Փաստ ինֆո

2024թ․ Հայաստանը մոտեցրեց իր պետականության անկման կարմիր գծերին և մարտահրավերները այնքան են խտացված, որ մտավախություն կա, որ այս իշխանությունների մնալու դեպքում 2025թ․առաջին ամիսներին մոտ ենք լինելու պետականության կորստին։ Ն․ Փաշինյանը քանիցս խոսել է Հայաստանի պետականության կորստի մասին։ «ՓաստԻնֆոյի» եթերում ասել է «Արդարություն և ժողովրդավարություն» ՀԿ նախագահ Նաիրա Զոհրաբյանը։

Բանախոսի դիտարկմամբ, Ն․ Փաշինյանը հասկանում է, որ թակարդում է հայտնվել և շատ լավ գիտի, որ սողանցք չկա, ուստի իր դավաճանության համաբաժնետեր է անհրաժեշտ։ Ն․ Փաշինյանը երբեք ֆիգուր չի եղել։ 2018թ․ հասարակությանը նստացրել է ատելության թմրասեղի վրա։ Նա ընդամենը գործիք էր, որով արտաքին խաղացողները, որոնք սպասարկում են թուրք-ադրբեջանական շահը՝ իրականացրեցին և սկսեցին Հայաստանի կործանման գործընթացը։

Փորձագետը նշում է, որ Ն․ Փաշինյանը փորձել է արյունով լեգիտիմացնել Արցախի հանձնումը։ Հասկանում է, որ առաջիկա ընտրություններին ընդառաջ խնդիր է ունենալու և չի կարողանալու իր վերարտադրությունը ապահովել։

Անդրադառնալով Հայաստանում ադրբեջանցիների վերաբնակեցմանը, բանախոսը նշում է, որ վերաբնակեցում տեղի ունենալու է, քանի որ Հայաստանը վավերացրել է Եվրոպայի խորհրդի բոլոր այն կոնվենցիաները, որոնք ենթադրում են փախստականների վերադարձ։ Այստեղ խնդիրը Հայաստանը ներսից պայթեցնելն է, քանի որ ընտրական օրենսգրքով խորհրդարանում պետք է ունենան իրենց պատգամավորը, ցանկության դեպքում՝ իրենց դպրոցը, մշակութային կենտրոնները։ Այսինքն մեր մեջ ներդնելու ենք 300․000 «ռամիլ սաֆարովներ»։ Հայաստանը ականապատվելու է և ամեն օր պայթելու ենք այդ ականի վրա։

«Նոր աղետը շատ մոտ է։ Ն․ Փաշինյանին, նրա ռեժիմին խժռելու է 2018թ․ իրենց իշխանության բերած ժողովուրդը։ Այս ռեժիմի վախճանը մոտ է։ Մեծ պայթյուն է լինելու»,- ասել է Ն․ Զոհրաբյանը։

Մանրամասները՝ տեսանյութում։

Աղբյուր` Փաստինֆո