Փաստ ինֆո

Նախօրեին ՀՀ երեք նախագահներին ԼՂՀ բանակցային պրոցեսի շուրջ բանավեճի հրավիրած Փաշինյանին, բնականաբար, նախագահներից որևէ մեկը չէր արձագանքելու։

Եվ իրոք, ինչպե՞ս կարող էին բանակցային պրոցեսի մեջ երեք նախագահներից ամեն մեկն իր առանձին և առանձնակի լուման ներդրած լինելով՝ բանավիճել մեկի հետ, ով թշնամի պետության նախագահից՝ ալիև կրտսերից բացի այլ անձի հետ ԼՂՀ հարցի բանակցային գործընթացի պատմությունը չի քննարկել։ Ընդ որում, ի սկզբանե հպարտորեն հայտարարելով, թե բանակցային պրոցեսը սկսում է իր զրո կետից։

Իր զրո կետից սկսած «բանակցությունների» արդյունքն այսօր ազգովի տեսնում ենք։

Արցախի կորուստ, արցախցիների տեղահանություն իրենց բնօրրանից, հայրենիքից և ծննդավայրից, Հայաստանի ինքնիշխանության կորուստ, տարածքային զգալի կորուստներ, բարեկամ և դաշնակից պետությունների հետ հարաբերությունների սառեցում և հայության ու Հայաստանի գլխին մշտապես կախված պատերազմի սպառնալիք․․․

Ի վերջո, ի՞նչ բանավեճի մասին կարող է խոսք լինել Փաշինյանի հետ, որը ցանկացած դեպքում իր անգիտությունը, անտեղյակությունը մշտապես փորձում է կոծկել ժողովրդի ասած՝ «լեզվին տալով»։ Հիմա՝ այդ միջո՞ցն է ուզում կիրառել՝ սեփական անձը փորձելով մաքրաջրե՞լ․․․

Վեց և ավելի տարիներ զբաղեցնելով ՀՀ վարչապետի աթոռը՝ նա այդպես էլ բոբիկ մնաց ԼՂՀ բանակցային պրոցեսի մանրամասնություններին նույնիսկ տեղյակ լինելու մակարդակից։

Այդ են վկայել նրա բոլոր պաշտոնական հանդիպումներն՝ այս համատեքստում, ինչպես նաև՝ հարցազրույցներն՝ ինչպես օտար, այնպես էլ՝ հայաստանյան լրատվամիջոցների հետ, ԱԺ-ում իր հրապարակային ելույթները․․․

Հիմա՝ բացառապես պոպուլիզմի մեջ հմտացած, մշտապես՝ լուրջ թեման անլրջացնող և բոլոր դեպքերում՝ ի շահ թուրքադրբեջանական տանդեմի և ընդդեմ Հայաստանի ու Արցախի գործող Փաշինյանի հետ ի՞նչի շուրջ պիտի բանավիճեին պետական և քաղաքական լրջմիտ գործիչները՝ ՀՀ նախկին երեք նախագահները։

Նրանցից երկուսը՝ Ռոբերտ Քոչարյանը և Սերժ Սարգսյանը նույնիսկ սույն անձի խելագարության կանխավարկածով առաջնորդվելու դեպքում անգամ չէին կարող պատկերացնել, որ Հայաստանը երբևէ կարող է ունենալ պետականակործան վարչապետ, որը թշնամի պետությունների ձեռքին բութ գործիք կդառնա՝ ընդդեմ Արցախի, Հայաստանի և ողջ հայ ազգի։

Բայց հիշենք նաև սույնի մասին նրան ավելի լավ ճանաչողի՝ Լևոն Տեր-Պետրոսյանի հայտնի խոսքը՝ «ազգակործան պատուհաս»։

Աղբյուր` Փաստինֆո