Փաստ ինֆո

Միջազգային դատարանները շատ կարևոր են անվտանգություն ու խաղաղություն սահմանելու համար, քանի որ սրանք միակ այն գործիքներն են, որոնք մենք ունենք։ Այս մասին Երևանում ընթացող «Ընդդեմ Ցեղասպանության հանցագործության» գլոբալ ֆորումի ժամանակ նշեց Միջազգային իրավական հարցերով ներկայացուցիչ Եղիշե Կիրակոսյանը:

Մասնավորապես, Կիրակոսյանը, անդրադառնալով Հռոմի ստատուտի վավերացմանը, նշեց, որ Հայաստանում շատ մարդիկ չեն տեսնում պատճառներ, թե ինչու Հայաստանը միացավ դրան։ Նրա խոսքով՝ Հայաստանում ակնկալիքները միանալուց բավականին բարձր էին, բայց այդ դատարանի աշխատանքը բավականին սպեցիֆիկ է և այն պետք է մարդկանց բացատրել, թե ինչ է անում այդ դատարանը:

«Ես իրականում հավատում եմ, որ որ նույնիսկ միջազգային քրեական դատարանը և մարդու իրավունքների եվրոպական դատարանը շատ մեծ ազդեցություն են ունենալու, թե ինչպես է այդ երկիրը իրեն պահում: Որովհետև ըստ միջազգային իրավունքի, դա ոչ միայն աբստրակտ պատասխանատվություն է, այլ միջազգային քրեական դատարանը նաև ցույց է տալիս անհատական քրեական պատասխանատվություն մարդկանց նկատմամբ, որոնք ղեկավարում են այդ երկրները: Ես կարծում եմ, որ այս օրենսդրությունը կարող է ունենալ շատ ավելի լավ ազդեցություն երկրի պահվածքի վրա: Ընդհանրապես, միջազգային դատարանները շատ-շատ կարևոր կոմպոնենտ են սահմանելու համար անվտանգություն և խաղաղություն, որովհետև սրանք միակ այն գործիքներն են, որ մենք ունենք»,- ընդգծեց նա։

Կիրակոսյանը նաև անդրադարձավ Հայաստանի ներկայացրած հայցերին։ Նախ Կիրակոսյանը նկատեց, որ ինքն այնքան միամիտ չէ, որ ակնկալի, որ այս բարդ կոնֆլիկտային իրավիճակներում միջազգային դատարանի որոշումները, ներառյալ ICJ-ը կամ ՄԻԵԴ-ը, միանշանակ կտրուկ փոփոխությունների կարող են բերել:

Նրա փոխանցմամբ՝ Հայաստանի հայցերի դեպքում խոսքը հիմնականում վերաբերում է ռասայական խտրականությանը, ատելության խոսքին, երբ խնդիրը հասնում է այս մակարդակին, դուք չեք կարող սպասել, որ այդ երկիրը միանգամից հրաշքով ձևափոխվի՝ իդեալական օրենքներ ունեցող երկրի։

«Դա տեղի չի ունենալու և դուք չեք կարող ասել միջազգային դատական համակարգին՝ ինչո՞ւ դա միանգամից տեղի չի ունենում: Դրա համար անհրաժեշտ է ժամանակ և դա նույնիսկ չի նշանակում, որ այստեղ չկա ազդեցություն:

Երբ մենք խոսում էինք ոտնահարումների և այն ավտոկրատ երկրների մասին, որոնք փորձում են խախտել միջազգային համակարգը, փորձում են խաղալ միջազգային իրավունքի հետ, սա պրոբլեմ է, որովհետև ավտոկրատ երկրները փորձում են միջազգային իրավունքներն օգտագործել որպես գործիք՝ երկրների միջև հարաբերություններում»,- նշել է Կիրակոսյանը՝ հավելելով, որ որոշ երկրների դեպում դա նաև խաղաղության վրա է կարողանում ազդել, ինչը ևս խնդիր է։

Աղբյուր` Փաստինֆո