Փաստ ինֆո

ՀՀԿ փոխնախագահ Արմեն Աշոտյանին՝ ԵԺԿ համաժողովին օնլայն մասնակցելուն թույլատրելու միջնորդության լուծումը հետաձգվեց։

«Փաստինֆո»-ի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, այսօր շարունակվել է ՀՀԿ փոխնախագահ Արմեն Աշոտյանի և մյուսների գործով դատավարությունը։

Արմեն Աշոտյանի փաստաբան Ռուբեն Մելիքյանը միջնորդություն է ներկայացրել՝ խնդրելով թույլատրել, որ Արմեն Աշոտյանն օնլայն մասնակցի Եվրոպական ժողովրդավարական կուսակցության համաժողովին կամ ձայնագրել և փոխանցել տեսաելույթ, որն իրենից ներկայացնում է գործառույթ, որով՝ մի նժարին քաղաքական գործունեություն իրականացնելու իրավունքն է, մյուս կողմից՝ այդ համաժողովին չի մասնակցի որևէ մեկը, որը կարող է կապ ունենալ սույն վարույթի հետ։ Այս միջնորդությունը, փաստաբանի դիտարկմամբ, ոչ միայն իրավունքի չարաշահում չէ, այլև՝ բնական է, որ դատարանը նախորդ որոշման համատեքստում սա թույլատրի։ Արմեն Աշոտյանն էլ նկատեց՝ խոսքը տարեսկզբյան անդրանիկ հավաքի մասին է, որին ինքը ներկայացնում է ՀՀԿ-ն՝ 2012թ․-ից, օրակարգը նաև աղերսներ ունի Հայաստանի առջև ծառացած անվտանգային խնդիրներին, որոշակի հարթակներ կան՝ ուղերձներ հղելու։ Աշոտյանն ընդգծեց՝ միջնորդությունը պայմանավորված է ոչ միայն քաղաքական գործունեության իրականացման սահմանափակման ժամանակավոր վերացման, այլև՝ Հայաստանի արտաքին և քաղաքական ներքին զարգացումների վերաբերյալ համապատասխան տեղեկություններ ներկայացնելու հնարավորությամբ։

«Իմ խոսքի բովանդակությունը բացառապես կառուցված է լինելու Հայաստանի ազգային շահերի, պատկերացումների բարձրաձայնման հնարավորությամբ, որևէ առնչություն չունի այս դատավարության վկաներին և այլն։ Առաջին անգամ ԵՄ-ն՝ Եվրոպական հանձնաժողովի կազմում սահմանել է անվտանգության հարցերով եվրոհանձնակատարի պաշտոնը, առաջին անգամ հանձնակատարը մասնակցելու է ԵԺԿ նիստին։ Կարծում եմ՝ ավելորդ է ասել, թե հատկապես մեր արտաքին քաղաքական օրակարգի հետ կապված զարգացումների պարագայում՝ ԵՄ դիտորդական առաքելության, ադրբեջանական կողմի վերաբերմունքի և այլ շեշտադրումներով՝ բարձրաձայնել պաշտոական հայկական տեսակետից խիստ տարբերվող տեսակետ»,- նշեց Աշոտյանը։

Իսկ թե արդյոք կմասնակցեն կուսակցական ընկերներից՝ Աշոտյանը նշեց, որ եթե դատարանը թույլ չտա, ապա կմասնակցեն։

«Երբ Լևոն Արոնյանը լքեց ՀՀ շախմատի թիմը, բնականաբար շախմատի թիմում խաղաց իրենից գուցե ավելի ուժեղ, բայց երբեք այդ առաջին խաղատախտակին չխաղացող մարդ։ Այսինքն՝ օրինակը, որ դու չգնաս, քող տեղն այլ մարդ գնալու է, բազմաթիվ ոլորտներում կա, փոխարինումները լինում են ոչ միայն համարժեք, այլև՝ գուցե ավելի ուժեղ, բայց հարցը դրա մեջ չէ։ Խնդիրը նրանում է, որ ես մասնակցեմ»,- նշեց Աշոտյանը՝ հավելելով, որ յուրաքանչյուր մարդ ունի իր շփման որոշակի շրջապատը, ազդեցության հնարավորությունները, ամեն խոսքն իր արժեքն ունի։

Աշոտյանի խոսքով՝ խնդիրն այն է, որ շատ իրատեսական լուծում են առաջարկում, դատարանը սահմանափակումների շրջանակը պահպանում է,մյուս կողմից՝ լուծումներ են առաջարկում, որոնք ոչ թե հակասում են, այլ՝ ապացուցում են, որ այդ որոշումը և ընթացիկ միջնորդությունները համադրելի են։

«Միջնորդում ենք լուծման համար, որը համարում ենք նվազագույն դիմադրության ճանապարհ, որ և գալյերը կուշտ լինեն, և գառները կենդանի»,- ասաց նա։

Այս միջնորդության լուծումը հետաձգվեց՝ մինչև չտրամադրվի ժողովի հետ կապված փաստաթուղթը։Դոլմազյանը նշեց, որ դեռ ժամանակ կա քննարկելու, եթե դատարանը բավարարի միջնորդությունը, ապա Աշոտյանը կմասնակցի նիստին՝ օնլայն։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես 2022 տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։ Արմեն Աշոտյանը 2023 թվականի հունիսից մինչև 2024թ․ սեպտեմբերի 11-ը կալանքի տակ է գտնվել։ Դատարանը Աշոտյանի նկատմամբ որպես խափանման միջոց է կիրառել տնային կալանքը և գրավը՝ 25 մլն դրամի չափով։

Հեղինակ՝ Իզաբել Սահակյան

Աղբյուր` Փաստինֆո