Փաստ ինֆո

Հանրապետությունում տարածում են ստանում ավտոմեքենաներից կատարվող գողությունները, որոնց բացահայտման ցուցանիշները, մեղմ ասած, չեն գոհացնում տուժողներին։ Վարորդներն ահազանգում են՝ գողությունները շահավետ բիզնես է դարձել որոշների համար. Գողացված ավտոպահեստամաերը էժան գներով վաճառում են տարբեր խանութների, որոնք էլ դրանք վերավաճառում են։

Նախօրեին վարորդները նաեւ բողոքի ակցիա էին իրականացրել ՆԳՆ-ի մոտ՝ հանդիպում պահանջելով պատասխանատուների հետ։

Ակցիայի մասնակից Մարե Պետրոսյանը «Փաստինֆո»-ին պատմեց, որ սոցիալական ցանցում գործող վարորդների խմբում այսօր կարդացել է գողության հերթական դեպքի մասին, որը տեղի է ունեցել Շենգավիթ վարչական շրջանում, բայց ունեն դեպք, երբ ավտոմեքենայի հայելիները գողացել են հենց մայրաքաղաքի կենտրոնում՝ Ամիրյան փողոցում, կայանված, այսպես կոչված, կարմիր գծերով նախատեսված կայանատեղիիում։

«Տեսանյութեր ունեմ, թե ինչպես է ավարը տոպրակով մեկը տանում գիշերով, ունեմ նաև ցերեկով գողության տեսանյութ»,- ասաց մեր զրուցակիցը՝ նշելով, որ ակցիայի օրը պատկան մարմինները որեւէ մեկը հույս չտվեց։ «Այդ օրը եղավ այն, որ ավելի շատ գողությունների մասին իմացանք ու պարզապես այն վարոդներն ովքեր արդեն գրած բողոքներ ունեին, նորից զանգեր ստացան քննիչներից ու նորից հարցեր տվեցին։ Բայց արդարանում են, ասում են մենք անզոր ենք, իդեաներ տվեք, թե ինչ անենք,դուք էլ օգնեք գտնենք»,- նշեց Մ. Պետրոսյանը։

Նրա խոսքերով՝ եթե անգամ գողության հեղինակին հայտնաբերում են, ապա նման գողությունների համար կալանքը որպես խափանման միջոց ընտրելու միջնորդություն չի ներկայացվում, քանի որ գողոնի արժեքի, վնասի շեմը, ինչպես ասում են քննիչները, կալանք չի նախատեսում։

Կին վարորդը նշեց, որ 4 անգամ գողացել են իր ավտոմեքենայի կողային հայելիները, երեք անգամ բողոքել է, 4-րդ անգամ՝ ոչ։

«Փոխոստիկանապետն ինձ հարցնում է ինչո՞ւ չեմ բողոքում, նկարագրեցի, որ ամեն բողոքի հետ 4-5 ժամ կորցնում եմ, բողոք գրում, մինչև քննիչն է գալիս, մինչև փորձագետը, տեղազննություն է կատարվում ու ողջ աշխատանքային օրը նվիրում ես դրան ու ու չունես արդյունք, 4-րդ անգամ արդեն չես բողոքում, իսկ իմ մեքենայի հայելիները, որոնք գողացել են 4 անգամ՝ 70.000 արժեն։ Ինչքան մտածում ենք այստեղից չգնենք, այլ դրսից պատվիրենք, բայց ամեն պատվերի ժամանումն ավելի քան 10 օր է տևում, ես չեմ կարող առանց կողային հայելիների վարել, մարդ կա այդ ռիսկին գնում է, ես չեմ կարող»,- նշեց մեր զրուցակիցը՝ աբսուրդ որակելով այն, որ փորձագետը վնասի չափը գնահատում է՝ կախված մեքենայի տարեթվից՝ արժեքը վերցնելով երկրոդային շուկայից։

«Իսկ եթե պաշտոնական գինը դիտարկի գողոնի գինը, ապա վնասը կհատի օրենսդրական շեմն ու գողին կալանքի կտանեն, բայց դա չեն անում ու արդյունքում ստեղծվում է փակ շղթա։ Գողն ու կորուստ կրած վարորդը շարունակում են ձևավորել նաև այդ երկրորդային շուկան։ Մեկը գողանում է եւ էժան տալիս խանութներին, մյուսը, գողի պատճառով կորցնում, ու, էժան փնտրելով, այն գտնում է երկրորդային շուկայում», - ասաց Մարե Պետրոսյանը։

Աղբյուր` Փաստինֆո