Փաստ ինֆո

«ՔՊ»-ից հեռացված Հովիկ Աղազարյանի խիստ մասնավոր անձնական կյանքի անձեռնմխելիության խախտման, մասնավորապես, նրա նամակագրության գաղտնիությունը խախտելու համար քրեական վարույթ չի նախաձեռնվել։ ՀԿԿ քննիչը, կայացնելով քրեական վարույթ չնախաձեռնելու որոշում, այն պատճառաբանել է՝ նշելով, թե չի փաստվել այնպիսի դեպք կամ գործողություն կամ անգործություն, որին ողջամտորեն կարող է տրվել քրեական օրենսգրքով նախատեսված նախնական իրավական գնահատական։ Հովիկ Աղազարյանի փաստաբան Հակոբ Ճարոյանը «Փաստինֆո»-ի հետ զրույցում հայտնեց, որ քրեական վարույթ չնախաձեռնելու որոշումը քննիչը համաձայնեցրել է հսկող դատախազի հետ։ Փաստաբանը որոշումը բողոքարկել է վերադաս դատախազին՝ գլխավոր դատախազի անունով՝ պահանջելով քրեական վարույթ նախաձեռնել։

«Հավանականությունը քիչ է, որ հարուցեն։ Եթե քննիչը մերժում է, գրություն է կազմում, դա համաձայնեցնում է դատախազի հետ, գրությունից էլ երևում է, որ գրությունը համաձայնեցրել է հսկող դատախազի հետ»,- նշեց փաստաբանը՝ հավելելով, որ վերադաս դատախազին հասցեագրված բողոքի պատասխանը ստանալուց հետո, ամենայն հավանականությամբ, բողոք կներկայացնի նաև դատական կարգով։

Ինչ վերաբերում է ՀԿԿ-ում ՝ պետական գաղտնիքի արտահոսքի վերաբերյալ նախաձեռնված քրեական վարույթին, ապա այս գործով Աղազարյանի մասնակցությամբ դեռևս գործողություններ չեն իրականացվել։

Հիշեցնենք, որ Հովիկ Աղազարյանը դեկտեմբերի 2-ին հայտարարեց Նիկոլ Փաշինյանի «խնդրանքը» մերժելու եւ պատգամավորական մանդատը վայր չդնելու մասին, ինչից հետո՝ դեկտեմբերի 3-ին, ՔՊ վարչության որոշեց Հովիկ Աղազարյանին հեռացնել կուսակցությունից։ Որպես Աղազարյանի հեռացման պատճառ նշվում է պետական և կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումները։ Ընդ որում, այդ «արտահոսքերի» մասին իշխանություններն իմացել են այն բանից հետո, երբ ՀԿԿ-ում քննվող՝ ԱԺ-ում Արգիշտի Քյարամյանի և Աղազարյանի միջադեպի վերաբերյալ քրեական վարույթի շրջանակներում առգրավվել է Հովիկ Աղազարյանի հեռախոսը։ Այլ խոսքով՝ քննիչը ծանոթացել էր հեռախոսի բովանդակությանն ու նախաքննական գաղտնիք պարունակող տեղեկությունները հասանել էին դարձել Նիկոլ Փաշինյանին ու ՔՊ-ին։

ԱԺ ամբիոնից Նիկոլ Փաշինյանը հայտարարել էր, թե այդ տեղեկություններն իրեն տրամադրել է օպերատիվ մարմինը։ Մինչդեռ, ինչպես պարզվել է, դատախազությունն ու նախաքննական մարմինը տեղյակ չեն եղել օպերատիվ տվյալներից, քանի որ, ինչպես «Փաստինֆո»-ին դեկտեմբերի 9-ին հայտնել էին դատախազությունից՝ Հովիկ Աղազարյանի կողմից պետական գաղտնիք պարունակող արտահոսքեր կազմակերպելու վերաբերյալ հրապարակումն է ուղարկվել ՀՀ հակակոռուպցիոն կոմիտե՝ վարույթ նախաձեռնելու հարցը լուծելու։ ՀԿԿ-ից այսօր հայտնել են, որ դատախազությունից ստացված հաղորդման հիման վրա քրեական վարույթ է նախաձեռնվել՝ պետական գաղտնիքի հրապարակման հատկանիշներով։

Հովիկ Աղազարյանի փաստաբան Հակոբ Ճարոյանն էլ հանցագործության մասին հաղորդում էր ներկայացրել՝ պահանջելով քրեական վարույթ նախաձեռնել՝ նամակագրության գաղտնիությունը խախտելու, Աղազարյանի անձնական տվյալներն այլ անձանց փոխանցելու դեպքի առթիվ։

Հեղինակ՝ Իզաբել Սահակյան

Աղբյուր` Փաստինֆո