Փաստ ինֆո

Ազատի զինվորական կացարանում 15 զինծառայողի մահվան իրական հանգամանքներն այդպես էլ մնում են չպարզված։ Այդպես էլ չի տրվում մեծագույն առեղծվածի պատասխանը՝ ինչպես է ստացվել, որ 15 զինծառայող չեն կարողացել արթնանալ բղավոցների ձայնից և փախուստի դիմել։ Այդ հարցի պատասխանը չունեն ո՛չ մեղադրանքի, ո՛չ պաշտպանության, ո՛չ տուժող կողմերը։ «Փաստինֆո»-ի հաղորդմամբ՝ Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, այսօր կայացած նիստի ընթացքում շարունակվեց մեղադրյալ Եղիշե Հակոբյանի հարցաքննությունը, որն անցել է բավականին լարված մթնոլորտում, ընդ որում, Հակոբյանն ակնայտ հուզված էր, անգամ՝ հևում։

Տուժողների իրավահաջորդներից մեկը՝ Մարտիրոսյանը, հարց ուղղեց՝ հնարավո՞ր է, որ Ռադիկը նետած լինի բենզինով կանիստրը դռան ուղղությամբ, ինչին ի պատասխան մեղադրյալը նշեց, որ նման բանից տեղյակ չէ, չի ուզում գնահատական տալ: Հաջորդիվ, տուժողի հայրը շարունակեց՝ նշեց՝ արդյոք ինքն է վառել, հետո՝ Ռադիկը բենզինը լցրել է Լևոնի վրա, ինչին ի պատասխան մեղադրյալը հերքեց։ Մահացած զինծառայողի հայրն էլ շարունակեց՝ «եթե այն պահին, երբ բոցը բռնկվել է, արագ հանգցնեին, տղաները ողջ կմնայի՞ն», ինչին արձագանքելով մեղադրյալը չբացառեց, զինծառայողի հայրն էլ պնդեց՝ «Ուրեմն երեխեքին դու ես վառել»։

Եղիշե Հակոբյանը, պատասխանելով հարցադրումներին, վստահեցրեց՝ այդ օրն ինքն ադեկվատ է եղել։ Հակոբյանը, որն իր ցուցմունքի համաձայն, ևս այրվածք է ստացել, ևս մեկ անգամ պնդեց՝ չի ցանկացել որևէ մեկի մահը, եթե իմանար, որ տղաները կփնրկվեն, կմնար։ Նա նշեց՝ ինքն է մեղավոր, որովհետև ինքն է վառել վառարանը, բայց դիտավորյալ չի եղել։ Հակոբյանը նաև նշեց, որ չի ցանկանում որևէ մեկին մեղադրյել, բայց եթե այդ պահին հակահրդեհային համակարգն աշխատեր, ապա հրդեհն այդքան չէր տարածվի։ Հաջորդիվ, շարունակվեց վկա Ռադիկ Մարտիրոսյանի ցուցմունքը, որը Հակոբյանի ցուցմունքին հակասում է, Մարտիրոսյանը պնդում է, թե ինքը դեպքի վայրում չի եղել, ինքը եղել է խոհանոցում, սուրճ է խմել, խոսել՝ հեռախոսով, մինչդեռ, Եղիշե Հակոբյանն ընդգծում է, որ ինքը Ռադիկ Մարտիրոսյանի և Լևոն Խառատյանի հետ փորձել են հանգցնել կրակը, նրանք եղել են կացարանում, հետո՝ Ռադիկ Մարտիրոսյանն անմիջապես դուրս է եկել, Հակոբյանը՝ այրվածք ստանալուց հետո, Լևոնն էլ՝ Եղիշեից հետո։ Հակոբյանը նշել էր, որ այդ գործընթացը՝ հրդեհի բռնկվելուց և հանցգնելու տապալված փորձերից հետո դուրս գալու ընթացքը, տևել է 10-12 րոպե Հակոբյանի այս ցուցմունքից ու պարզաբանումներից հետո Ռադիկ Մարտիրոսյանը, պատասխանելով տուժողների իրավահաջորդների ներկայացուցիչ Նորայր Նորիկյանի հարցին, նշեց, թե ինքը գնացել էր կացարան, երբ արդեն հրդեհ էր, Հակոբյանն ու Լևոնը դուրս էին եկել կացարանից, նրանց դուրս գալիս և վառարանի մոտ չի տեսել։ Նորայր Նորիկյանը հետաքրքրվեց՝ ինչ էր անում նա 10-12 րոպե խոհանոցում, որ հինգ մետր հեռավորության վրա չէր լսել այդ ընթացքում տղաների բղավոցը, ինչին ի պատասխան՝ Մարտիրոսյանը նշեց, թե չի լսել ձայները, հետո լսել է բղավոցը, գնացել է, տեսել։ Նորիկյանն ընդգծեց՝ Եղիշեի և Լևոնի՝ նման այրվածքներ ունենալու դեպքում արդյո՞ք չէին գոռա տղաները, վկան նշեց՝ չի կարող ասել։

Հիշեցնենք, որ ողբերգական դեպքը տեղի է ունեցել 2023թ․ հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո