Փաստ ինֆո

Գեղարքունիքի մարզի ընդհանուր իրավասության դատարանում՝ դատավոր Վարդան Հարությունյանի նախագահությամբ, ընթանում է Ազատ գյուղի զորամասի զինվորական կացարանում 15 զինծառայողի կյանք խլած հրդեհի գործով դատական նիստը՝ լարված մթնոլորտում։

«Փաստինֆո»-ի հաղորդմամբ՝ այս պահին դատարանում հարցաքննվում է մեղադրյալ Եղիշե Հակոբյանը։ Վերջինս նշեց՝ մեղքից ընդհանրապես չի խուսափում, այրված զինվորներն իր խղճի վրա են, վառարանը ցանկացել է միացնել, ինչի հետևանքով հրդեհ է բռնկվել, Լևոն Խառատյանը երևի մինչև վերջ մնացել է, փորձել՝ համազգեստով հանգցնել, ինքն այդ ընթացքում այրվածք է ստացել,․ դուրս է եկել, փորձել՝ հանգցնել իրեն, ավելի ուշ՝ դուրս է եկել նաև Լևոն Խառատյանը՝ տեսնելով, որ անհնար է հանգցնելը։

«Ես մինչև վերջ չեմ մտել զինանոց, մեջքանց հետ եմ գնացել, չեմ նկատել, հետո՝ նորից մոտեցել եմ, ձեռքերս հանգցրել։ Այդ պահին մենակ եմ եղել»։

Հարցին՝ ինչու է թաքցվել այն հանգամանքը, որ ինքը Ռադիկի և Լևոնի հետ միասին է եղել դեպքի ժամանակ՝ Հակոբյանը նշեց՝ կաշկանդվել է, թե ումից և ինչից՝ մեղադրյալը պատասխան չուներ, նշում է՝ չի կարողացել ասել, թե ինչն է փոխվել, որ սկսել է անուններ տալ՝ մեղադրյալը նշեց, որ ծնողների դժբախտությունը, որ հասկանան, թե ինչ է եղել․ «Իրոք կցանկանայի ամեն ինչ անել, մտնել ննջարան, բայց այրվածք եմ ստացել, այդ պահին խառնաշփոթ է եղել, մենակ եմ եղել, չի ստացվել ինձ մոտ, բայց որ Լևոնը մտել է, ձայն է հանել՝ նշել եմ, տեղեկացված չեմ եղել նախաքննության ընթացքում՝ տվյալ անձի ցուցմունքից»։

Թե ինչու են հերքում Ռադիկն ու Լևոնը, որ նրանք իր հետ են եղել՝ Հակոբյանը չգիտի, անձամբ հիշում է, որ ծառայողներից ճաղավանդակը ծռել են, ինքը ներկա է եղել, որ կարողանան հանել զինծառայողներին, մեկին՝ հաջողվել է։ Տուժողների իրավահաջորդների ներկայացուցիչ Նորայր Նորիկյանի հարցին՝ այդ ինչ պետք է լիներ, որ իրեն ենթակա անձնակազմը չարթնանար, Ռադիկն ինչ աստիճանի կրակից ակնթարթերոն թողել ու դուրս է եկել, բայց երկու մետր այն կողմ գտնվող անձնակազմը քնից չի արթնացել կամ չի կարողացել դուրս գալ, Հակոբյանը հոդաբաշխ պատասխան չուներ, նշեց՝ դրսից ձայներ է լսել՝ «դուրս եկեք», տպավորություն էր, որ անձնակազմը տարհանվում է, ինքն էլ՝ դուրս է եկել։
«Այդ ձայնը կացարանում լսելի կլիներ։ Եթե շմոլ գազ է եղել, ապա երկու զինծառայող դուրս է եկել, ինչու՞ մյուսները դուրս չեն եկել, անհնար կլիներ, որ այդ ձայներից ընդհանրապես ոչ ոք դուրս չգար։ Այդ աստիճան շմոլ գազ դժվար թե լիներ։ Շմոլ գազի համար պետք է ծուխ լինի, բայց կրակը բարձրացել է դեպի առաստաղը, ամենավերջում՝ արդեն առաստաղն է եղել։

Լուսամուտները ջարդված էր վաղուց, պետք է, որ ծուխը դուրս գար»,- նշեց նա։

Թե ինչ է տեղի ունեցել, երբ Ժիրոյի ծնողներն են եղել, ինչ է տեղի ունեցել տարածքում՝ մեղադրյալը հստակ պատասխան չուներ, նշում է՝ երբ Սոթքից գնացել է, արդեն 4-5 հոգի նստած են եղել։

Հակոբյանի ցուցմունքի ժամանակ իրավիճակը լարվեց, մեղադրյալներից մեկի կողմից հարց հնչեցվեց՝ «ասում ես՝ ծուխ չկար, գազ չկար, քեզ, որ մտցնես այդ փոքր տարածքը, կկարողանա՞ս շնչես։ Այնտեղ պենոպլեքս կար, որի այրման ժամանակ ծուխ է լինում»։ Տուժողներից մեկն էլ արձագանքեց՝ սվաղի տակից ի՞նչ պենոպլեքս, այնտեղ նման բան չկար․ «Էս հեքիաթին բրախեք»։

Հիշեցնենք, որ ողբերգական դեպքը տեղի է ունեցել 2023թ․ հունվարի 19-ին՝ ժամը 01.30-ի սահմաններում, որի հետևանքով զոհվել է 15 զինծառայող, երեքը՝ տեղափոխվել Այրվածքաբանության ազգային կենտրոն, նրանցից երկուսը, այդ թվում, կապիտանը՝ տևական ժամանակ վերակենդանացման բաժանմունքում են գտնվել։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 532-րդ հոդվածի 4-րդ մասով, այն է՝ շրջապատի համար վտանգ ներկայացնող նյութերի հետ վարվելու կանոնների խախտում, որն անզգուշությամբ առաջացրել է երկու և ավելի անձի մահ։ Քրեական վարույթի շրջանակներում որոշումներ են կայացվել տուժող ճանաչելու մասին։

Դեպքի առթիվ նախաձեռնվել է նաև մեկ այլ առանձին վարույթ՝ ՀՀ քրեական օրենսգրքի 550-րդ հոդվածի 3-րդ մասով՝ զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ։ Նշված քրեական վարույթը միացվել է մայր գործին, համատեղ քննություն է իրականացվում։ Քրեական գործով այս պահին արդեն կա 4 մեղադրյալ, որից երկուսը կալանքի տակ են։ 4-րդ մեղադրյալը կապիտանն է, որն, ըստ Ն. Փաշինյանի կողմից կառավարության նիստում շրջանառության մեջ դրված վարկածի, փորձել է ավտոբենզինով վառել վառարանը։ Կապիտանը, ինչպես հայտնի է եւս այրվածքներ էր ստացել ու տևական ժամանակ գտնվում էր հիվանդանոցում, իսկ տուժող կողմը սկսել էր սեփական հետաքննությունն իրականացնել՝ չվստահելով պաշտոնական վարկածին։ Քրեական գործով ընդհանուր առմամբ հինգ մեղադրյալ կա։ Գործն այժմ գտնվում է Գեղարքունիքի մարզի ընդհանուր իրավասության դատարանի դատավոր Վարդան Հարությունյանի վարույթում։ Գործով այդպես էլ չի պարզվել, թե ինչու զինվորները չեն կարողացել դուրս գալ բռնկված կացարանից։

Հեղինակ՝ Իզաբել Սահակյան

Աղբյուր` Փաստինֆո