Փաստ ինֆո

ՀՀ Արտակարգ իրավիճակների նախկին նախարար Անդրանիկ Փիլոյանը դատապարտվեց ազատազրկման՝ 4 տարի 5 ամիս ժամկետով։ Այս մասին «Փաստինֆո»-ն տեղեկանում է Հակակոռուպցիոն դատարանից։

Հակակոռուցպոն դատարանը՝ դատավոր Տիգրան Դավթյանի նախագահությամբ, քիչ առաջ հրապարակեց Անդրանիկ Փիլոյանի և մյուսների գործով դատավճիռը, համաձայն որի՝ մեղադրյալներից Արտակ Բեյբությանը մեղավոր է ճանաչվել կաշառք ստանալու փորձի համար, պատիժ է նշանակվել ազատազրկումը՝ 4 տարի 6 ամիս ժամկետով, որը պայմանականորեն չկիրառվեց՝ սահմանելով փորձաշրջան՝ 4 տարի ժամկետով։ Վիգեն Գրիգորյանը մեղավոր ճանաչվեց և դատապարտվեց ազատազրկման՝ 8 տարի ժամկետով, որին, հաշվակցելով նախնական կալանքի ժամանակը, վերջնական պատիժ սահմանվեց 5 տարի 11 ամիս 15 օր ժամկետով ազատազրկումը։ Արթուր Օհանյանը մեղավոր ճանաչվեց կաշառք տալու համար, սակայն պատիժը պայմանականորեն չկիրառվեց, սահմանվեց փորձաշրջան՝ 1 տարի ժամկետով։ Վիգեն Մկրտրչյանը մեղավոր ճանաչվեց իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով կաշառքի միջնորդության և առանձնապես խոշոր չափերով վստահված գույքը հափշտակելու համար։

Նրա նկատմամբ որպես պատիժ նշանակված ազատազրկումը՝ 3,5 տարի ժամկետով՝ պայմանականորեն չկիրառվեց, սահմանվեց փորձաշրջան՝ 2 տարի ժամկետով։ Հրաչյա Երեմյանը մեղավոր ճանաչվեց, որպես պատիժ նշանակված տուգանքը պայմանականորեն չկիրառվեց՝ հաշվի առնելով նրա՝ անազատության մեջ գտնվելու ժամանակահատվածը։ Անդրանիկ Փիլոյանի նկատմամբ որպես վերջնական պատիժ նշանակվեց ազատազրկումը, սակայն, հաշվակցելով նրա՝ կալանքի տակ գտնվելու ժամանակահատվածը, փաստացի արգելանքի տակ կգտնվի 4 տարի 5 ամիս ժամկետով, ինչպես նաև՝ տուգանքը՝ 1 մլն 300 հազար դրամի չափով և որոշակի հանրային ծառայության պաշտոններ զբաղեցնելու իրավունքից զրկումը՝ 3 տարի ժամկետով։

Մեղադրյալ Արա Յաղջյանն արդարացվեց, Աշոտ Հակոբյանը՝ հոդվածներից մեկով արդարացվեց, մյուս հոդվածով՝ արարքը վերաորակվեց և սահմանվեց տուգանքը՝ 500,000 դրամի չափով։

Հիշեցնենք, որ Անդրանիկ Փիլոյանը, վերջինիս խորհրդականը, ինչպես նաև ԱԻ նախարարության 10-ից ավելի աշխատակիցներ, այդ թվում` տարբեր ստորաբաժանումների ղեկավարներ մեղադրվում են առանձնապես խոշոր չափերով կաշառք ստանալու, դրան օժանդակելու, պաշտոնեական դիրքը չարաշահելու, խարդախության եղանակով խոշոր չափերով հափշտակություն կատարելու, ինչպես նաեւ խոշոր եւ առանձնապես խոշոր չափերով ապօրինի վարձատրություն ստանալու, տալու եւ այլ չարաշահումների մեջ:

Մասնավորապես, ըստ քրեական գործի՝ նախաքննությամբ պարզվել է, որ նախարարության հետ համագործակցող ՍՊ ընկերության օգտին ակնհայտ ապօրինի գործողություններ կատարելու և ծառայության գծով հովանավորչության, այն է՝ հիշյալ ընկերության տնօրենի կողմից նախարարության հարևանությամբ բազմաբնակարան շենք կառուցելու համար անհրաժեշտ թույլտվություններ ձեռք բերելու հարցում համապատասխան պաշտոնատար անձանց բարեխոսելու, ինչպես նաև նույնպիսի ծառայություններ մատուցող այլ տնտեսվարողի համար խոչընդոտներ ստեղծելու համար ԱԻ նախարար Ա. Փիլոյանը իր խորհրդական Ա. Հ.-ի օժանդակությամբ 2022 թ.-ին ստացել է խոշոր չափերով` 1000000 ՀՀ դրամ կաշառք:
Նախաքննությամբ պարզվել է նաև, որ Անդրանիկ Փիլոյանը, առանց օրենքով սահմանված կարգի և փաստաթղթավորման, բանավոր հանձնարարություն է տվել ԱԻ նախարարության ստորաբաժանումներից մեկի ղեկավար Վ. Մ.-ին ԱԻՆ պետական ռեզերվների գրասենյակի Գագարինի պահեստի ավելի քան 18 մլն ՀՀ դրամ արժողությամբ գույքն ապամոնտաժելու վերաբերյալ:

Այնուհետև Վ. Մ.-ն 2022թ. մարտին, հիշյալ գույքը հափշտակելու դիտավորությամբ, այն տեղափոխել է մասնավոր տարածք և դրա մի մասը վաճառել Սևան քաղաքի բնակչին:

Բավարար ապացույցներ են ձեռք բերվել նաև այն մասին, որ Վ. Մ.-ն իր ծանոթ Ա. Օ.-ի կողմից կաշառք տալու եղանակով նախարարության ՓԾ ջոկատներից մեկի հրամանատարի պաշտոնին նշանակվելու մտադրության մասին 2022թ. հունվարին հայտնել է ԱԻ նախարարին, ով ընդունել է այդ առաջարկը: Ա. Օ.-ի` համապատասխան պաշտոնում նշանակվելուց հետո Վ. Մ.-ն օժանդակել է նախարար Ա. Փիլոյանի կողմից հիշյալ անձից ոսկու ձուլակտորի տեսքով կաշառք ստանալուն:

Բացի այդ, քրեական վարույթի համաձայն` նախարարության ստորաբաժանումներից մեկի ղեկավար Հ. Ե.-ն, օգտագործելով պաշտոնեական դրությունը, համապատասխան անձին նախարարությունում աշխատանքի ընդունելու համար միջնորդել է ԱԻ նախարարի կողմից ջեռուցման համակարգի տեսքով խոշոր չափերով` 960 000 ՀՀ դրամ կաշառք ստանալուն:

Քննությամբ պարզվել է նաև, որ Վ. Գ.-ն, մտերիմ հարաբերությունների մեջ գտնվելով ՀՀ ԱԻ նախարարի հետ, վերջինիս կողմից իր լիազորությունների շրջանակում մի շարք անձանց օգտին գործողություններ կատարելու, այն է` նախարարության տարբեր ստորաբաժանումներում աշխատանքի ընդունելու համար նշված անձանցից յուրաքանչյուրից պահանջել և ստացել է 1700-2500 ԱՄՆ դոլարի չափով ապօրինի վարձատրություն:

ՀՀ արտակարգ իրավիճակների նախարար Անդրանիկ Փիլոյանին մեղադրանք է ներկայացվել ՀՀ քրեական օրենսգրքի 435-րդ հոդվածի 2-րդ մասի 2-րդ կետով (2 դրվագ), 435-րդ հոդվածի 1-ին մասով և արարքը կատարելու պահին գործող ՀՀ քրեական օրենսգրքի (ուժի մեջ է մտել՝ 01.08.2003 թվականին, ուժը կորցրել է՝ 01.07.2022) 308-րդ հոդվածի 1-ին մասով:
Եվս 12 անձի, այդ թվում` ԱԻ նախարարության տարբեր պաշտոնյաների, մեղադրանք է ներկայացվել ՀՀ քրեական օրենսգրքի 46-435-րդ հոդվածի 2-րդ մասի 2-րդ կետով, 437-րդ հոդվածի 2-րդ մասի 1-ին կետով, 256-րդ հոդվածի 3-րդ մասի 3-րդ կետով, 436-րդ հոդվածի 1-ին մասով, 438-րդ հոդվածի 2-րդ մասի 2-րդ կետով, 439-րդ հոդվածի 2-րդ մասի 2-րդ կետով և արարքները կատարելու պահին գործող ՀՀ քրեական օրենսգրքի (ուժի մեջ է մտել՝ 01.08.2003 թվականին, ուժը կորցրել է՝ 01.07.2022) 308-րդ հոդվածի 1-ին մասով, 312-րդ հոդվածի 2-րդ մասով, 311.2-րդ հոդվածի 3-րդ մասի 2-րդ կետով, 38-3112-րդ հոդվածի 3-րդ մասի 2-րդ կետով, 312.2-րդ հոդվածի 2-րդ մասով, 38-312.2-րդ հոդվածի 2-րդ մասով:

Հեղինակ՝ Իզաբել Սահակյան

Աղբյուր` Փաստինֆո