի նկատմամբ որպես խափանման միջոց կիրառել կալանավորումը, որը բավարարվել է մասամբ։ Հակակոռուպցիոն դատարանից «Փաստինֆո»-ի հետ զրույցում հայտնեցին, որ Վահագն Գևորգյանի նկատմամբ որպես խափանման միջոց է ընտրվել տնային կալանքը՝ երկու ամիս ժամկետով։

Հիշեցնենք, որ օրերս Նիկոլ Փաշինյանի որոշմամբ՝ Վահագն Գևորգյանն ազատվել է Ջրային կոմիտեի ղեկավարի պաշտոնից, որը զբաղեցնում էր 2021թ դեկտեմբերի 17-ից։ Մինչ այդ Գևորգյանը զբաղեցնում էր Աբովյանի քաղաքապետի պաշտոնը, որում 2015թ․ ընտրվել էր ԲՀԿ ցուցակով, ապա՝ վերընտրվել, սակայն՝ որպես անկուսակցական։

2020թ․ Վահագն Գևորգյանի նկատմամբ հետապնդում է իրականացվել՝ ՀՀ քրեական օրենսգրքի (2003թ․) 315․2 հոդվածի հատկանիշներով, նրա նկատմամբ որպես խափանման միջոց էր ընտրվել երկրից չհեռանալու մասին ստորագրությունը:
«Ձեռք բերված ապացույցների բավարար համակցությամբ հիմնավորվել է, որ ի պաշտոնե պարտավոր լինելով կանխարգելել և կասեցնել ինքնակամ կառույցի հետագա շինարարությունը, օրենքով սահմանված կարգով ապահովել դրա հետևանքների վերացումը՝ վերջիինս դիտավորությամբ չի կատարել իր պարտականությունները, ինչպես նաև՝ հողամասն ինքնակամ զավթած, ինքնակամ կառույց իրականացնող կամ իրականացրած անձանց նկատմամբ դիտավորությամբ ամբողջ ծավալով չի կիրառել վարչական իրավախախտումների վերաբերյալ օրենսդրությամբ նախատեսված վարչական պատասխանատվության միջոցները: Իսկ արդեն կիրառվածը կրել է ձևական բնույթ: Արդյունքում վերոնշյալ տարածքում ՍՊԸ կողմից շարունակվել է համայնքին պատկանող 2240 մետր մակերեսով հողամասի զավթումը և բազմաբնակարան շենքի ինքնակամ կառուցումը»,- նշված էր դատախազության հաղորդագրությունում։

Հեղինակ՝ Իզաբել Սահակյան

Աղբյուր` Փաստինֆո