Փաստ ինֆո

Պիտի հիասթափեցնեմ ձեզ, Հովիկ Աղազարյանի հեռախոսը իմ սեղանին չի հայտնվել և չէր էլ կարող հայտնվել։ Այդ հեռախոսը քրեական գործի շրջանակներում հայտնվել է անկախ մարմնի մոտ և անկախ մարմինը համապատասխան թույլտվություններն ունենալով՝ բոլորովին ուրիշ գործով հանձնարարական է տվել մեկ այլ մարմնի, որն այդքան էլ անկախ չի։ Այս մասին Այս մասին ԱԺ -կառավարություն հարցուպատասխանի ժամանակ ասաց վարչապետ Նիկոլ Փաշինյանը՝ անդրադառնալով «Հայաստան» խմբակցության պատգամավոր Ագնեսա Խամոյանի դիտարկմանը, թե Հովիկ Աղազարյանի հեռախոսը, քննիչի մոտիցինչպես է հայտնվել է Նիկոլ Փաշինյանի սեղանին։

Փաշինյանը նշեց, որ անկախ մարմինը հանձնարարականը կատարելու ընթացքում բախվել է տեղեկությունների, որոնք իրենց մեջ պարունակել են պետական անվտանգությանը վերաբերող սպառնալիքներ, այդ թվում՝ հակահետախուզական սպառնալիքներ։ «Բնականաբար, այդ մարմինը պարտավոր էր իր գործառույթների շրջանակում կատարել աշխատանք, այդ թվում՝ հեռախոսի տիրոջ հետ, միաժամանակ, պարտավոր էր զեկուցել իր վերադասին՝ վարչապետին»։
Նա նշեց, որ երբ այդ տեղեկությունները հայտնվում են վարչապետի սեղանին, դա ուրիշ իրավիճակ է, և ընդգծեց, որ այդ տեղեկությունով կիսվել է «օրենքի տառին և հնարավորություններին համապատասխան»։

« Դրանից առաջ ես խորհրդակցել եմ բոլոր հնարավոր մարմինների հետ, որոնք իրավասու են գնահատական տալ այդ իրավիճակին։ Ես ասում եմ, որ այո՝ «Քաղաքացիական պայմանագիր» կուսակցությունը, վարչությունը որոշում է կայացրել Հովիկ Աղազարյանին հեռացնել սեփական շարքերից, այդ թվում՝ հանրային բարոյականության ստանդարտները ոտնահարելու պատճառով, որը, ի դեպ, ընդգծված է ԱԺ պատգամավորի գործունեության երաշխիքների մասին օրենքում։
Այո, ժողովրդավարության բաստիոնը պետք է գտնի լծակներ քաղաքական, բարոյական և այլ՝ նման կարմիր գծեր հատած պատգամավորին ժողովրդի կողմից տված մանդատից զրկելու համար։ Ոչ մի պահ չկասկածեք, որ բոլոր օրինական միջոցները կգործադրվեն այդ նպատակին հասնելու համար»,- ասաց Փաշինյանը։
Ագնեսա Խամոյանն էլ արձագանքեց, որ Հովիկ Աղազարյանը դարձել է «պետական դավաճան» ու «ահաբեկիչ», քանի որ չի կատարել Նիկոլ Փաշինյանի «խնդրանքը»՝ մանդատը վայր չի դրել. «Նարեկ Զեյնալյանը նման ճակատագրի չարժանացավ, քանի որ չմերժեց Ձեր «խնդրանքը»։

Նիկոլ Փաշինյանն էլ ասաց, որ պետք չէ այս իրավիճակը տարածել այլ անունների վրա, որովհետև մեկը մյուսի հետ կապ չունեն։

Նա նաև շնորհակալություն հայտնեց պաշտոնից ազատված ԲԴԽ նախկին նախագահ Կարեն Անդրեասյանին՝ նրա աշխատանքի և իր խնդրանքը կատարելու համար։

Աղբյուր` Փաստինֆո