Փաստ ինֆո

13-ամյա աղջիկ երեխայի առողջական վիճակն ընդունման պահին գնահատվել է միջին ծանրության, գանգատվել է ոսկրամկանային սուր ցավերից, որոնք արտահայտվել են քայլքի ֆունկցիայի խանգարումով: Անցել է համապատասխան բոլոր հետազոտությունները, ելնելով վիճակից, ընդունող բժիշկը խորհրդակցել է նաեւ նեղ մասնագետների հետ, ախտորոշման հստակեցման եւ բուժական տակտիկայի վարման հետ կապված: Այս մասին «Փաստինֆո»-ի հետ զրույցում հայտնեցին «Վանաձոր» ԲԿ-ից։

«Առաջին բուժօգնության միջոցառումների ֆոնին վիճակում նկատվել է համեմատական դինամիկ բարելավում: Առավոտյան 06:26-ի սահմաններում երեխայի վիճակը կտրուկ վատացել է: Հրավիրվել է բաժանմունքի վարիչ Ա. Համբարյանը եւ մանկական ռեանիմատոլոգ Ի. Անտոնյանը: Վիճակը գնահատվել է ծայրահեղ ծանր: Կատարվել են հակաշոկային եւ վերակենդանացման բոլոր հնարավոր միջոցառումները: Կատարված բուժական միջոցառումների ֆոնին աճել է պրոգրեսիվով վատացում, որը, ցավոք սրտի, հանգեցրել է երեխայի կենսաբանական մահվան»,- նշեցին ԲԿ-ից՝ հավելելով, որ երեխայի մահվան հիմնական պատճառը կպարզվի դատաբժշկական փորձաքննությամբ:

Հիշեցնենք, որ դեպքը տեղի է ունեցել այսօր՝ դեկտեմբերի 13-ին։ Դեպքի փաստով քննչական վարչությունում նախաձեռնվել է քրեական վարույթ: Բժիշկները այս պահին պարզում են մահվան հանգամանքը:

Ի․ Ս․

Աղբյուր` Փաստինֆո