Փաստ ինֆո

Երևանի ընդհանուր իրավասության քրեական դատարանում՝ դատավոր Դավիթ Արղամանյանի նախագահությամբ, այսօր կայացել է «ՔՊ»-ից այլևս հեռացված պատգամավոր Հակոբ Ասլանյանին ավտոբուսում հրապարակային պարսավանքի ենթարկելու գործով դատալսումները։

Դատական այսօրվա նիստում նախատեսված էր Սամվել Վարդանյանի ցուցմունքը։ Թեև մեղքը չընդունող մեղադրյալի մասին է խոսքը, սակայն դատարանը որոշել էր, որ հարցեր պետք է հղի առաջինը մեղադրանքի կողմը, քանի որ մեղադրող կողմն է միջնորդել հարցաքննել նրան։ Դատարանի այս գործողությունների դեմ առարկեց պաշտպան Ռուբեն Մելիքյանը՝ նշելով, որ մեղքը չընդունող մեղադրյալը չի կարող լինել մեղադրանքի կողմի վկա։ Հանրային մեղադրող Հայկ Ավետյանն էլ հակադարձեց՝ հիշեցնելով, որ ինքն էր միջնորդել հարցաքննել Վարդանյանին, հետևաբար, խնդրեց թույլատրել սկսել հարցաքննությունը։ Մելիքյանն արձանագրեց՝ քրեական դատավարության խախտումը, նկատեց՝ միջնորդություն եղել է թե՛ պաշտպանության կողմից, թե՛ մեղադրանքի կողմից։ Դատարանն ընդմիջում հայտարարեց՝ դատական նիստի արձանագրությունն ուսումնասիրելու համար, արդյունքում՝ դատարանը որոշեց, որ մեղադրյալը պետք է հարցաքննվի պաշտպանության կողմի միջնորդությամբ։

Աշխատանքային օրվա ավարտով պայմանավորված՝ դատական նիստը հետաձգվեց, Վարդանյանի հարցաքննությունը՝ կկայանա հաջորդ դատական նիստին։ Դատական նիստի ավարտից հետո լրագրողների հետ զրույցում Վարդանյանի պաշտպան Ռուբեն Մելիքյանը պնդեց՝ Վարդանյանը հանցանք չի գործել, հակառակը՝ ինքն է դարձել հանցագործության զոհ՝ խոշտանգվելով։

Հիշեցնենք, որ Սամվել Վարդանյանի և Հակոբ Ասլանյանի մասնակցությամբ միջադեպը հանրային տրանսպորտում տեղի է ունեցել 2024թ․ ապրիլի 15-ն։ Երիտասարդը, տեսնելով ՔՊ-ականին, հանրային պարսավանքի է ենթարկել նրան՝ անվանելով «հակահայ վիժվածք», ինչից հետո, ըստ հրապարակված տեսանյութի, Հակոբ Ասլանյանը հարվածել է երիտասարդին, թեև վերջինս հերքում է, որ խփել է՝ պնդելով, թե իբրև հրում էր պարզապես։ Դեպքի մասին հանրայնացումից կարճ ժամանակ անց իշխանությունների կողմից հրապարակային հայտարարություններ եղան՝ երիտասարդին պատասխանատվության ենթարկելու պահանջով, ինչից հետո երիտասարդը ձերբակակվեց՝ խուլիգանության կասկածանքով։ Պարզվել է, որ Հակոբ Ասլանյանը հանցագործության մասին հաղորդում է ներկայացրել, ինչի հիման վրա նույն օրը ՀՀ ՔԿ ԵՔՔՎ ծանր հանցագործություններ քննության բաժնում ՀՀ քրեական օրենսգրքի 297-րդ հոդվածի 1-ին մասի հատկանիշներով նախաձեռնվել է քրեական վարույթը: Երիտասարդը ձերբակալվել էր, ապա՝ վերցվել տնային կալանքի։ Սամվել Վարդանյանը մեղադրվում է ՀՀ Քրեական օրենսգրքի 297-րդ հոդվածի 1-ին մասի ՝ խուլիգանության և ՔՕ 329-րդ հոդվածի 2-րդ մասի՝ անձի նկատմամբ քաղաքական հայացքներով պայմանավորված հրապարակայնորեն ատելության խոսք արտահայտելու հատկանիշներով։

Նկատենք, որ Սամվել Վարդանյանը ձերբակալվածի կարգավիճակում խոշտանգվել է դիմակավորված անձանց կողմից։ Այս գործով ձերբակալվածներ չկան։

Հեղինակ՝ Իզաբել Սահակյան

Աղբյուր` Փաստինֆո