Փաստ ինֆո

ՀՀ ԱԳՆ-ն չի հերքել Ադրբեջանի նախագահ Իլհամ Ալիևի հայտարարությունն առ այն, որ 300 000 ադրբեջանցիներ դիմել են ՀՀ կառավարությանը վերադարձի պայմաններ ստեղծելու խնդրով։ Հիշեցնենք, որ նման հայտարարություն Ալիեւը հնչեցրել էր դեկտեմբերի 18-ին՝ նշելով, որ այդ հարցի շուրջ դեռ ՀՀ իշխանությունների պատասխանին են սպասում։

«Փաստինֆո»-ն նույն օրը հարցում էր ուղարկել ՀՀ կառավարությանը՝ խնդրելով պարզաբանել, թե արդյոք իրապես ՀՀ կառավարությունը նման դիմումներ ստացել է։ Մենք խնդրել էինք պարզաբանել, թե երբ, ինչ ձևաչափով և ում կողմից են դիմումները փոխանցվել ՀՀ կառավարությանը, ինչպես նաեւ հայտնել, թե որքանով է ՀՀ կառավարությունը դիտարկում 300 000 ադրբեջանցիների Հայաստանում բնակություն հաստատելու հնարավորությունը։

Կառավարությունից մեր հարցումը հասցեագրել էին ԱԳՆ-ին, որտեղից էլ այսօր ի պատասխան ստացել ենք մի գրություն, որով, ըստ էության, չեն հերքել Ալիեւին ու միաժամանակ որեւէ պարզաբանում չեն տվել հայ հանրությանը հուզող այդ հարցի վերաբերյալ։

Մասնավորապես՝ ԱԳՆ-ից մեջբերել են վարչապետ Նիկոլ Փաշինյանի դեկտեմբերի 19-ին տված հարցազրույցից միայն մի հատված։

Ներկայացնում ենք այդ հարվածն ամբողջությամբ.

«Այսպես կոչված «Արեւմտյան Ադրբեջանի» խոսույթով պաշտոնական Բաքուն ցանկանում է առարկայացնել Հայաստանի Հանրապետության նկատմամբ ունեցած տարածքային պահանջները, որոնք ինչպես վերը ցույց տվեցի, արձանագրված են Ադրբեջանի Սահմանադրության մեջ: Եթե այդպես չէ, ու մենք մեր ընկալումներում սխալվում ենք, ուրեմն Արեւմտյան Ադրբեջան ասելով պետք է հասկանալ Ադրբեջանական Հանրապետության Ղազախի, Թովուզի, Աղստաֆայի, Գեդաբեյի, Դաշքեսանի, Քելբաջարի, Լաչինի, Կուբաթլուի, Զանգելանի շրջանները: Հետեւաբար՝ մարդկանց վերադարձը այնտեղ Ադրբեջանի ներքին գործն է, եւ Հայաստանի Կառավարությունն այստեղ անելիք ու քննարկելիք չունի, բացի այն հարցերից, որ արդեն քննարկում է Ադրբեջանի հետ: Նկատի ունեմ՝ բնականոն հարաբերությունների հաստատումը, որոնք կապահովեն, այդ թվում, Ադրբեջանի արեւմտյան եւ Հայաստանի արեւելյան սահմանների անվտանգությունը»:

Սրանից հետեւում է, որ դիմում ստացվել է, սակայն ԱԳՆ-ն խուսափում է ասել, թե ինչ ձեւաչափով է դա տեղի ունեցել։

Աղբյուր` Փաստինֆո