Փաստ ինֆո

Հարկային օրենսգրքի փոփոխությունների դեմ բողոքել են բազմաթիվ փոքր և միջին տնտեսվարողներ։ ՔՊ պատգամավոր Բաբկեն Թունյանը և ՔՊ խմբակցությունը կողմ է քվեարկում մի օրենքի նախագծի, որով 1000-ավոր ընկերությունների հարկային բեռը ավելանալու է դոմինոյի էֆեկտով։ Այս մասին 2025 թ-ի բյուջեի նախագծի ընդունումից հետո հայտարարեց «Հայաստան» խմբակցության պատգամավոր Գեղամ Մանուկյանը։

«Ընկերությունների հաշվապահական, իրավաբանական, ֆինանսական խորհրդատվության հարցերով ծախսերը ավելանալու է այս քվեարկության արդյունքում«-ասաց Մանուկյանը։

Վարման կարգով ձայն խնդրել ՔՊ-ական Վահագն Ալեքսանյանը և հայտարարեց, որ «Հայաստան» խմբակցությունը դեմ քվեարկեց մի նախագծի, որը ենթադրում էր, որ ՀՀ զինծառայողները պետք է աշխատավարձ ստանան, ծերերը թոշակ պետք է ստանան, ՀՀ բանակի համար զենք պետք է գնվի, ամրաշինական աշխտանքներ պետք է կատարվեն։ «Սա այն ամենն է ինչ պետք է իմանալ «Հայաստան» խմբակցության մասին»։

Այս հայտարարությունից հետո ընդդիմության շարքերում իրարարցում սկսվեց։

Խոսք վերցրեց ՔՊ-ական Բաբկեն Թունյանը և նշեց, որ «Հայաստան» խմբակցությունը կողմ չքվեարկեց մի նախագծի, որով նախատեսվում էր նվազեցնել ՀԴՄ կտրոնների աննշան խախտումների համար նախատեսվող տուգանքների չափը։

«Այսինքն, տնտեսվարողների շահերը պաշտտպանող նախագիշին դեմ եք քվեարկում։ Կարծում եմ տնտեսվարողները լավ գիտեն ինչ է արվում»։

«Հայաստան» խմբակցության պատգամավոր Արթուր Խաչատրյանն էլ արձագանքելով Վահագն Ալեքսանյանի հայտարարությանն՝ ասաց, որ «Հայաստան» խմբակցությունը դեմ քվեարկեց բյուջեին, որովհետև բանակին անհրաժեշտ գումար չեք հատկացնում։ «Ձեր անվտանագության համար գումար եք հատկացնում ոստիկանության հատուկ ստորաբաժանմանը, որովհետև անհրաժեշտ գումար չեք հատկացնում առողջապահությանը, կրթությանը, պարտ եք սպասարկում, պարտք, որի արդյունավետությունը ոչ ոք չի տեսել։ Դա պարտքով ապրելու բյուջե է, որևէ տնտեսական արժեք չստեղծելու բյուջե է»։

Նշենք, որ Ազգային ժողովը քիչ առաջ 66 կողմ, 30 դեմ, 0 ձեռնպահ ձայներով ընդունեց նաև ՀՀ 2025 թվականի պետական բյուջեն:

Աղբյուր` Փաստինֆո