Փաստ ինֆո

Բոլորը գիտեն, թե ինչ է նշանակում պետական գաղտնիք, պետական կարևորություն ունեցող փաստաթղթեր, ես 7 տարվա մեջ երբևէ չեմ դիմել այս կամ այն գաղտնի փաստաթղթի ծանոթանալու համար։ Այս մասին Ազգային Ժողովում լրագրողների հետ զրույցում հայտարարեց արդեն անկախ պատգամավոր Հովիկ Աղազարյանը՝ անդրադառնալով ՔՊ վարչության հաղորդագրության այն հատվածին, թե ինքը պետական և կուսակցական նշանակության կոնֆիդենցիալ տեղեկություններ է հրապարակել։

«Դա արվում է գրավոր ու ֆիքսվում է։ եթե խոսքը վերաբերում է խմբակցության նիստերի ընթացքում հնչած տեղեկություններին, որոնց մասնակցում են 60-70 պատգամավորներ և կառավարության անդամներ, ապա այս առումով կարող եմ ասել, որ բոլորը գիտեն, որ ես միշտ հասանելի եմ լրագրողների համար, որովհետև կարևորում եմ ձեր աշխատանքը։ Կարող է պատահել, որ այդ զրույցների ընթացքում մի բան եմ ասել, որ չէր կարելի ասել, ես չեմ հիշում նման դեպք, որ միտումնավոր արտահոսք կազմակերպած լինեմ»,- նշել է նա։

Աղազարյանի խոսքերով՝  ինքը վարչության նիստի ընթացքում իր զարմանքն է հայտնել, թե ինչպես է իր հեռախոսի մեջ եղած տեղեկությունները հայտնվել վարչությունում ու նաև վարչապետի մոտ։

«Իմ հեռախոսը 10 օրից ավելի գտնվել է քննիչի մոտ։ Քննիչն ասել է, որ իրենց հետաքրքրում է միայն այն հեռախոսազանգերը, որոնք կապ ունեն Քյարամյանի գործի հետ։ Ես նաև ասել եմ, որ այնտեղ լիքը բաներ կան, որոնք չեմ ուզում, որ կարդան։ Եթե կարդան էլ՝ բան չկա, տղա են, սարսափելի չէ, բայց չլինի էնպես, որ դրանք հրապարակվեն։ Տղան ասաց՝ պարոն Աղազարյան, ինչի մասին եք խոսում, դուք գիտե՞ք ինչ պետության մեջ եք։ Ես էլ հպարտ կեցվածք ընդունեցի ու հեռացա։ Բայց պարզվեց, որ իմ հեռախոսը բացել են ու այդտեղից նյութեր են հայտնվել վարչապետի մոտ, ով է տվել ու ինչ նպատակով՝ չեմ կարող ասել»։

Հարցին՝ հնարավո՞ր է, որ վարչապետն է խնդրել՝ Աղազարյանը պատասխանեց, որ չէր ցանկանա հավատալ դրան։

Աղբյուր` Փաստինֆո