Փաստ ինֆո

Նիկոլ Փաշինյանը համաձայնվեց Ալիեւի նոր բոլոր պահանջներին։ «Փաստինֆո»-ի հետ զրույցում նման կարծիք է հայտնել Արցախի Հանրապետության Ազգային Ժողովի պատգամավոր Մետաքսե Հակոբյանը։

«Անկեղծ ասած՝ սպասում էի Ալիևի նոր պահանաջներից հետո ինչ-որ արձագանք, կամ լռություն, կամ ավելի թույլ արձագանք, բայց, ըստ էության, Նիկոլ Փաշինյանը համաձայնվեց բոլոր զիջումներին», - ասաց Արցախի ԱԺ «Արդարություն» խմբակցության պատգամավոր Մետաքսե Հակոբյանը՝ ավելացնելով. «երեկ համոզմունք ունեցա, որ Ալիևի այդ բոլոր պահանջները Հայաստանի ղեկավարն ընդունեց»։

Փաշինյանը խոսել է միջազգային հարցերի լուծումներից հրաժարվելու մասին, նշել, որ ոչ միայն միջազգային դատական ատյաններում վեճերը լուծելուց պետք է հրաժարվել, այլեւ բուն վեճերից, եւ որ այս փուլում լուծումներ են փնտրում նաեւ անհատական բնույթի հումանիտար խնդիրների մասով։ Արցախից բռնի տեղահանված պատգամավորը վստահություն հայտնեց, որ մեթոդներ կգտնեն։

«Իրավաբան չեմ, չգիտեմ, թե ինչ իրավական ճանապարհ կգտնեն անհատական հայցերից հրաժարվելու առումով , բայց կարող եմ պատկերացնել Ժողովրդավարության բաստիոն» հռչակված երկրում ինչպե՞ս կարող է դա արվել»,- նշել է պատգամավորը եւ հավելել, որ անհատական հայցերը բավական դժվարին ու երկար պրոցեսներ են անցնում, իսկ այդ ընթացքում բռնաճնշումներից սկսած մինչև իրենց հայտնի այլ միջոցներ կարող են կիրառել։

Մեր զրուցակիցը համոզված է, որ այս իշխանությունները կկատարեն Ադրբեջանի ցանկացած պահանջ։

«Հիմա սա վերջն է, կգնա՞ն իրենց այդ օրհասական «Խաղաղության պայմանագիրը» ստորագրելու, ինչը քիչ հավանական է թվում, թե Ադրբեջանն արդեն նոր ավելի մեծ պահանջներ առաջ կքաշի։Հիմա մենք արդեն պետք է սպասենք, ուրիշ տարբերակ չկա, իսկ այն, որ հաջորդ պահանջը դրեցին առ այն, որ Արցախի ռազմաքաղաքական վերնախավի դատավարությանը մասնակցություն ունենան Հայաստանին իշխանությունները, ես նաև հակված եմ մտածելու, որ դրան էլ կգնան ու դրա հետևանքները միանշանակ պարզ են», - ասաց Հակոբյանը։

Ալիեւը հայտարարել էր, թե 300.000 հազար ադրբեջանցու Հայաստանում վերաբնակվելու դիմում է ուղարկվել, ինչը Փաշինյանն ու, ընդհանրապես, պաշտոնական Երեւանը որեւէ կերպ չեն արձագանքել, չեն հերքել։ Մ.Հակոբյանի կարծիքով՝ Ադրբեջանի ներկայիս քայլերն իրենց պայմանավորվածությունների շրջանակում է։

«Ադրբեջանը հստակ այդ հայտարարություններն անում է, որովհետև կան նախապես պայմանավորվածություններ այս իշխանությունների հետ։ Եթե հիշում եք՝ դեռևս մինչև պատերազմը Հայաստանի վարչապետն արդեն իսկ խոսում էր համատեղ կեցության մասին ադրբեջանցիների հետ, սա այդ պայմանավորվածությունների շարունակությունն է, որն Ալիևն ուղղակի պահանջում է կատարել իրենց միջև պայմանավորվածությունները։ Այդ պատճառով էլ չեմ կարծում , որ ՀՀ իշխանությունները պիտի հակառակվեն , բնական է, որովհետև Ադրբեջանը 30 տարի շարունակ կարողացել է այդ կեղծ օրակարգը պահել՝ ունենալով Ստեփանակերտի քաղաքապետ, «արևմտյան ադրբեջան» ինչ-որ համայնք և այդ ամենն ուղղակի լեգիտիմացնում է, քանի որ իր դիմաց ունի համապատասխան այն իշխանությունները, որոնք դա անելու են։ Ինչու եմ վստահ դրանում, որովհետև Ադրբեջանը հատկապես 2023 թ. սեպտեմբերի 19-ից հետո սկսեց խոսել այն մասին, որ ցանկացած Արցախ վերադարձող հայի դիմաց մի ադրբեջանցի պետք է վերադառնա Հայաստան, իրենց ձևակերպմամբ ՝ «արևմտյան ադրբեջան»։ Այդ խոսույթը լեգիտիմացրեց հենց Հայաստանի Հանրապետության առաջին դեմքը, խորհրդարանի նախագահը»,- ասել է արցախցի պատգամավորը՝ ընդգծելով, որ սա տգիտության, պատմություն չիմանալու քաղաքական դատարկություն ունենալու հետևանք չէ։

«Այլ հենց պայմանավորվածությունների շղթա, որովհետև բոլորիս համար արդեն հասկանալի է, որ չի կարող համեմատելի լինել Արցախի բնիկ ժողովրդի վերադարձի հարցը՝ Սովետական Միության փլուզման ժամանակ հանրապետությունների ձևավորման և յուրաքանչյուրի իր հանրապետություն վերադարձի հետ։ Երբ իրենք այդ հավասարության նշանը դնում են, այստեղ պարզ է դառնում, որ իրենց խոսքերով ու քայլելով ՀՀ իշխանություններն ապացուցում են, որ դեռևս մինչև 44- օրյա պատերազմն ունեցել են այս պայմանավորվածությունները», - համոզմունք հայտնեց Մետաքսե Հակոբյանը։

Աղբյուր` Փաստինֆո