Փաստ ինֆո

Սիրիայում հայ համայնքը փորձում է անցնել բնականոն կյանքի։

«Տևական ընդմիջումից հետո Սիրիայում այսօր վերսկսվել է հայկական ուսումնական հաստատությունների աշխատանքը։ Իրենց գործունեությունն են սկսել նաեւ երաժշտական դպրոցները, հայագիտական հիմնարկները, բացվել են հայկական միությունների գրասենյակները», - այս մասին «Փաստինֆո»-ին ասաց Սիրիայում «Գանձասար» պարբերականաի խմբագիր Զարմիկ Պողիկյանը։

Բացի այդ՝ Կիրակի հայկական և քրիստոնեական այլ համայնքների եկեղեցիներում անցկացվել է պատարագ։ Զարմիկ Պողիկյանի փոխանցմամբ՝ բացվել են նաեւ ռեստորաններն ու սրճարանները։

Սիրիայի խորհրդարանի հայազգի պատգամավոր Մարիա Գաբրիելյանը «Փաստինֆո»-ին տեղեկացրեց, որ գործում են նաեւ բոլոր ճանապարհները, այդ թվում՝ դեպի Լիբանան եւ արդեն հնարավոր է երկրից դուրս գալ։ Մեծամասամբ բաց են նաեւ բանկերը։

Մ. Գաբրիելյանը հաստատեց նաեւ տեղեկությունները, որ Հալեպի օդանավակայանում եւս առաջիկայում կվերականգնվեն չվերթները։ Համենայն դեպս, ինչպես նշեց պատգամավորը, նման խոստում է տվել օդանավակայանի տնօրենը։

Թեեւ Հալեպում կյանքը վերականգնվում է, բայց գլխավոր հյուպատոսը դեռ չի վերադարձել Հալեպ, իսկ համայնքում էք տեղեկություն չունեն, թե երբ է մտադիր վերադառնալ։ ՀՀ ԱԳՆ-ն եւս խուսափում է որեւէ հստակ տեղեկատվություն հաղորդել, օրեր առաջ ԱԳՆ-ն հայտարարել էր, որ դիվանագիտական ներկայացուցչությունն ու գլխավոր հյուպատոսը շարունակում են գտնվել Բեյրութում ու այնտեղից են աշխատում։ Այսօր «Փաստինֆո»-ն փորձեց ԱԳՆ-ից ճշտել, ի վերջո, հյուպատոսը երբ կվերադառնա Հալեպ, որտեղ բավական մեծ հայկական համայնք ունենք, սակայն այս հարցին պատասխան չկա. ԱԳՆ-ից ասում են, թե նոր տեղեկատվություն լինելու դեպքում կհայտնեն։

Աղբյուր` Փաստինֆո