Փաստ ինֆո

ԱԺ պատգամավոր Հովիկ Աղազարյանի հեռախոսը թվային խուզարկության է ենթարկվել՝ դատարանի որոշման հիման վրա՝ առանց նրա անձեռնմխելիության հաղթահարման և վկայի կարգավիճակ ունենալու պայմաններում։ Այս մասին «Փաստինֆո»-ի հետ զրույցում ասաց Հովիկ Աղազարյանի փաստաբան Հակոբ Ճարոյանը։

Հիշեցնենք, որ Հովիկ Աղազարյանը դեկտեմբերի 2-ին հայտարարեց Նիկոլ Փաշինյանի «խնդրանքը» մերժելու եւ պատգամավորական մանդատը վայր չդնելու մասին, ինչից հետո՝ դեկտեմբերի 3-ին, ՔՊ վարչության որոշեց Հովիկ Աղազարյանին հեռացնել կուսակցությունից։ Որպես Աղազարյանի հեռացման պատճառ նշվում է պետական և կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումները։ Ընդ որում, այդ «արտահոսքերի» մասին իշխանություններն իմացել են այն բանից հետո, երբ ՀԿԿ-ում քննվող՝ ԱԺ-ում Արգիշտի Քյարամյանի և Աղազարյանի միջադեպի վերաբերյալ քրեական վարույթի շրջանակներում առգրավվել է Հովիկ Աղազարյանի հեռախոսը։ Այլ խոսքով՝ քննիչը ծանոթացել էր հեռախոսի բովանդակությանն ու նախաքննական գաղտնիք պարունակող տեղեկությունները հասանել էին դարձել Նիկոլ Փաշինյանին ու ՔՊ-ին։

ԱԺ ամբիոնից Նիկոլ Փաշինյանը հայտարարել էր, թե այդ տեղեկություններն իրեն տրամադրել է օպերատիվ մարմինը։ Մինչդեռ, ինչպես պարզվել է, դատախազությունն ու նախաքննական մարմինը տեղյակ չեն եղել օպերատիվ տվյալներից, քանի որ, ինչպես «Փաստինֆո»-ին դեկտեմբերի 9-ին հայտնել էին դատախազությունից՝ Հովիկ Աղազարյանի կողմից պետական գաղտնիք պարունակող արտահոսքեր կազմակերպելու վերաբերյալ հրապարակումն է ուղարկվել ՀՀ հակակոռուպցիոն կոմիտե՝ վարույթ նախաձեռնելու հարցը լուծելու։ ՀԿԿ-ից այսօր հայտնել են, որ դատախազությունից ստացված հաղորդման հիման վրա քրեական վարույթ է նախաձեռնվել՝ պետական գաղտնիքի հրապարակման հատկանիշներով։

Այս գործով Հովիկ Աղազարյանը դեռևս չի հարցաքննվել։ Փաստաբան Հակոբ Ճարոյանը հայտնեց, որ Հովիկ Աղազարյանը վերջին անգամ վարույթն իրականացնող մարմին է հրավիրվել՝ կապված թվային խուզարկության հետ, մասնավորապես՝ հրավիրել են, դատարանի որոշումը ցույց տվել և իրենց՝ Հովիկ Աղազարյանի, փաստաբանի և փորձագետի, քննիչի մասնակցությամբ թվային խուզարկություն իրականացրել։

«Հենց այդտեղ խոսակցությունը գնացել է, որ այդտեղ կան նեղ անձնական զրույցներ, քննիչն ասել է՝ մեզ դա չի հետաքրքրում, մեզ հետաքրքրում է Արգիշտի Քյարամյանի հետ խոսակցությունները։ Դրանից հետ՝ մեր մոտից հեռախոսը վերցվել է, ստորագրել ենք, հեռախոսը դրվել է ծրարի մեջ, բայց փորձագետն ամբողջ պարունակությունը՝ CD-ով, տրամադրել է քննիչին։ Մենք, իմանալով, թե ինչ կա հեռախոսում, գրությամբ տալիս ենք համաձայնություն, որ քննիչն առանց մեզ ուսումնասիրի։ Քննիչը, ծանոթանալով, զեկուցում է վերադասին կամ դատախազին, և դա հայտնվում է վարչապետի մոտ»,- ասաց փաստաբանը։

Դիտարկմանը, որ Փաշինյանի պնդմամբ՝ օպերատիվ մարմինն է փոխանցել տեղեկությունները՝ փաստաբանը նշեց՝ սխալ է ասում, նման բան չի կարող լինել, փորձագետը տվել է քննիչին, օպերատիվ մարմին չի աշխատել։ Դիտարկմանը, որ եթե քննիչի ձեռքի տակ տվյալներ եղել են, ինչու քրեական վարույթ չի նախաձեռնել քննիչը, փոխարենը՝ քրեական գործ հարուցելու հարց բարձրացվել է միայն Նիկոլ Փաշինյանի հայտարարություններից հետո դատախազության կողմից՝ հրապարակումները ՀԿԿ ուղարկելուց հետո, փաստաբանն արձագանքեց՝ եթե լիներ պետական գաղտնիքի արտահոսք, ապա քննիչը պարտավոր էր հարուցել քրեական վարույթ կամ միջնորդություն ներկայացներ Գլխավոր դատախազություն, եթե չեն հարուցել, ապա նշանակում է, որ նման խնդիր չկա։

«Ով ինչ հայտարարություն ուզում է անի՝ վերջում պետք է հիմնավորվի նյութերով՝ բջջային հեռախոսի պարունակությամբ, չէ՞, որն այժմ գոյություն չունի»,- նշեց փաստաբանը՝ հավելելով, որ իրավապահները երկընտրանքի առաջ են կանգնել, քրվարույթ նախաձեռնելու դեպքում՝ անհիմն քննություն են իրականացնելու, չնախաձեռնելու դեպքում՝ Նիկոլ Փաշինյանին են սուտ հանելու։

Ինչ վերաբերում է այն հանգամանքին, որ Աղազարյանի անձեռնմխելիությունը հաղթահարված չի եղել, ինչու՞ է տվել հեռախոսը՝ փաստաբանը նշեց, որ առաց անձեռնմխելիության հաղոահարման՝ վկայի կարգավիճակով չէին կարող առգրավել հեռախոսը, քննիչի սխալ կա, բայց այդ սխալից հետո քննիչը օրենքով է գործել, դատարանը, որը կրկին չէր կարող վկայի դեպքում նման որոշում կայացներ, թվային խուզարկության որոշում է կայացրել․ «Իրավական դաշտում խնդիր կա»։

Դիտարկմանը՝ արդյո՞ք նշված ապացույցի՝ անօրինական ձեռք բերումը չի ենթադրում, որ այն անթույլատրելի ապացույց է, գործը հետագայում ենթակա է լինելու կարճման՝ Ճարոյանը նշեց, որ այդ հարցը չեն շեշտադրում, քանի որ առհասարակ պետական գաղտնիքի հրապարակում չի եղել։

Անդրադառնալով գլխավոր դատախազություն ներկայացված հանցագործության մասին հաղորդմանը՝ կապված Աղազարյանի անձնական տվյալներն այլ անձանց փոխանցելու դեպքի հետ, ապա փաստաբանը հայտնեց, որ այն վերահասցեագրվել է ՀԿԿ, սակայն որոշում դեռևս չի կայացվել։ Հանցագործության մասին հաղորդումը փաստաբանը ներկայացրել է՝ որպես հիմք ընդունելով Փաշինյանի հայտարարությունն՝ ԱԺ-ում՝ թե՛ նախաքննական գաղտնիքի խախտման, թե անձնական կյանքի խիստ մասնավոր տեղեկությունների հրապարակման առնչությամբ։

Հեղինակ՝ Իզաբել Սահակյան

Աղբյուր` Փաստինֆո